Nuapada By-election : ଘାସିରାମଙ୍କୁ ପ୍ରାର୍ଥୀ ଘୋଷଣା କଲା କଂଗ୍ରେସ, ବୈଠକ ଡାକି ଚୂଡ଼ାନ୍ତ କଲେ ନବୀନ

ନୂଆପଡ଼ା ବିଧାନସଭା ଆସନରେ ଉପନିର୍ବାଚନ ପାଇଁ ତାରିଖ ଘୋଷଣାର ଦିନକ ଭିତରେ କଂଗ୍ରେସ ନିଜର ପ୍ରାର୍ଥୀଙ୍କ ନାଁ ଘୋଷଣା କରିଛି। ନୂଆପଡ଼ା ଜିଲ୍ଲା ସଭାପତି ଘାସିରାମ ମାଝୀଙ୍କୁ ଦଳ ଉପନିର୍ବାଚନ ମଇଦାନରେ ଓହ୍ଲାଇବ । ଅନ୍ୟ ଦୁଇ ପ୍ରମୁଖ ଦଳ ବିଜେଡି ଓ ବିଜେପି ତୁଳନାରେ କଂଗ୍ରେସ ଆଗୁଆ ପ୍ରାର୍ଥୀ ଘୋଷଣା କରି ନିର୍ବାଚନୀ ପ୍ରଚାରକୁ ଜୋରଦାର ପାଇଁ ରଣନୀତି ପ୍ରସ୍ତୁତ କରିଛି । ବିଜେଡି ନିଜର ପ୍ରାର୍ଥୀ ଭାବେ ଦିବଂଗତ ବିଧାୟକ ରାଜେନ୍ଦ୍ର ଢ଼ୋଲକିଆଙ୍କ ପୁଅ ଜୟଙ୍କୁ ପ୍ରାର୍ଥୀ କରିବା ପ୍ରାୟତଃ ଚୂଡ଼ାନ୍ତ ଥିବାବେଳେ ବିଜେପି କାହାକୁ ପ୍ରାର୍ଥୀ କରିବ ତାକୁ ନେଇ ସସପେନ୍ସ ଲାଗି ରହିଛି ।

ଘାସିରାମ ମାଝୀ କଂଗ୍ରେସ ପ୍ରାର୍ଥୀ

ପିସିସି ପକ୍ଷରୁ ଜାରି ସୂଚନା ଅନୁସାରେ ପ୍ରଦେଶ କଂଗ୍ରେସ ସଭାପତି ଭକ୍ତଚରଣ ଦାସ ଓ ରାଜନୀତିକ ବ୍ୟାପାର କମିଟିର ସର୍ବସମ୍ମତି ପ୍ରସ୍ତାବ ଉପରେ ମଙ୍ଗଳବାର ଏଆଇସିସି ମୋହର ମାରିଛି । କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କ ଅନୁମୋଦନ ପରେ ଏଆଇସିସି ପକ୍ଷରୁ ଜାରି ପ୍ରେସ୍ ରିଲିଜରେ ଘାସିରାମ ମାଝୀ ନୂଆପଡ଼ା ଉପନିର୍ବାଚନରେ ଦଳୀୟ ପ୍ରାର୍ଥୀ ହେବେ ବୋଲି ସୂଚନା ଦିଆଯାଇଛି । ୨୦୨୪ ସାଧାରଣ ନିର୍ବାଚନକୁ ମିଶାଇଲେ ଶ୍ରୀ ମାଝୀ ନୂଆପଡ଼ା ବିଧାନସଭା ଆସନରୁ ୩ଥର ଲଢ଼ି ପରାଜିତ ହୋଇଛନ୍ତି । ୨୦୧୪ ଓ ୨୦୧୯ରେ ସେ କଂଗ୍ରେସ ପ୍ରାର୍ଥୀ ଥିବାବେଳେ ୨୦୨୪ରେ ସ୍ୱାଧୀନ ପ୍ରାର୍ଥୀ ଭାବେ ଲଢ଼ି ୫୦୯୪୧ଖଣ୍ଡ ଭୋଟ୍ ପାଇଁ ଦ୍ୱିତୀୟ ସ୍ଥାନରେ ଥିଲେ । (Nuapada by-election) ନୂଆପଡ଼ା ଉପନିର୍ବାଚନକୁ ଦୃଷ୍ଟିରେ ରଖି ପିସିସି ସଭାପତି ଶ୍ରୀ ଦାସ ୪ଦିନ ଧରି ନୂଆପଡ଼ାରେ ଡେରା ପକାଇଛନ୍ତି ।

ବିଜେଡିରୁ ଜୟ ଓ ବିଜେପିରୁ କିଏ

ସୂତ୍ର ଅନୁସାରେ,ବିଜେଡି ପ୍ରାର୍ଥୀ ଭାବେ ଦିବଂଗତ ବିଧାୟକ ଜୟ ଢ଼ୋଲକିଆ ମଇଦାନକୁ ଓହ୍ଲାଇବା ପ୍ରାୟତଃ ଚୂଡ଼ାନ୍ତ ହୋଇଛି । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ନୂଆଦିଲ୍ଲୀସ୍ଥିତ ବାସଭବନରେ ଗତ ଶୁକ୍ରବାର(୩ତାରିଖ) ଦଳର ବରିଷ୍ଠ ନେତାମାନଙ୍କ ଉପସ୍ଥିତିରେ ଜୟଙ୍କୁ ଦଳ ପ୍ରାର୍ଥୀ କରିବାର ନିଷ୍ପତ୍ତି ନେଇଛି । ଅବଶ୍ୟ ପୂର୍ବରୁ ଜୟଙ୍କୁ ପ୍ରାର୍ଥୀ କରାଯିବା ନେଇ ସଙ୍କେତ ଦିଆଯାଇଥିଲା । ମାତ୍ର ୩ତାରିଖରେ ଦଳର ବରିଷ୍ଠ ନେତା ଦେବୀପ୍ରସାଦ ମିଶ୍ର, ନିରଞ୍ଜନ ପୂଜାରୀ, ପ୍ରଣବ ପ୍ରକାଶ ଦାସ ଓ ଜୟଙ୍କୁ ନୂଆଦିଲ୍ଲୀ ଡାକି ନୂଆପଡ଼ା ଉପନିର୍ବାଚନ ପ୍ରସଙ୍ଗରେ ନବୀନ ଆଲୋଚନା କରିଛନ୍ତି । ନବୀନ ଆସନ୍ତା ୩-୪ଦିନ ମଧ୍ୟରେ ଭୁବନେଶ୍ୱର ଫେରିବେ ବୋଲି ସୂଚନା ମିଳିଛି । ବିଜେଡି ମଧ୍ୟ ନୂଆପଡ଼ା ଉପନିର୍ବାଚନରେ ୪୦ରୁ ୫୦ହଜାର ଭୋଟ ବ୍ୟବଧାନରେ ଜିତିବ ବୋଲି ଦଳର ନେତ୍ରୀ ପ୍ରମିଳା ମଲ୍ଲିକ ଦମ୍ଭୋକ୍ତି ବାଢ଼ିଛନ୍ତି ।

 ଏପଟେ ଶାସକ ବିଜେପି ନିଜର କାର୍ଡ ଖୋଲିନଥିବାବେଳେ ଦଳର ରାଜ୍ୟ ସହପ୍ରଭାରୀ ଲତା ଉସେଣ୍ଡି କହିଛନ୍ତି ଯେ, ୨୦୨୪ ସାଧାରଣ ନିର୍ବାଚନ ଭଳି ନୂଆପଡ଼ାରେ ମଧ୍ୟ ବିଜେପିକୁ ଲୋକେ ଆଶୀର୍ବାଦ କରିବେ । ପ୍ରାର୍ଥୀ କିଏ ହେବ ତାହା ଦଳ ଭିତରେ ଆଲୋଚନା ପରେ ଘୋଷଣା ହେବ । ଚୟନ କମିଟି ହିଁ ଏହି ନିଷ୍ପତ୍ତି ନେବ । ସେହିପରି ବିଜେପି ରାଜ୍ୟ ସଭାପତି ମନମୋହନ ସାମଲ କହିଛନ୍ତି ଯେ, ଫଳାଫଳ କ’ଣ ହେବ ଲୋକେ ନିର୍ଣ୍ଣୟ କରିବେ । ନବୀନ ପଟ୍ଟନାୟକଙ୍କ ପଦଯାତ୍ରାର ଫରକ କ’ଣ ପଡ଼ିବ କି ନାହିଁ ତାହା ସାଧାରଣ ଲୋକେ ବିଚାର କରିବେ । କେନ୍ଦ୍ରରେ ୧୧ବର୍ଷ ଓ ରାଜ୍ୟରେ ୧୫ମାସରେ ଆମେ କ’ଣ କରିଛୁ ତାହା କହିବୁ । ବିଜେଡି ୨୪ବର୍ଷ ଓ କଂଗ୍ରେସ ୪୦ବର୍ଷ ଭିତରେ କ’ଣ କରିଛି କହିବେ ବୋଲି ଶ୍ରୀ ସାମଲ କହିଛନ୍ତି ।

ସୂଚନାଯୋଗ୍ୟ, ସେପ୍ଟେମ୍ବର ୮ରେ ନୂଆପଡ଼ାର ବିଜେଡି ବିଧାୟକ ରାଜେନ୍ଦ୍ର ଢ଼ୋଲକିଆଙ୍କ ମୃତ୍ୟୁ ପରେ ସେଠାରେ ଉପନିର୍ବାଚନ ହେଉଛି । ଆସନ୍ତା ନଭେମ୍ବର ୧୧ତାରିଖରେ ସେଠାରେ ଭୋଟଗ୍ରହଣ ହେବ । ଅକ୍ଟୋବର ୧୩ତାରିଖରେ ଉପନିର୍ବାଚନ ପାଇଁ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇବା ପରେ ୨୦ତାରିଖ ପର୍ଯ୍ୟନ୍ତ ନାମାଙ୍କନ ପତ୍ର ଦାଖଲ ପ୍ରକ୍ରିୟା ଜାରି ରହିବ ।