ବିଜେଡି ସରକାର ସମୟରେ ସବୁ ଆଇନକୁ ମୋଡ଼ିମକଚି ନିଜର ପ୍ରତିନିଧିମାନଙ୍କୁ ବିଭିନ୍ନ ସମବାୟ ସଂସ୍ଥାର ସଭାପତି ପଦରେ ଆସୀନ କରିବା ଏବେ ମହଙ୍ଗା ପଡ଼ୁଛି । ମିଛ ତଥ୍ୟ ଦେଇ ସଭାପତି ହୋଇଥିବା ଅଭିଯୋଗରେ ବିଶ୍ୱରଞ୍ଜନ ମହାନ୍ତିଙ୍କୁ ଆଜି ଓଡ଼ିଶା ଗୃହନିର୍ମାଣ ସମବାୟ ନିଗମ ସଭାପତି ପଦରୁ ଅଯୋଗ୍ୟ ଘୋଷଣା କରାଯିବା ସହ ନିଗମର ପରିଚାଳନା କମିଟିକୁ ମଧ୍ୟ ନିଲମ୍ବନ କରାଯାଇଛି । ଏହାସହିତ ତତ୍କାଳ ପ୍ରଭାବରୁ ସମବାୟ ବିଭାଗର ଅତିରିକ୍ତ ସଚିବ ଶୁଭ୍ରା ମହାନ୍ତିଙ୍କୁ ନିଗମର ପ୍ରଶାସକ ଭାବେ ନିଯୁକ୍ତି ମିଳିଛି । ଓଡ଼ିଶା ସମବାୟ ସୋସାଇଟି ଆଇନ-୧୯୬୨ର ଧାରା ୩୨(୭) ପ୍ରାବଧାନରେ ପ୍ରଦତ୍ତ କ୍ଷମତାର ଉପଯୋଗ କରି ରାଜ୍ୟ ସମବାୟ ରେଜିଷ୍ଟ୍ରାର ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଥିବା ଜଣାପଡ଼ିଛି ।
ରାଜ୍ୟ ସମବାୟ ସୋସାଇଟି ରେଜିଷ୍ଟ୍ରାରଙ୍କ କାର୍ଯ୍ୟାଳୟ ପକ୍ଷରୁ ଜାରି ନିର୍ଦ୍ଦେଶନାମା ଅନୁସାରେ, ଓଡ଼ିଶା ଗୃହନିର୍ମାଣ ସମବାୟ ନିଗମର ସଭାପତିଙ୍କର ୩ଟି ସନ୍ତାନ ଅଛନ୍ତି । ଆଉ ସେ ଭୁଲ୍ ତଥ୍ୟ ଦେଇ ଏହି ପଦକୁ ହାତେଇଥିଲେ । ଏନେଇ ୨୦୨୨ ଅକ୍ଟୋବର ୧୦ତାରିଖରେ ଲକ୍ଷ୍ମୀସାଗର ଥାନାରେ ୪୨୦ ଦଫାରେ ଏକ ମାମଲା ରୁଜୁ ହୋଇଥିଲା । ଚଳିତବର୍ଷ ଜୁଲାଇ ୨୩ତାରିଖରେ ଲକ୍ଷ୍ମୀସାଗର ଥାନା ଏଏସଆଇ ଏ ନେଇ ତଥ୍ୟ ଦେଇଛନ୍ତି ।
ଯାହାକି ସଭାପତି ଜାଲ୍ ତଥ୍ୟ ଦେଇଥିବାକୁ ପ୍ରମାଣିତ କରୁଛି । ଓଡ଼ିଶା ସମବାୟ ସୋସାଇଟି ଆଇନ-୧୯୬୨ର ଧାରା ୨୮(୩-ପି) ପ୍ରାବଧାନ ଆଧାରରେ ସଭାପତି ଅଯୋଗ୍ୟ ହୋଇଥିଲେ ମଧ୍ୟ ସେ ପରିଚାଳନା କମିଟିର ଅନୁମୋଦନ ଆଧାରରେ କାର୍ଯ୍ୟ ଜାରି ରଖିଥିଲେ । କେବଳ ସେତିକି ନୁହେଁ, ଧଉଳି ହାଇଟସ୍ ପ୍ରକଳ୍ପକୁ ନେଇ ଅନିୟମିତତାର ଅଭିଯୋଗ ମଧ୍ୟ ରହିଛି । ଏସବୁ କାରଣକୁ ଦୃଷ୍ଟିରେ ରଖି ରାଜ୍ୟ ସମବାୟ ସୋସାଇଟି ରେଜିଷ୍ଟ୍ରାର ପ୍ରଭୁ କଲ୍ୟାଣ ପଟ୍ଟନାୟକ ଆଜି ଓଡ଼ିଶା ଗୃହନିର୍ମାଣ ସମବାୟ ନିଗମର ପରିଚାଳନା କମିଟିକୁ ନିରସ୍ତ୍ର ଘୋଷଣା କରିଛନ୍ତି । ତତ୍କାଳ ପ୍ରଭାବରୁ ରାଜ୍ୟ ସରକାର ଏହି ନିଗମକୁ ନିଜ ହାତକୁ ନେଇଛନ୍ତି । ସମବାୟ ବିଭାଗର ଅତିରିକ୍ତ ସଚିବ ଶୁଭ୍ରା ମହାନ୍ତିଙ୍କୁ ଓଡ଼ିଶା ଗୃହନିର୍ମାଣ ସମବାୟ ନିଗମର ପ୍ରଶାସକ ଭାବେ ନିଯୁକ୍ତି ଦିଆଯାଇଛି।
ବେଆଇନ ଭାବେ ପଦବୀ ହାତେଇବା ଓ ଅନିୟମିତତା ଆଦି ଅଭିଯୋଗରେ ରାଜ୍ୟ ସମବାୟ ରେଜିଷ୍ଟ୍ରାର ଆଜି ରାଜ୍ୟ ସମବାୟ ବ୍ୟାଙ୍କ ପରିଚାଳନା ବୋର୍ଡ ଓ ଓଡ଼ିଶା ଗୃହନିର୍ମାଣ ସମବାୟ ନିଗମର ପରିଚାଳନା କମିଟିକୁ ନିରସ୍ତ୍ର କରିବା ପରେ ତତ୍କାଳ ପ୍ରଭାବରୁ ଏହି ଦୁଇ ସଂସ୍ଥାକୁ ରାଜ୍ୟ ସରକାର ନିଜ ହାତକୁ ନେଇଛନ୍ତି।