ଇଭିଏମ୍ ପ୍ରସଙ୍ଗରେ କଂଗ୍ରେସର ସାଥ ଦେଲେନି ଓମାର ଅବଦୁଲ୍ଲା

ମହାରାଷ୍ଟ୍ରରେ ଇଣ୍ଡିଆ ମେଣ୍ଟର ଶୋଚନୀୟ ପରାଜୟ ପରେ ଇଭିଏମ୍ ଉପରେ ଦୋଷ ଲଦିଛନ୍ତି ବିରୋଧୀ। ସମାନ ଭାବରେ ହରିୟାଣାରେ କଂଗ୍ରେସର ଅପ୍ରତ୍ୟାଶିତ ପରାଜୟର କାରଣ ମଧ୍ୟ ସେମାନେ ଇଭିଏମ୍ ବୋଲି ଅଭିଯୋଗ କରିଥିଲେ। ବାଲାଟ ପେପର ମାଧ୍ୟମରେ ଭୋଟ୍ କରାଇବାକୁ ବାରମ୍ବାର ଦାବି କରୁଛନ୍ତି ବିରୋଧୀ। ତେବେ ଇଭିଏମ୍ ପ୍ରସଙ୍ଗରେ ଖୋଦ ଇଣ୍ଡିଆ ମେଣ୍ଟରେ ଏବେ ଅସହମତି ଦେଖା ଦେଇଛି। ଏହି ପ୍ରସଙ୍ଗରେ କଂଗ୍ରେସକୁ ସମାଲୋଚନା କରିଛନ୍ତି ଜମ୍ମୁ-କଶ୍ମୀର ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା।

ଜମ୍ମୁ-କଶ୍ମୀର ମୁଖ୍ୟମନ୍ତ୍ରୀ ତଥା କଂଗ୍ରେସର ସହଯୋଗୀ ନ୍ୟାସନାଲ କନଫରେନ୍ସ ଉପାଧ୍ୟକ୍ଷ ଓମାର ଅବଦୁଲ୍ଲା ଏକ ଜାତୀୟ ଗଣମାଧ୍ୟମକୁ ଦେଇଥିବା ଏକ ସାକ୍ଷାତକାରରେ କହିଛନ୍ତି ଯେ ଆଶା ଅନୁଯାୟୀ ଫଳାଫଳ ନମିଳିଲେ କେବଳ ଇଭିଏମ୍ ଉପରେ ପ୍ରଶ୍ନ ଉଠାଇବା ଭୁଲ୍। ସେ କହିଛନ୍ତି ଯେ ସେହି ଇଭିଏମ୍ ସାହାଯ୍ୟରେ ସଂସଦରେ ଶହେରୁ ଅଧିକ ସଦସ୍ୟ ପାଇଛି କଂଗ୍ରେସ ଏବଂ ଏହାକୁ ନିଜ ଦଳର ବିଜୟ ଭାବରେ ପାଳନ କରୁଛି। ତେଣୁ କିଛି ମାସ ପରେ ଅନ୍ୟ ନିର୍ବାଚନ ଫଳାଫଳ ଆଶାନୁରୂପ ନହେବାରୁ ସେହି ଇଭିଏମକୁ ଦାୟୀ କରିବା ଉଚିତ ନୁହେଁ। ଯେତେବେଳେ କଂଗ୍ରେସର ଇଭିଏମ୍ ଅଭିଯୋଗ ଉପରେ ବିଜେପିର ପ୍ରତିକ୍ରିୟା ସହ ସେ ସହମତ କି ବୋଲି ପଚରାଯାଇଥିଲା, ଅବଦୁଲ୍ଲା କହିଛନ୍ତି ଯେ ସେ କାହା ସହ ସହମତ ବା ଅସହମତ ନୁହନ୍ତି, ଯାହା ଠିକ୍ ତାହା ଠିକ୍ ବୋଲି ସେ କହିଛନ୍ତି।

ସେ କହିଛନ୍ତି ଯେ ଯଦି ଆପଣଙ୍କର ଇଭିଏମକୁ ନେଇ କିଛି ସମସ୍ୟା ଅଛି, ତେବେ ଆପଣ ସେହି ସମସ୍ୟା ପ୍ରତି କ୍ରମାଗତ ଧ୍ୟାନ ଦେବା ଉଚିତ୍। ଯେତେବେଳେ ଜିତୁଛନ୍ତି ସେଠାରେ ଆପଣ ବିଜୟ ଉତ୍ସବ ପାଳୁଛନ୍ତି, ଆଉ ହାରିଗଲେ ଇଭିଏମ୍ ଉପରେ ପ୍ରଶ୍ନ ଉଠାଉଛନ୍ତି, ଏହା ଅନୁଚିତ। ସେ କହିଛନ୍ତି ଯଦି ଭୋଟ୍ ବ୍ୟବସ୍ଥାରେ କୌଣସି ଦଳର ଭରସା ନାହିଁ, ତେବେ ସେମାନେ ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିବା ଉଚିତ୍ ନୁହେଁ। ଲୋକସଭା ନିର୍ବାଚନରେ ​​ପରାଜୟ ଏବଂ କିଛି ମାସ ପରେ ବିଧାନସଭା ନିର୍ବାଚନରେ ​​ତାଙ୍କ ଦଳର ବଡ ବିଜୟର ଉଦାହରଣ ଦେଇ ସେ କହିଛନ୍ତି, "ଥରେ ଭୋଟରମାନେ ଆପଣଙ୍କୁ ବାଛନ୍ତି, ଆଉ ଥରକୁ ସେମାନେ ଆପଣଙ୍କୁ ବାଛି ନପାରନ୍ତି। ହେଲେ ମୁଁ କେବେ ଇଭିଏମକୁ ଦାୟୀ କରି ନାହିଁ।"