ବିଜେଡି ପୋଷ୍ଟରରେ ବିଜୁବାବୁଙ୍କ ସ୍ଥାନ ହାଇଜାକ୍ କଲେଣି ପାଣ୍ଡିଆନ: ପିସିସି ପ୍ରଭାରୀ

ବିଜୁବାବୁଙ୍କ ନାଁରେ ଗଢ଼ା ଯାଇଥିବା ଦଳ ବିଜେଡିର ପୋଷ୍ଟରରୁ ଏବେ ବିଜୁ ପଟ୍ଟନାୟକଙ୍କ ଫଟୋଚିତ୍ର ଗାଏବ ହୋଇଗଲାଣି । ପ୍ରଶାସକରୁ ରାଜନେତା ପାଲଟିଥିବା ଭିକେ ପାଣ୍ଡିଆନ ଏବେ ସେହି ସ୍ଥାନକୁ ହାଇଜାକ୍ କରିନେଲେଣି । ବିଜେଡି ପୋଷ୍ଟରରେ ଏବେ ବିଜୁବାବୁଙ୍କ ଫଟୋ ବଦଳରେ ପାଣ୍ଡିଆନଙ୍କ ଫଟୋ ଲାଗୁଛି । ଆଉ କିଛିଦିନ ପରେ ଯଦି ନବୀନ ପଟ୍ଟନାୟକଙ୍କ ଫଟୋ ବି ବିଜେଡି ପୋଷ୍ଟରରୁ ଗାଏବ ହୋଇଯିବ । ଆଜି ଏମିତି କିଛି ଢଙ୍ଗରେ ବିଜେଡିର ଦ୍ୱିତୀୟ ସର୍ବେସର୍ବା ଭିକେ ପାଣ୍ଡିଆନଙ୍କୁ ଟାର୍ଗେଟ୍ କରିଛନ୍ତି କଂଂଗ୍ରେସର ଓଡ଼ିଶା ପ୍ରଭାରୀ ଅଜୟ କୁମାର ।

ଆଜି ଏଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ପିସିସି ପ୍ରଭାରୀ ଅଜୟ କୁମାର କଡ଼ା ଭାଷାରେ ବିଜେଡିକୁ କଟାକ୍ଷ କରି କହିଛନ୍ତି ଯେ, ଦିବଂଗତ ବିଜୁବାବୁଙ୍କୁ ଓଡ଼ିଶାବାସୀ ସମ୍ମାନ ଓ ଭଲପାଆନ୍ତି । ବିଜେଡି ପୋଷ୍ଟରରୁ ବିଜୁବାବୁଙ୍କ ହଟାଇ ଦିଆଯିବା ଓଡ଼ିଆ ଅସ୍ମିତା ପ୍ରତି କୁଠାରଘାତ । ଯଦି ବିଜୁବାବୁଙ୍କ ଫଟୋକୁ ବିଜେଡି ପୋଷ୍ଟରରୁ ହଟାଇ ଦିଆଯାଉଛି ତା’ହେଲେ ଓଡ଼ିଆ ଅସ୍ମିତା କେଉଁଠି ଅଛି । ଓଡ଼ିଶା କେବଳ ଓଡ଼ିଆଙ୍କର । ଆମେ ବିରୋଧୀ ଦଳରେ ଥାଇ ବି ବିଜୁବାବୁଙ୍କ ପ୍ରତି ସମ୍ମାନବୋଧ ରହିଛି । ବିଜୁବାବୁଙ୍କ ଫଟୋକୁ ହଟାଯିବା ଆମକୁ ବି ଆଘାତ ଦେଇଛି । ବିଜୁବାବୁ ଓଡ଼ିଶା ସୁଯୋଗ୍ୟ ସନ୍ତାନ । ସେହି ମହାନ ନେତାଙ୍କୁ ବ୍ୟକ୍ତିଗତ ଭାବେ ଭେଟିବାର ସୁଯୋଗ ସେ ଥରେ ପାଇଛନ୍ତି । ପାଟନାରେ ବିରୋଧୀ ଦଳଗୁଡ଼ିକର ରାଲିରେ ସେ ବିଜୁବାବୁଙ୍କୁ ଭେଟିଥିଲେ ବୋଲି ଶ୍ରୀ କୁମାର କହିଛନ୍ତି ।

ସେ ଆହୁରି ମଧ୍ୟ କହିଛନ୍ତି ଯେ, ଗତ କିଛିଦିନ ମଧ୍ୟରେ ସେ ଓଡ଼ିଶାରେ ପ୍ରାୟ ୧୧୦୦କିମି ବୁଲିଲେଣି । ବିଜୁବାବୁଙ୍କ ଫଟୋ ବିଜେଡି ପୋଷ୍ଠରରୁ ବାଦ୍ ଦିଆଯାଇ ପାଣ୍ଡିଆନଙ୍କ ଫଟୋ ଲାଗିଥିବାର ସ୍ଥିତି ଚାରିଆଡ଼େ ଦେଖିବାକୁ ମିଳିଲା । ଯଦି ଆଗାମୀ ଦିନରେ ବିଜେଡି ସଭାପତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଫଟୋ ବଦଳରେ କେବଳ ପାଣ୍ଡିଆନଙ୍କ ଫଟୋ ବିଜେଡି ପୋଷ୍ଟରରେ ରୁହେ ତାହା ତାଙ୍କୁ ଆଶ୍ଚର୍ଯ୍ୟ କରିବ ନାହିଁ ବୋଲି ସେ କଟାକ୍ଷ କରିଛନ୍ତି ।

ବିଜୁବାବୁଙ୍କ ଫଟୋକୁ କାଢ଼ି ପାଣ୍ଡିଆନଙ୍କ ଫଟୋକୁ ପୋଷ୍ଟରରେ ସ୍ଥାନ ଦିଆଯିବାକୁ ଓଡ଼ିଶାର ଲୋକେ କଦାପି ଗ୍ରହଣ କରିବେ ନାହିଁ । ଓଡ଼ିଶା ଓ ଓଡ଼ିଆଙ୍କ ସ୍ୱାଭିମାନ-ଅସ୍ମିତା ହେଉଛି କଂଗ୍ରେସ ପାଇଁ ଗୁରୁତ୍ୱପୂର୍ଣ୍ଣ । ବିଜେଡି ପୋଷ୍ଟରରେ ମହାନ ଜନନେତା ବିଜୁବାବୁଙ୍କୁ ଏଭଳି ଅଣଦେଖା ଓ ଅସମ୍ମାନ ଆମକୁ ବ୍ୟଥିତ କରିଛି ବୋଲି ସେ କହିଛନ୍ତି ।

ଏହି ସାମ୍ବାଦିକ ସମ୍ମିଳନୀରେ ପିସିସି ସହପ୍ରଭାରୀ ଖ୍ରୀଷ୍ଟୋଫର ତିଲକ, ପୂର୍ବତନ ପିସିସି ସଭାପତି ଜୟଦେବ ଜେନା, ପିସିସି ପ୍ରଚାର କମିଟି ଅଧ୍ୟକ୍ଷ ବିଜୟ ପଟ୍ଟନାୟକ, ପିସିସି ମିଡିଆ ସେଲ୍ ମୁଖ୍ୟ ବିଶ୍ୱରଞ୍ଜନ ମହାନ୍ତି ପ୍ରମୁଖ ଉପସ୍ଥିତ ଥିଲେ ।