ଜାଣନ୍ତୁ, କାନାଡା ବହିଷ୍କାର କରିଥିବା ଭାରତୀୟ କୁଟନୀତିଜ୍ଞ କିଏ ?

ଖଲିସ୍ତାନୀ ଆତଙ୍କବାଦୀଙ୍କ ହତ୍ୟା ଘଟଣାକୁ ନେଇ ଭାରତ ଓ କାନାଡା ମଧ୍ୟରେ ସମ୍ପର୍କ ତିକ୍ତ ହେବାକୁ ଲାଗିଥିବା ବେଳେ ଭାରତର କୁଟନୀତିଜ୍ଞଙ୍କୁ ଦୁଇ ଦିନ ପୂର୍ବେ ବହିଷ୍କାର କରି ସାରିଛି କାନାଡା। ତେବେ ଏହି କୁଟନୀତିଜ୍ଞ କିଏ ତାହା ଜାଣିବାକୁ ସମସ୍ତେ ବ୍ୟଗ୍ର ଥିବା ବେଳେ ଏବେ ତାହା ଉପରୁ ପରଦା ହଟିଛି। ଏହି ଅଧିକାରୀଜଣକ ପଞ୍ଜାବ କ୍ୟାଡରର ଆଇପିଏସ୍‌ ଅଫିସର ପବନ କୁମାର ରାୟ ବୋଲି ଜଣାଯାଇଛି।

ପବନ କାନାଡାରେ ଥିବା ଭାରତ ଦୂତାବାସରେ ମୁଖ୍ୟ ଭାବେ ନିଯୁକ୍ତ ହୋଇଥିଲେ। ମାତ୍ର କାନାଡା ପ୍ରଧାନମନ୍ତ୍ରୀ ଖଲିସ୍ତାନୀ ଆତଙ୍କବାଦୀ ହରଦୀପ ସିଂ ନିଜ୍ଜରଙ୍କ ହତ୍ୟା ପାଇଁ ଭାରତକୁ ଦାୟୀ କରି କାନାଡା ଭାରତୀୟ କୁଟନୀତିଜ୍ଞ ପବନ କୁମାର ରାୟଙ୍କୁ ବହିଷ୍କାର କରି ଦେଇଛି।

ପବନ କୁମାର ୧୯୯୭ ମସିହା ବ୍ୟାଚ ପଞ୍ଜାବ କ୍ୟାଡରର ଆଇପିଏସ୍‌ ଅଫିସର ହୋଇଥିବା ବେଳେ ୨୦୧୦ ମସିହାରୁ କେନ୍ଦ୍ରକୁ ଡେପୁଟେସନରେ ଯାଇଥିଲେ। ୨୦୧୮ ଡିସେମ୍ବର ମାସରେ ତାଙ୍କୁ ଭାରତର ବର୍ହିବ୍ୟାପାର ମନ୍ତ୍ରାଳୟ (MEA)ରେ ଜଏଣ୍ଟ ସେକ୍ରେଟାରୀ ଭାବେ ନିଯୁକ୍ତ କରାଗଲା। ଏଥିସହ ସେ କିଛି ବର୍ଷ କ୍ୟାବିନେଟ ସେକ୍ରେଟେରୀଏଟର ନିର୍ଦ୍ଦେଶକ ଭାବେ କାମ କରିଛନ୍ତି ।

ବ୍ରିଟିଶ କଲମ୍ବୋଆରେ ଗୁଳିକାଣ୍ଡର ଶିକାର ହୋଇ ହରଦୀପ ସିଂ ନିଜ୍ଜରଙ୍କ ମୃତ୍ୟୁ ହୋଇଥିବା ବେଳେ ଏହି ଘଟଣାରେ କାନାଡା ପୁଲିସ୍‌ ଭାରତକୁ ଦାୟୀ କରିଥିବା ବେଳେ କୌଣସି ଗିରଫଦାରୀ କରି ନାହିଁ। ମାତ୍ର ଭାରତର କୁଟନୀତିଜ୍ଞଙ୍କୁ ବହିଷ୍କାର କରି ଜଷ୍ଟିନ ଟ୍ରୁଡେ କାନାଡାରେ ଥିବା ଖଲିସ୍ତାନୀ ନେତାଙ୍କୁ ଖୁସି କରିବାକୁ ଚେଷ୍ଟା କରୁଥିବା ସେଠାରେ ରହିଥିବା ଭାରତୀୟ ପ୍ରକାଶ କରିଛନ୍ତି।