ନିଜର ଜନ୍ମଦିନରେ ଆସନ୍ତାକାଲି ଓଡ଼ିଶା ଗସ୍ତରେ ଆସୁଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭୁବନେଶ୍ୱରର ଗାଡ଼କଣ ବସ୍ତିକୁ ଯାଇ ବସ୍ତିବାସିନ୍ଦାଙ୍କ ସହ ଭାବବିନିମିୟ କରିବେ । ପ୍ରାୟ ଅଧଘଣ୍ଟାରୁ ଅଧିକ ସମୟ ପର୍ଯ୍ୟନ୍ତ ପ୍ରଧାନମନ୍ତ୍ରୀ ମୋଦି ଗାଡ଼କଣ ବସ୍ତିରେ ରହି ପ୍ରଧାନମନ୍ତ୍ରୀ ଆବାସ(ସହରାଂଚଳ)ର ହିତାଧିକାରୀ ଓ ସାଧାରଣ ବସ୍ତିବାସିନ୍ଦାଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିବାର କାର୍ଯ୍ୟକ୍ରମ ରହିଛି । ପ୍ରଧାନମନ୍ତ୍ରୀ ମୋଦି ଓଡ଼ିଶାରେ ମାତ୍ର ଅଢ଼େଇ ଘଂଟା ରହି ନୂଆଦିଲ୍ଲୀ ଫେରିଯିବାର କାର୍ଯ୍ୟକ୍ରମ ଥିବାବେଳେ ସେଥିରୁ ଅଧଘଂଟା ବସ୍ତିବାସିନ୍ଦାଙ୍କ ସହ ବିତାଇବେ ବୋଲି ଜଣାପଡ଼ିଛି । ପ୍ରଧାନମନ୍ତ୍ରୀ ମୋଦି ଆସନ୍ତାକାଲି ଜନତା ମଇଦାନରେ ବିଶାଳ ମହିଳା ସମାବେଶରେ ସାମିଲ ହୋଇ ରାଜ୍ୟ ସରକାରଙ୍କ ମହତ୍ୱାକାଂକ୍ଷୀ ‘ସୁଭଦ୍ରା’ ଯୋଜନାର ଶୁଭାରମ୍ଭ ସହ ବିଭିନ୍ନ ପ୍ରକଳ୍ପର ଲୋକାର୍ପଣ ଓ ଶିଳାନ୍ୟାସ କରିବାର କାର୍ଯ୍ୟକ୍ରମ ରହିଛି ।
ସୂଚନା ଅନୁସାରେ, ପ୍ରଧାନମନ୍ତ୍ରୀ ମୋଦି ବାୟୁସେନାର ଏକ ସ୍ୱତନ୍ତ୍ର ବିମାନରେ ଆସନ୍ତାକାଲି ଅହମ୍ମଦାବାଦରୁ ଆସି ସକାଳ ୧୦ଟା ୫୦ମିନିଟରେ ଭୁବନେଶ୍ୱର ବିମାନ ବନ୍ଦରରେ ପହଂଚିବା ପରେ କଡ଼ାସୁରକ୍ଷା ବଳୟ ମଧ୍ୟରେ ସିଧାସଳଖ ଗାଡ଼କଣ ବସ୍ତିକୁ ଯିବେ । ସେଠାରେ ୧୧ଟା ୧୦ରୁ ୧୧ଟା ୪୫ମିନିଟ୍ ପର୍ଯ୍ୟନ୍ତ ପ୍ରାୟ ୩୫ମିନିଟ୍ ଧରି ରହିବେ । ଗାଡ଼କଣ ବସ୍ତିରେ ପ୍ରଧାନମନ୍ତ୍ରୀ ଆବାସ-ସହରାଂଚଳର ହିତାଧିକାରୀଙ୍କ ସହ ବିଭିନ୍ନ କେନ୍ଦ୍ରୀୟ ଯୋଜନାର ସୁଫଳ ପାଇବା ଉପରେ ଆଲୋଚନା କରିବେ । ନିଜ ଜନ୍ମଦିନରେ ସେ ବସ୍ତିବାସିନ୍ଦାଙ୍କ ସହ ସମୟ ବିତାଇବେ । ପରେ ୧୧ଟା ୪୫ମିନିଟରେ ସେଠାରୁ ବାହାରି ଜନତା ମଇଦାନର ସଭାସ୍ଥଳକୁ ଯିବେ । ଜନତା ମଇଦାନରେ ରାଜ୍ୟ ଓ କେନ୍ଦ୍ର ସରକାରଙ୍କ ବିଭିନ୍ନ ପ୍ରକଳ୍ପର ଶିଳାନ୍ୟାସ ଲୋକାର୍ପଣ କରିବା ସହ ସାଧାରଣ ଲୋକଙ୍କୁ ସମ୍ବୋଧିତ କରିବେ । ଦିନ ୧ଟାରେ ପ୍ରଧାନମନ୍ତ୍ରୀ ମୋଦି ସଭାସ୍ଥଳ ଛାଡ଼ିବେ ଓ ୧ଟା ୨୦ମିନିଟରେ ଭୁବନେଶ୍ୱର ବିମାନବନ୍ଦରରୁ ନୂଆଦିଲ୍ଲୀ ଅଭିମୁଖେ ଗସ୍ତ କରିବାର କାର୍ଯ୍ୟକ୍ରମ ରହିଛି ।
ପ୍ରଧାନମନ୍ତ୍ରୀଙ୍କ ଗସ୍ତ ପାଇଁ ରାଜଧାନୀରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଆସନ୍ତାକାଲି ସକାଳ ସାଢ଼େ ୭ଟାରୁ ୩ଟା ପର୍ଯ୍ୟନ୍ତ ଜୟଦେବ ବିହାରରୁ ନାଲକୋ ଛକ ପର୍ଯ୍ୟନ୍ତ ରାସ୍ତାକୁ ପୁଲିସ ସମ୍ପୂର୍ଣ୍ଣ ସିଲ୍ କରିଦେଇଛି । କେବଳ ପ୍ରଧାନମନ୍ତ୍ରୀଙ୍କ କାର୍ଯ୍ୟକ୍ରମ ପାଇଁ ପାସ୍ ପାଇଥିବା ବ୍ୟକ୍ତିମାନଙ୍କୁ ଯିବାଆସିବା ପାଇଁ ଅନୁମତି ମିଳିବ ବୋଲି ପୁଲିସ କହିଛି ।