ବିଜେପି-ବିଜେଡି ସମ୍ଭାବ୍ୟ ମେଣ୍ଟକୁ ନେଇ ଚର୍ଚ୍ଚା ଲାଗି ରହିଛି। ଅବଶ୍ୟ ବିଜେପିର କିଛି ନେତା ମେଣ୍ଟ ବିରୋଧରେ ମତ ରଖିଛନ୍ତି। କିନ୍ତୁ ମେଣ୍ଟ ନେଇ ଆଲୋଚନା ଜାରି ରହିଛି।
ଏସବୁ ଭିତରେ ବିଜେଡିର ମାହାଙ୍ଗା ବିଧାୟକ ପ୍ରତାପ ଜେନା ଗୋଟିଏ ସାଧାରଣ ସଭାରେ ବଡ଼ ସଙ୍କେତ ଦେଇଛନ୍ତି। ୨୦୨୪ ଓଡ଼ିଶା ବିଧାନସଭା ନିର୍ବାଚନରେ ବିଧାୟକ ପ୍ରଶାନ୍ତ ବେହେରା ପୁଣିଥରେ ସାଲେପୁରରୁ ପ୍ରାର୍ଥୀ ହେବେ ବୋଲି ସେ ପରୋକ୍ଷରେ କହିଛନ୍ତି।
Also Read
ଶାସକ ଦଳ ବିଧିବଦ୍ଧ ଭାବେ ପ୍ରାର୍ଥୀ ତାଲିକା ଘୋଷଣା କରି ନଥିବା ବେଳେ ଜଣେ ବିଧାୟକ ଏପରି ସଙ୍କେତ ଦେବା ରାଜନୀତିକ ହଟଚମଟ ସୃଷ୍ଟି କରିଛି।
ସାଲେପୁରର ମାଳଶାସନରେ ଆୟୋଜିତ ଏକ ସାଧାରଣ ସଭାରେ ଶ୍ରୀ ଜେନା କହିଛନ୍ତି, ପ୍ରଶାନ୍ତ ବେହେରା ଏଥର ଏଠାରୁ ଅତିକମରେ ୫୦ ହଜାରରୁ ଅଧିକ ଭୋଟରେ ବିଜୟୀ ହୋଇ ବିଧାନସଭାକୁ ଯିବେ।
ସେ କହିଛନ୍ତି, “ନିର୍ବାଚନ ଆସୁଛି। ଆପଣମାନଙ୍କୁ ୫ ବର୍ଷ ତଳେ ମୁଁ ଆପଣମାନଙ୍କୁ ଗୋଟିଏ କଥା କହିଥିଲି। ଉକ୍ତ ଆକଳନ ସତ ହୋଇଥିଲା ବୋଲି ଆପଣମାନଙ୍କର ମନେ ଅଛି ତ? ଆଜି ମଧ୍ୟ ମୁଁ ଆପଣଙ୍କୁ ଆଉ ଗୋଟିଏ କଥା କହୁଛି। ଆପଣମାନେ ଏହାକୁ ଲେଖି ରଖନ୍ତୁ। ପ୍ରଶାନ୍ତ ବେହେରା ଏଠାରୁ ପୁଣିଥରେ ଅତିକମରେ ୫୦ ହଜାର ଭୋଟ ବ୍ୟବଧାନରେ ବିଜୟୀ ହୋଇ ଆସିବେ। ନିର୍ବାଚନ ପୂର୍ବରୁ ମୁଁ କହିଥିବା କଥାକୁ ଲେଖି ରଖନ୍ତୁ। ପ୍ରଶାନ୍ତ ବେହେରା ଆଗାମୀ ନିର୍ବାଚନରେ ପୁଣି ଜିତିବେ।”
ତେବେ ନିର୍ବାଚନ ପୂର୍ବରୁ ଏଭଳି ବୟାନ ଦେବା ଦଳୀୟ ଶୃଙ୍ଖଳ ଭଙ୍ଗ କରୁଛି ବୋଲି କଟକ ଜିଲ୍ଲା ବିଜେପି ସଭାପତି ପ୍ରକାଶ ବେହେରା କହିଛନ୍ତି। ପ୍ରକାଶ ବେହେରା ୨୦୧୯ରେ ବିଜେପି ଟିକେଟରୁ ସାଲେପୁରରୁ ନିର୍ବାଚନ ଲଢ଼ିଥିଲେ। କିନ୍ତୁ ତାଙ୍କୁ ପ୍ରଶାନ୍ତ ବେହେରାଙ୍କ ଠାରୁ ହାରିବାକୁ ପଡ଼ିଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
