ଶିଖ ସଂପ୍ରଦାୟକୁ ନେଇ କଂଗ୍ରେସ ସାଂସଦ ତଥା ବିରୋଧୀ ଦଳ ନେତା ରାହୁଲ ଗାନ୍ଧି ଦେଇଥିବା ବୟାନକୁ ବିଜେପି ତୀବ୍ର ସମାଲୋଚନା କରି ଚାଲିଛି। ଏହାକୁ ନେଇ ରାଜନୀତିକ ବିବାଦ ମଧ୍ୟ ଦେଖାଯାଇଛି। ଦିନକୁ ଦିନ ବିବାଦ ତେଜୁ ଥିବା ବେଳେ ପ୍ରଥମଥର ପାଇଁ ରାହୁଲ ଗାନ୍ଧି ଏହା ଉପରେ ପ୍ରତିକ୍ରିୟା ରଖିଛନ୍ତି।
ସେ ନିଜ ବୟାନକୁ ଡିଫେଣ୍ଡ କରିଛନ୍ତି ଓ ବିଜେପି ସବୁ ପ୍ରସଙ୍ଗ ଭଳି ଏଥର ମଧ୍ୟ ମିଥ୍ୟାର ପ୍ରଚାର କରୁଥିବା କହିଛନ୍ତି। ସୋଶାଲ ମିଡିଆ ପ୍ଲାଟଫର୍ମ ଏକ୍ସରେ ନିଜ ମତ ରଖି ରାହୁଲ ଗାନ୍ଧି କହିଛନ୍ତି, “ମୋର ଆମେରିକା ବୟାନକୁ ନେଇ ବିଜେପି ମିଛର ପ୍ରଚାର କରୁଛି। ଭାରତ ଓ ବିଦେଶରେ ରହୁଥିବା ମୋର ସମସ୍ତ ଶିଖ ଭାଇ ଭଉଣୀମାନଙ୍କୁ ଗୋଟିଏ ପ୍ରଶ୍ନ କରିବାକୁ ଚାହୁଁଛି।
ମୁଁ ଯାହା ବି କହିଛି, ସେଥିରେ କିଛି ଭୁଲ ଅଛି କି? ଭାରତ ଏମିତି ଏକ ଦେଶ ହେବା କଥା ନୁହେଁ କି ଯେଉଁଠାରେ ପ୍ରତିଟି ଶିଖ ଓ ପ୍ରତ୍ୟେକ ଭାରତୀୟ ସେମାନଙ୍କ ଧର୍ମକୁ ବିନା ଭୟରେ ଅନୁସରଣ କରିପାରିବେ?
ସବୁଥର ଭଳି ବିଜେପି ଏବେ ମିଛର ସାହାରା ନେଇଛି। ସେମାନେ ମୋତେ ଚୁପ କରିବାକୁ ଲାଗିପଡ଼ିଛନ୍ତି। କାରଣ ସେମାନେ ସତକୁ ଗ୍ରହଣ କରିବାକୁ ଚାହୁଁ ନାହାନ୍ତି। କିନ୍ତୁ ମୁଁ ସବୁବେଳେ ଭାରତକୁ ଦର୍ଶାଉ ଥିବା ମୂଲ୍ୟବୋଧ ସମ୍ପର୍କରେ ମତ ରଖିବି।”
ଭାରତରେ ଧାର୍ମିକ ସ୍ୱାଧୀନତା ସମ୍ପର୍କରେ ରାହୁଲ ଗାନ୍ଧି ଆମେରିକାରେ ମତ ରଖିଥିଲେ। ସେ କହିଥିଲେ ଯେ ଭାରତରେ ଶିଖମାନେ ପଗଡ଼ି ପିନ୍ଧି ପାରିବେ କି ନାହିଁ କିମ୍ବା କଡ଼ା ପିନ୍ଧି ପାରିବେ କି ନାହିଁ, ତା’କୁ ନେଇ ଲଢ଼େଇ ଚାଲିଛି।
The BJP has been spreading lies about my remarks in America.
— Rahul Gandhi (@RahulGandhi) September 21, 2024
I want to ask every Sikh brother and sister in India and abroad - is there anything wrong in what I have said? Shouldn't India be a country where every Sikh - and every Indian - can freely practice their religion… pic.twitter.com/sxNdMavR1X
ଜଣେ ଶିଖ ହିସାବରେ ଗୁରୁଦ୍ୱାରା ଯାଇ ପାରିବେ କି ନାହିଁ, ବର୍ତ୍ତମାନ ସେହି ଲଢ଼େଇ ଚାଲିଛି। ଏହି ଲଢ଼େଇ କେବଳ ଶିଖମାନଙ୍କ ପାଇଁ ନୁହେଁ, ସବୁ ଧର୍ମାବଲମ୍ବୀଙ୍କ କ୍ଷେତ୍ରରେ ଘଟୁଛି ବୋଲି ରାହୁଲ ମତ ରଖିଥିଲେ।
ଏପରି ବୟାନକୁ ବିଜେପି ପକ୍ଷରୁ ତୀବ୍ର ସମାଲୋଚନା କରାଯାଇଛି। ବିଦେଶରେ ଏପରି ଏକ ସମ୍ବେଦନଶୀଳ ପ୍ରସଙ୍ଗରେ ମତ ରଖିବା ଅତ୍ୟନ୍ତ ବିପଦଜନକ ପ୍ରଚାର ବୋଲି ବିଜେପି କହିଥିଲା।