OR 
ରାଜ୍ୟ ସରକାରଙ୍କ ବରିଷ୍ଠ ଅଧିକାରୀମାନଙ୍କ ଆମେରିକା ଗସ୍ତକୁ ନେଇ ବିରୋଧୀ ଦଳର ସମାଲୋଚନା ପରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ (ସଏମଓ) ପକ୍ଷରୁ ଆଜି ଗସ୍ତ ସଂକ୍ରାନ୍ତ ତଥ୍ୟର ସୂଚନା ଦିଆଯାଇଛି । ଆମେରିକାର ସିଲିକନ ଭ୍ୟାଲିଠାରେ ୯ଏକର ଜମିରେ ଗ୍ରାଣ୍ଡ ଜଗନ୍ନାଥ ମନ୍ଦିର କମ୍ପେ୍ଲକ୍ସ ଓ ସାଂସ୍କୃତିକ କେନ୍ଦ୍ର ନିର୍ମାଣର ଭିତ୍ତିପ୍ରସ୍ତର ସ୍ଥାପନ କାର୍ଯ୍ୟକ୍ରମରେ ଏହି ପ୍ରତିନିଧି ଦଳ ସାମିଲ ହୋଇଛନ୍ତି ବୋଲି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ କହିଛି । ତେବେ ଏହି ୭ଜଣିଆ ମନ୍ତ୍ରୀ ଓ ଅଫିସର ଦଳ କେବେ ଓଡ଼ିଶା ଛାଡ଼ିଲେ ଓ କେବେ ଫେରିବେ ତଥା ଆମେରିକାରେ ତାଙ୍କର ଅନ୍ୟ କ’ଣ ସବୁ କାର୍ଯ୍ୟକ୍ରମ ରହିଛି ସେ ନେଇ କିଛି ତଥ୍ୟ ଦେଇନାହିଁ ।
ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଦ୍ୱାରା ଆଜି ଜାରି ପ୍ରେସ୍ ରିଲିଜ୍ ଅନୁସାରେ, ସିଲିକନ୍ ଭ୍ୟାଲିଠାରେ ଏକ ଭବ୍ୟ ଜଗନ୍ନାଥ ମନ୍ଦିର ନିର୍ମାଣ ପାଇଁ ଆମେରିକା ଯାଇଥିବା ଓଡ଼ିଶାର ପ୍ରତିନିଧି ଦଳ ଆଜି ଭିତ୍ତିପ୍ରସ୍ତର ସ୍ଥାପନ କରିଛନ୍ତି । ପ୍ରବାସୀ ଓଡ଼ିଆଙ୍କୁ ଭେଟି ଆମେରିକା ଓ ଓଡ଼ିଶା ମଧ୍ୟରେ ସାମାଜିକ,ଅର୍ଥନୀତିକ ଓ ସାଂସ୍କୃତିକ ସମ୍ପର୍କକୁ ସୁଦୃଢ଼ କରିବା ପାଇଁ ଆଇଟି ମନ୍ତ୍ରୀ ତୁଷାରକାନ୍ତି ବେହେରାଙ୍କ ନେତୃତ୍ୱରେ ପ୍ରତିନିଧି ଦଳ ଗସ୍ତ କରିଛି । ପ୍ରତିନିଧି ଦଳରେ ଉନ୍ନୟନ ସଚିବ ଅନୁ ଗର୍ଗ, ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭିକେ ପାଣ୍ଡିଆନ, ଆଇଟି ସଚିବ ମନୋଜ ମିଶ୍ର ଏହି କାର୍ଯ୍ୟକ୍ରମରେ ଯୋଗ ଦେଇଛନ୍ତି । ଏହି ପ୍ରତିିନିଧି ଦଳ ସିଲିକନ ଭ୍ୟାଲି ଯାଇଥିଲେ ଓ ପ୍ରବାସୀ ଓଡ଼ିଆ ଲୋକମାନଙ୍କ ନିମନ୍ତ୍ରଣରେ ସେଠାରେ ଥିବା ଜଗନ୍ନାଥ ମନ୍ଦିରକୁ ଯାଇ ପୂଜାର୍ଚ୍ଚନା କରିଥିଲେ ।
Also Read
ପରେ ପ୍ରତିନିଧି ଦଳ ଗ୍ରାଣ୍ଡ ଜଗନ୍ନାଥ ମନ୍ଦିର କମ୍ପେ୍ଲକ୍ସ ଓ କଲଚରାଲ ସେଂଟର ନିର୍ମାଣ ପାଇଁ ୯ଏକର ବିଶିଷ୍ଟ ଏକ ସ୍ଥାନକୁ ଯାଇଥିଲେ, ଯେଉଁଠି ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା । ପ୍ରବାସୀ ଓଡ଼ିଆଙ୍କୁ ଓଡ଼ିଶା ସହ ସମ୍ପର୍କକୁ ଏହି କମ୍ପେ୍ଲକ୍ସ ଓ ସାଂସ୍କୃତିକ କେନ୍ଦ୍ର ଅଧିକ ସୁଦୃଢ଼ କରିବ । ଏହି ଅବସରରେ ମନ୍ତ୍ରୀ ଓ ବରିଷ୍ଠ ଅଧିକାରୀମାନେ ସେଠାରେ ବୃକ୍ଷରୋପଣ କରିବା ସହ ମନ୍ଦିର ପ୍ରକଳ୍ପର ସଫଳତା ପାଇଁ ସମସ୍ତ ପ୍ରକାରର ସହଯୋଗ ଯୋଗାଇ ଦିଆଯିବ ବୋଲି ପ୍ରସ୍ତାବ ଦେଇଛନ୍ତି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏହି ସୂଚନା ସହ ଫଟୋଚିତ୍ର ମଧ୍ୟ ପ୍ରଦାନ କରାଯାଇଛି ।
ମନ୍ତ୍ରୀ, ସଚିବଙ୍କ ବିଦେଶ ଗସ୍ତତେବେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ କାହିଁକି ଏହି ଗସ୍ତ ପୂର୍ବରୁ ଗଣମାଧ୍ୟମକୁ ସୂଚନା ଦେଲାନି ଓ ବିରୋଧୀ ଦଳଙ୍କ କଡ଼ା ସମାଲୋଚନା ଏବଂ ଗଣମାଧ୍ୟମରେ ଖବର ପ୍ରସାରଣ ପରେ ଏସବୁ ତଥ୍ୟ ଦେବାକୁ ଆଗେଇ ଆସିଲା ତାକୁ ନେଇ ପାୱାର କରିଡରରେ ଚର୍ଚ୍ଚା ।
ସୂଚନାଯୋଗ୍ୟ, ଏହି ଅଫିସର ଟିମଙ୍କ ଆମେରିକା ଗସ୍ତକୁ ନେଇ ଗତକାଲି ଓ ଆଜି ଉଭୟ ବିଜେପି ଓ କଂଗ୍ରେସ ପକ୍ଷରୁ କଡ଼ା ସମାଲୋଚନା ଜାରି ରହିଛି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
