ରାଜ୍ୟରେ ବିଜେପି ସରକାର ନିଜର ସଂକଳ୍ପପତ୍ର ଆଧାରରେ ଗରିବ ହିତାଧିକାରୀମାନଙ୍କୁ ମାସକୁ ୩ହଜାର ଟଙ୍କାର ସାମାଜିକ ସୁରକ୍ଷା ଭତ୍ତା ଯୋଗାଇ ଦେବେ। ଏନେଇ ଅର୍ଥ ବିଭାଗ ସହ ଆଲୋଚନା ପରେ ଭତ୍ତା ପରିମାଣ ବୃଦ୍ଧି କରାଯିବ ବୋଲି ରାଜ୍ୟ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ସୂଚନା ଦେଇଛନ୍ତି ।
ମନ୍ତ୍ରୀ ଶ୍ରୀ ଗଣ୍ଡ କହିଛନ୍ତି ଯେ, ରାଜ୍ୟରେ ବାର୍ଦ୍ଧକ୍ୟ, ବିଧବା ଓ ଭିନ୍ନକ୍ଷମ ଭତ୍ତା ପରିମାଣ ମାସକୁ ୩ହଜାର ଟଙ୍କା କରିବା ପାଇଁ ପଦକ୍ଷେପ ନିଆଯାଉଛି । ଏହି ଭତ୍ତା ପାଇଁ କେତେ ଟଙ୍କା ବଜେଟରେ ରହିଛି ସେନେଇ ଅର୍ଥ ବିଭାଗ ସହ ଆଲୋଚନା କରାଯିବ । ଅର୍ଥ ବିଭାଗର ମତାମତ ମିଳିବା ପରେ ଖୁବଶୀଘ୍ର ଭତ୍ତା ବୃଦ୍ଧି ନିଷ୍ପତ୍ତି ନିଆଯିବ ବୋଲି ମନ୍ତ୍ରୀ ଶ୍ରୀ ଗଣ୍ଡ କହିଛନ୍ତି ।
ସୂଚନା ଅନୁସାରେ, ଅକ୍ଟୋବର ୨ ଗାନ୍ଧୀ ଜୟନ୍ତୀରୁ ରାଜ୍ୟର ହିତାଧିକାରୀମାନଙ୍କୁ ମାସିକ ଭତ୍ତା ପ୍ରଦାନ ପାଇଁ ସରକାର ଯୋଜନା କରିଛନ୍ତି । ନିର୍ବାଚନରେ ଦିଆଯାଇଥିବା ପ୍ରତିଶ୍ରୁତି ଆଧାରରେ ବିଜେପି ସରକାର ଏହି ବର୍ଦ୍ଧିତ ଭତ୍ତା ଯୋଗାଇ ଦେବେ ।
ସୂଚନାଯୋଗ୍ୟ, ରାଜ୍ୟରେ ପ୍ରାୟ ୩୬.୭୫ଲକ୍ଷ ହିତାଧିକାରୀ ଏବେ ମାସିକ ଭତ୍ତା ପାଉଛନ୍ତି । ଗତ ଫେବୃୟାରୀ ମାସରେ ରାଜ୍ୟର ତତକାଳୀନ ବିଜେଡି ସରକାର ଏହି ହିତାଧିକାରୀଙ୍କ ମାସିକ ଭତ୍ତା ପରିମାଣ ୫୦୦ଟଙ୍କା ବୃଦ୍ଧି କରିଥିଲେ।