ସାଧାରଣ ନିର୍ବାଚନ ପୂର୍ବରୁ ଯୁବ ଭୋଟରଙ୍କୁ ଆକୃଷ୍ଟ କରିବା ପାଇଁ ରାଜ୍ୟ ସରକାର ନୂଆ ସ୍କିମ ‘ସ୍ୱୟମ୍’ ଘୋଷଣା କରିଛନ୍ତି । ଉଭୟ ଗ୍ରାମାଂଚଳ ଓ ସହରାଂଚଳର ୧୮ରୁ ୩୫ବର୍ଷ ବୟସର ଯୁବକଯୁବତୀ(ଅନୁସୂଚିତ ଜାତି,ଜନଜାତି ଓ ଦିବ୍ୟାଙ୍ଗଙ୍କ ପାଇଁ ୪୦ବର୍ଷ)ଙ୍କୁ ବିନା ସୁଧରେ ୧ଲକ୍ଷ ଟଙ୍କା ପର୍ଯ୍ୟନ୍ତ ଋଣ ମିଳିବ । ଏଥିପାଇଁ ଆବେଦନକାରୀଙ୍କୁ ବନ୍ଧକ କିମ୍ବା ପ୍ରୋସେସିଂ ଫି’ ଦେବାକୁ ପଡ଼ିବ ନାହିଁ । ୪ବର୍ଷ ମଧ୍ୟରେ ଆବେଦନକାରୀଙ୍କୁ ମୂଳ ଋଣ ଶୁଝିବାକୁ ପଡ଼ିବ । ଯଦି ଖିଲାପୀ ହେବେ ରାଜ୍ୟ ସରକାର ସେହି ଋଣ ଶୁଝିବେ । ଏଥିପାଇଁ ବ୍ୟାଙ୍କଗୁଡ଼ିକୁ ରାଜ୍ୟ ସରକାର ଗ୍ୟାରେଣ୍ଟି ଦେବେ । ୨ବର୍ଷ ପାଇଁ ଏହି ଯୋଜନା କାର୍ଯ୍ୟକ୍ଷମ ରହିବ । ରାଜ୍ୟ କ୍ୟାବିନେଟ୍ ଆଜି ଏଭଳି ନିଷ୍ପତ୍ତି ନେଇଛି । ତେବେ ଏହି ଯୋଜନା ‘ଦୂର ପାହାଡ଼ ସୁନ୍ଦର’ ସଦୃଶ ହୋଇଛି । ଏହି ଋଣ ସମ୍ପୂର୍ଣ୍ଣ ଭାବେ ବ୍ୟାଙ୍କ ଉପରେ ନିର୍ଭର କରୁଛି, ଯେଉଁଥିରେ ଆବେଦନକାରୀଙ୍କୁ ନିଜର ବ୍ୟବସାୟ ପାଇଁ ଡିପିଆର ସହ ମାର୍ଜିନ ମନି(ଏକ ନିର୍ଦ୍ଦିଷ୍ଟ ପରିମାଣର ଟଙ୍କା) ଦାଖଲ କରିବାକୁ ପଡ଼ିବ ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟ କ୍ୟାବିନେଟ୍ ବୈଠକରେ ନିଆଯାଇଥିବା ନିଷ୍ପତ୍ତି ଅନୁସାରେ ଗ୍ରାମାଂଚଳ ଓ ସହରାଂଚଳର ଯୁବକଯୁବତୀମାନଙ୍କୁ ବ୍ୟବସାୟରେ ବିପୁଳ ସୁଯୋଗ ଓ ଆତ୍ମନିର୍ଭରଶୀଳ କରିବା ଉଦ୍ଦେଶ୍ୟରେ ‘ସ୍ୱୟମ’(ସ୍ୱତନ୍ତ୍ର ଯୁବ ଉଦ୍ୟମୀ) ନାମରେ ଏକ ନୂଆ ଯୋଜନାକୁ ଅନୁମୋଦନ ଦେଇଛନ୍ତି । ଏହି ଯୋଜନାରେ ଯୁବକଯୁବତୀମାନେ ବିନା ସୁଧରେ ୧ଲକ୍ଷ ଟଙ୍କା ପର୍ଯ୍ୟନ୍ତ ଋଣ ପାଇପାରିବେ । ୧୮ରୁ ୩୫ବର୍ଷ ବୟସର ଯୁବକଯୁବତୀ ଏଥିପାଇଁ ଆବେଦନ କରିପାରିବେ । ଅନୁସୂଚିତ ଜାତି, ଜନଜାତି ଓ ଦିବ୍ୟାଙ୍ଗଙ୍କ ପାଇଁ ଏହି ସର୍ବୋଚ୍ଚ ବୟସସୀମା ଆଉ ୫ବର୍ଷ କୋହଳ କରାଯାଇଛି । ଯୁବକଯୁବତୀମାନେ ବ୍ୟାଙ୍କ ମାଧ୍ୟମରେ ଏହି ଋଣ ପାଇବେ ।
Also Read
ରାଜ୍ୟ ସରକାରଙ୍କ କାଳିଆ ଯୋଜନା, ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ସାମିଲ ଥିବା ଅବା ବାର୍ଷିକ ପାରିବାରିକ ରୋଜଗାର ୨ଲକ୍ଷ ଟଙ୍କାରୁ କମ୍(ଗ୍ରାମାଂଚଳ) ଓ ୩ଲକ୍ଷ ଟଙ୍କାରୁ କମ୍ (ସହରାଂଚଳ) ହୋଇଥିଲେ ତହସିଲଦାରଙ୍କଠୁ ଆୟକର ପ୍ରମାଣପତ୍ର ଆଣି ଏହି ଋଣ ପାଇଁ ଆବେଦନ କରିପାରିବେ । ଆବେଦନକାରୀଙ୍କ ଉଦ୍ୟମୀ ପଞ୍ଜିକୃତ କିମ୍ବା ଉଦ୍ୟମୀ ସହାୟତା ନମ୍ବର ଥିବା ଆବଶ୍ୟକ ।
ସେହିପରି ଆବେଦନକାରୀ ପୂର୍ବରୁ କୌଣସି ବ୍ୟାଙ୍କ କିମ୍ବା ଅନ୍ୟ କୌଣସି ଆର୍ଥିକ ଅନୁଷ୍ଠାନରୁ ଋଣ ନେଇ ଖିଲାପୀ ହୋଇନଥିବେ କିମ୍ବା କେନ୍ଦ୍ର ଓ ରାଜ୍ୟ ସରକାରଙ୍କ କୌଣସି ଯୋଜନାର ବକେୟା ଋଣ ରଖିନଥିବେ । କେନ୍ଦ୍ର ଓ ରାଜ୍ୟ ସରକାର କିମ୍ବା କୌଣସି ସରକାରୀ ଉଦ୍ୟୋଗର କର୍ମଚାରୀ ଓ ସାମ୍ବିଧାନିକ ସଂସ୍ଥାରକ ର୍ମଚାରୀ ଓ ତାଙ୍କ ପରିବାର ସଦସ୍ୟ ଏହି ଋଣ ପାଇବାକୁ ଯୋଗ୍ୟ ହେବେ ନାହିଁ । ପରିବାରର ଜଣେ ସଦସ୍ୟ ଏହି ସୁବିଧା ନେଇଥିଲେ ଅନ୍ୟ ସଦସ୍ୟ ଏହା ପାଇପାରିବେ ନାହିଁ ।
ସବୁଠୁ ଗୁରୁତ୍ୱପୂର୍ଣ୍ଣ ହେଲା, ରାଜ୍ୟ ସରକାର କେବଳ ସୁଧ ବହନ କରିବେ ନାହିଁ । ଓଲଟା ବ୍ୟାଙ୍କ ପାଖରେ ସମ୍ପୂର୍ଣ୍ଣ ଭାବେ ଗ୍ୟାରେଣ୍ଟର ରହିବେ । କେହି ଋଣ ଖିଲାପ କଲେ ତା’ର ୧୫ପ୍ରତିଶତ ରାଜ୍ୟ ସରକାର ଓ ବାକି ୮୫ ପ୍ରତିଶତ ସିଜିଟିଏମଏସଇ ମାଧ୍ୟମରେ ଭରଣା କରିବେ । ଜାତୀୟସ୍ତରର ସଂସ୍ଥା କେଡ୍ରିଟ୍ ଗ୍ୟାରେଣ୍ଟି ଫଣ୍ଡ ଟ୍ରଷ୍ଟ ଫର ମାଇକ୍ରୋ ଆଣ୍ଡ ସ୍ମଲ ଏଣ୍ଟରପ୍ରାଇଜେସ(ସିଜିଟିଏମଏସଇ)ର ବାର୍ଷିକ ଗ୍ୟାରେଣ୍ଟି ଦେୟ ରାଜ୍ୟ ସରକାର ବହନ କରିବେ । ଏହି ଋଣ ପାଇଁ ଯୁବକଯୁବତୀମାନଙ୍କୁ କୌଣସି ପ୍ରୋସେସିଂ ଫି’ କିମ୍ବା ବନ୍ଧକ ଦେବାକୁ ପଡ଼ିବ ନାହିଁ । ୪ବର୍ଷ ମଧ୍ୟରେ ଆବେଦନକାରୀଙ୍କୁ ମୂଳ ଋଣ ଶୁଝିବାକୁ ପଡ଼ିବ ।
ଏହି ଯୋଜନାରେ ସମ୍ପୂର୍ଣ୍ଣ ସୁଧବୋଝ ଓ ବାର୍ଷିକ ଗ୍ୟାରେଣ୍ଟି ନିମନ୍ତେ ନିର୍ଦ୍ଧାରିତ ପ୍ରିମିୟମ ବାବଦରେ ପାଇଁ ରାଜ୍ୟ ସରକାର ନିଜସ୍ୱ ବଜେଟରୁ ଗ୍ରାମାଂଚଳ ଯୁବକଯୁବତୀଙ୍କ ନିମନ୍ତେ ୪୪୮କୋଟି ଟଙ୍କା ଓ ସହରାଂଚଳ ଯୁବକଯୁବତୀଙ୍କ ପାଇଁ ୨୨୪କୋଟି ଟଙ୍କା ବହନ କରିବେ । ପ୍ରାଥମିକ ପର୍ଯ୍ୟାୟରେ ଗ୍ରାମାଂଚଳର ୧ଲକ୍ଷ ଓ ସହରାଂଚଳର ପ୍ରାୟ ୫୦ହଜାର ଯୁବକଯୁବତୀଙ୍କୁ ସାମିଲ କରିବାକୁ ଲକ୍ଷ୍ୟ ରଖାଯାଇଛି । ଏହି ଯୋଜନା ନିମନ୍ତେ ଆବେଦନକାରୀ ଏକ ନିର୍ଦ୍ଦିଷ୍ଟ ୱେବସାଇଟରେ ନିଜକୁ ପଞ୍ଜିକରଣ କରି ବ୍ୟାଙ୍କ ନିକଟକୁ ଆବେଦନ ପଠାଇବେ । ଆବେଦନକାରୀ ଯେଉଁ ବ୍ୟାଙ୍କରୁ ଋଣ ନେବାକୁ ଇଚ୍ଛୁକ ତାହା ଆବେଦନ ସମୟରେ ଉଳ୍ଲେଖ କରିବେ । ସମ୍ପୃକ୍ତ ବ୍ୟାଙ୍କ ଆବେଦନକାରୀଙ୍କ ଦରଖାସ୍ତ ପ୍ରାପ୍ତି ପରେ କାଗଜାତ ଯାଂଚ ଓ କ୍ଷେତ୍ର ପରିଦର୍ଶନ କରିବେ । କ୍ଷେତ୍ର ପରିଦର୍ଶନ ସମୟରେ ସମ୍ପୃକ୍ତ ବ୍ୟାଙ୍କ ଆବେଦନକାରୀଙ୍କୁ ଋଣ ମଞ୍ଜୁର କରିବା ନିମନ୍ତେ ଆବଶ୍ୟକ ଡିପିଆର ପ୍ରସ୍ତୁତ କରିବାରେ ସହାୟତା ପ୍ରଦାନ କରିବେ । ଆବେଦନକାରୀ
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
