ବିଏସକେୱାଇ-ଆୟୁଷ୍ମାନ ଭାରତକୁ ନେଇ ବିଜେଡି-ବିଜେପି ମୁହାଁମୁହିଁ

କେନ୍ଦ୍ରୀୟ ବଜେଟରେ ଆୟୁଷ୍ମାନ ଭାରତ ହେଲଥ ସ୍କିମ ପାଇଁ ହୋଇଥିବା ବ୍ୟୟବରାଦକୁ ନେଇ ଆଜି ବିଜେଡି ଓ ବିଜେପି ମୁହାଁମୁହିଁ ହୋଇଛନ୍ତି । ଗତକାଲି ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆୟୁଷ୍ମାନ ଯୋଜନାରେ କମ୍ ବ୍ୟୟବରାଦ ହୋଇଥିବା ଓ ରାଜ୍ୟ ବିଜେପିକୁ ସମାଲୋଚନା କରିଥିବାବେଳେ ଆଜି ବିଜେଡି ଏକ ସାମ୍ବାଦିକ ସମ୍ମିଳନୀ କରି ବିଏସକେୱାଇ ଓ ଆୟୁଷ୍ମାନ ଭାରତ ଯୋଜନାରେ ଆବଂଟିତ ପାଣ୍ଠିର ତୁଳନାତ୍ମକ ଚିତ୍ର ଦେଇଛି । ଏପଟେ ବିଜେପି ମଧ୍ୟ କଡ଼ା ଜବାବ ଦେଇ ବିଏସକେୱାଇରେ କେତେ ରୋଗୀଙ୍କୁ କେଉଁ ସବୁ ରୋଗ ପାଇଁ ସହାୟତା ମିଳିଛି ତାହା ସାର୍ବଜନୀନ କରିବାକୁ କହିଛି ।

ଆଜି ଏକ ସାମ୍ବାଦିକ ସମ୍ମିଳନୀରେ ବିଜେଡି ସାଧାରଣ ସମ୍ପାଦିକା ଶ୍ରୀମୟୀ ମିଶ୍ର ଓ ମୁଖପାତ୍ର ଗୌତମବୁଦ୍ଧ ଦାସ ସିଧାସଳଖ ବିଜେପିକୁ ସମାଲୋଚନା କରି କହିଛନ୍ତି ଯେ, ରାଜ୍ୟ ବିଜେପି ପାଇଁ ସ୍ୱାସ୍ଥ୍ୟ ଏକ ରାଜନୀତିକ ପ୍ରସଙ୍ଗ ହୋଇଥାଇପାରେ କିନ୍ତୁ ବିଜେଡି ପାଇଁ ଏହା ପ୍ରାଥମିକତା । ସ୍ୱାସ୍ଥ୍ୟ କ୍ଷେତ୍ରରେ ଅଧିକ ନିବେଶ କରିବାରେ ବିଜେଡି ବିଶ୍ୱାସ କରେ । ଆୟୁଷ୍ମାନ ଯୋଜନାକୁ ନେଇ ରାଜ୍ୟ ବିଜେପି ଯେଉଁ ବାହାସ୍ଫୋଟ ମାରୁଥିଲା ତାହା ଗତକାଲି କେନ୍ଦ୍ରୀୟ ବଜେଟ ଆସିବା ପରେ ଓଡ଼ିଶା ବିଜେପିର ମିଛ ପଦାରେ ପଡ଼ିଯାଇଛି । ଆୟୁଷ୍ମାନ ଯୋଜନା ପାଇଁ କେନ୍ଦ୍ରର ୭୨୦୦କୋଟି ଟଙ୍କା ବ୍ୟୟବରାଦ ହୋଇଛି । ହିସାବ କଲେ ପ୍ରତି ରାଜ୍ୟ ପାଇଁ ହାରାହାରି ୨୦୦କୋଟି ଟଙ୍କା ପଡ଼ିବ । ଆୟୁଷ୍ମାନ ତୁଳନାରେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା(ବିଏସକେୱାଇ) ବହୁତ ଉନ୍ନତ । ବାର୍ଷିକ ବ୍ୟୟ ବି ବହୁଗୁଣା ଅଧିକ । କେନ୍ଦ୍ର ସରକାର ବର୍ଷକୁ ୨୦୦କୋଟି ଦେବେ, ଯାହାକି ଆମର ଗୋଟିଏ ଜିଲ୍ଲା ପାଇଁ ଖର୍ଚ୍ଚ । ଆଉ ୨୯ଟି ଜିଲ୍ଲାର ଖର୍ଚ୍ଚ କିଏ ତୁଲାଇବ ବୋଲି ଶ୍ରୀମତୀ ମିଶ୍ର ତାତ୍ସଲ୍ୟ କରିଥିଲେ । ସେ କହିଥିଲେ ଯେ, ଆୟୁଷ୍ମାନ ଯୋଜନାରେ ପର୍ଯ୍ୟାପ୍ତ ପାଣ୍ଠି ଆବଂଟନ ହୋଇନି । ଆୟୁଷ୍ମାନ ଯୋଜନାରେ ପ୍ରତି ରାଜ୍ୟକୁ ବର୍ଷକୁ ୨୦୦କୋଟି ଟଙ୍କା ଆବଂଟନ ହେଉଥିବାବେଳେ ଆମ ବିଏସକେୱାଇରେ ପ୍ରତି ଜିଲ୍ଲାକୁ ବର୍ଷକୁ ୨୦୦କୋଟି ଟଙ୍କା ଦିଆଯାଉଛି । ସମଗ୍ର ଭାରତ ପାଇଁ ୭୨୦୦କୋଟି ଟଙ୍କା ଥିବାବେଳେ ଗୋଟିଏ ରାଜ୍ୟ ପାଇଁ ୬ହଜାର କୋଟି ଟଙ୍କା । କେନ୍ଦ୍ରୀୟ ବଜେଟ ଆସିବା ପରେ ଓଡ଼ିଶା ବିଜେପି ନିଜ ଭୁଲ୍ ବୁଝୁ ଓ ଆଉ ରାଜ୍ୟବାସୀଙ୍କୁ ରାଜ୍ୟ ବିଜେପି ଭୂଆଁ ନବୁଲାଉ ବୋଲି ବିଜେଡି କହିଛି ।

ଏହାର ଜବାବରେ ରାଜ୍ୟ ବିଜେପି ସଭାପତି ସମୀର ମହାନ୍ତି ମୁଖ୍ୟମନ୍ତ୍ରୀଙ୍କ ମୁହଁରେ ଅହଙ୍କାର ରହିଛି, ବଜେଟ୍ ପ୍ରତିକ୍ରିୟାରେ ଆୟୁଷ୍ମାନ ଭାରତକୁ ନେଇ ରାଜନୀତିକ ଟିପ୍ପଣୀ କରିଛନ୍ତି । ମୁଖ୍ୟମନ୍ତ୍ରୀ ବିଜେପି ପ୍ରତି ପ୍ରୟୋଗ କରିଥିବା ଶବ୍ଦ ଶୋଭନୀୟ ନୁହେଁ । ବିଏସକେୱାଇ ଯୋଜନାରେ କେଉଁ ରୋଗୀଙ୍କ ପାଇଁ କେତେ ଟଙ୍କା ଖର୍ଚ୍ଚ ହେଉଛି ତା’ର ତଥ୍ୟ ମୁଖ୍ୟମନ୍ତ୍ରୀ ସାର୍ବଜନୀନ କରନ୍ତୁ । ବାରମ୍ବାର ଦାବି ପରେ ବି ସରକାର ଏପର୍ଯ୍ୟନ୍ତ ଏହି ତଥ୍ୟ କାହିଁକି ସାର୍ବଜନୀନ କରୁନାହାନ୍ତି ବୋଲି ସେ ପ୍ରଶ୍ନ କରିଛନ୍ତି ।

ସେହିପରି ବିଜେପି ବିଧାୟକ ସୂର୍ଯ୍ୟବଂଶୀ ସୂରଜ କହିଛନ୍ତି ଯେ, ମୁଖ୍ୟମନ୍ତ୍ରୀ ବଜେଟକୁ ଭଲରେ ଜାଣି ଟ୍ୱିଟ୍ କରିଛନ୍ତି ନା ତାଙ୍କ ଅଜାଣତରେ ଆଉ କିଏ ଟ୍ୱିଟ୍ କରିଛି । ଆୟୁଷ୍ମାନ ଭାରତ ଯୋଜନାରେ ୫୦କୋଟିରୁ ଅଧିକ ରୋଗୀଙ୍କୁ ୮୦ହଜାର କୋଟି ଟଙ୍କାର ସହାୟତା ମିଳିଛି । ୯ହଜାରରୁ ଅଧିକ ଜନଔଷଧି କେନ୍ଦ୍ରରେ ଗରିବଙ୍କୁ ୨୦ହଜାର କୋଟି ଟଙ୍କାର ଲାଭ ପାଇଛନ୍ତି । ରାଜ୍ୟ ସରକାର ରାଜନୀତିକ ଅଭିସନ୍ଧି ରଖି ଦୀର୍ଘ ୫ବର୍ଷ ହେଲା ଓଡ଼ିଶାର ପ୍ରାୟ ୬୦ଲକ୍ଷ ଗରିବ ପରିବାରକୁ ଆୟୁଷ୍ମାନ ଭାରତ ଯୋଜନାରୁ ବଂଚିତ ରଖିଛନ୍ତି । ଏପରିକି ଅନ୍ୟ ରାଜ୍ୟରେ କାମ କରୁଥିବା ୨୫ଲକ୍ଷ ଓଡ଼ିଆଙ୍କୁ ମଧ୍ୟ ଏହି ସ୍କିମରୁ ବଂଚିତ ରଖିବାକୁ ରାଜ୍ୟ ସରକାର ପଛାଇ ନାହାନ୍ତି । ସେମାନେ ଯେଉଁ ସବୁ ରାଜ୍ୟରେ କାମ କରୁଛନ୍ତି ସେଠାରେ ଆୟୁଷ୍ମାନ ଯୋଜନାର ଫାଇଦା ନେଇପାରୁଥାନ୍ତେ ବୋଲି ବିଜେପି କହିଛି ।