ତାମିଲନାଡୁରେ ବିଜେପିର ଅସ୍ଥିତ୍ୱ ବଜାୟୀ ରଖିବା ପାଇଁ ଆଇପିଏସ ଅଫିସରରୁ ରାଜନେତା ବନିଥିବା କେ ଆନ୍ନାମଲାଇ ଜୋରଦାର ଉଦ୍ୟମ ଜାରି ରଖିଛନ୍ତି। ୨୦୨୩ରେ ଆନ୍ନାମଲାଇ ସିଧାସଳଖ ବିଜେପି ନେତୃବୃନ୍ଦଙ୍କୁ ଧମକ ଦେଇଥିଲେ। ଯଦି ବିଜେପି ୨୦୨୪ ସାଧାରଣ ନିର୍ବାଚନରେ ଏଆଇଏଡିଏମକେ ସହ ମେଣ୍ଟ କରିବ, ତା’ହେଲେ ସେ ଦଳ ଛାଡ଼ି ଦେବେ। ଆନ୍ନାମଲାଇ ସବୁବେଳେ ଏକାକୀ ଲଢ଼ିବାକୁ ପସନ୍ଦ କରନ୍ତି।
ସେ କୌଣସି ଦଳ ସହ ମେଣ୍ଟ କରିବା ସପକ୍ଷରେ ମତ ରଖନ୍ତି ନାହିଁ। କିନ୍ତୁ ଏବେ ବିଜେପିର କେନ୍ଦ୍ରୀୟ ନେତୃବୃନ୍ଦ ୨୦୨୬ ତାମିଲନାଡୁ ବିଧାନସଭା ନିର୍ବାଚନ ପୂର୍ବରୁ ଏଆଇଏଡିଏମକେ ସହ ମେଣ୍ଟ କରିବାକୁ ପ୍ରକ୍ରିୟା ଆରମ୍ଭ କରିଛନ୍ତି। ୨୦୨୩ରେ ଯେଉଁ ଆନ୍ନାମଲାଇ ମେଣ୍ଟ ବିପକ୍ଷରେ ମତ ରଖିଥିଲେ ଏବେ ସେ ନିଜର ସ୍ୱରକୁ ସାମନ୍ୟ କରି ଦେଇଥିବା କୁହାଯାଉଛି। କେନ୍ଦ୍ରୀୟ ନେତୃବୃନ୍ଦଙ୍କ ଚାପରେ ସେ ମେଣ୍ଟ ବିରୋଧରେ ମତ ରଖିବାକୁ ସକ୍ଷମ ହେଉ ନାହାନ୍ତି। କିନ୍ତୁ ମେଣ୍ଟ ହେବା ପରେ ସେ ବିଜେପିର ତାମିଲନାଡୁ ମୁଖ୍ୟ ପଦରୁ ଇସ୍ତଫା ଦେବେ ବୋଲି କୁହାଯାଉଛି।
ବିଜେପି କହିଲେ ତାମିଲନାଡୁରେ ଆନ୍ନାମଲାଇଙ୍କୁ ବୁଝାଏ। ଏପରି ସ୍ଥିତିରେ ଯଦି ବିଜେପି ପୁଣି ଏଆଇଏଡିଏମକେ ସହ ମେଣ୍ଟ କରୁଛି, ତା’ହେଲେ ଆନ୍ନାମଲାଇ କ’ଣ କରିବେ? ସେ କେନ୍ଦ୍ରୀୟ ନେତୃବୃନ୍ଦଙ୍କ ଚାପରେ ଚେପା ହୋଇ ରହିବେ ନା ଦଳ ଛାଡ଼ିବେ? ସେହିପରି ଏତେ ପରିଶ୍ରମ କରି ଆନ୍ନାମଲାଇ ତାମିଲନାଡୁରେ ବିଜେପିର ଯେଉଁ ଉଥାନ କରିଥିଲେ, ସେ ଉଦ୍ୟମକୁ ମେଣ୍ଟ ନିଶ୍ଚିତ ଶକ୍ତ ଝଟକା ଦେବ। ମେଣ୍ଟ ହେବା ପରେ ଆନ୍ନାମଲାଇ କ’ଣ ସବୁ ଠାରୁ ଅଧିକ କ୍ଷତିଗ୍ରସ୍ତ ହେବେ କି?
୨୦୨୩ର କଥା। ଆନ୍ନାମଲାଇ ସିଧାସଳଖ ଏଆଇଏଡିଏମକେର ଆଇକନ ଜେ ଜୟଲଳିତା ଓ ସିଏନ ଆନ୍ନାଦୁରାଇକୁ ତୀବ୍ର ସମାଲୋଚନା କରିଥିଲେ। ସେ ଏଆଇଏଡିଏମକେ ସହ ମେଣ୍ଟ କରିବାକୁ ମନା କରି ଦେଇଥିଲେ। ଆନ୍ନାମଲାଇଙ୍କ ଜିଦ ଯୋଗୁ ବିଜେପି ଓ ଏଆଇଏଡିଏମକେ ୨୦୨୪ ସାଧାରଣ ନିର୍ବାଚନରେ ଅଲଗା ଅଲଗା ଲଢ଼ିଥିଲେ। ଅବଶ୍ୟ ସାଧାରଣ ନିର୍ବାଚନରେ ଉଭୟ ଦଳ ଲଜ୍ଜାଜନ ପରାଜୟବରଣ କରିଥିଲେ। ବିଜେପି ତାମିଲନାଡୁରେ ଗୋଟିଏ ହେଲେ ଲୋକସଭା ଆସନ ଜିତି ପାରି ନଥିଲା। କିନ୍ତୁ ଆନ୍ନାମଲାଇଙ୍କ ନେତୃତ୍ୱରେ ତାମିଲନାଡୁରେ ବିଜେପିର ଭୋଟ ଭାଗ ପୂର୍ବାପେକ୍ଷା ବଢ଼ିଥିଲା। ସେହିପରି ଆଇପିଏସରୁ ରାଜନେତା ବନିଥିବା ଆନ୍ନାମଲାଇ ରାଜ୍ୟରେ ଗୋଟିଏ ପରେ ଗୋଟିଏ ପ୍ରସଙ୍ଗ ଉଠାଇ ବିଜେପିକୁ ସବୁବେଳେ ଚର୍ଚ୍ଚାରେ ରଖି ଆସିଛନ୍ତି।
ଲୋକସଭା ନିର୍ବାଚନ ବିପର୍ଯ୍ୟୟ ପରେ ମାସାଧିକ କାଳ ଆନ୍ନାମଲାଇ ଗାଏବ ହୋଇଯାଇଥିଲେ। କୁହାଯାଏ ଯେ ଗୋଟିଏ ରାଜନୀତିକ ରଣନୀତି ପାଇଁ ସେ ଅକ୍ସଫୋର୍ଡ ଚାଲି ଯାଇଥିଲେ। ସେ ଫେରିବା ପରେ ଗୋଟିଏ ପରିବର୍ତ୍ତନ ଦେଖିବାକୁ ମିଳିଛି। ତାମିଲନାଡୁରେ ବିଜେପି ନିଜର ଅସ୍ଥିତ୍ୱ ବଜାୟୀ ରଖିବାକୁ ଚେଷ୍ଟା କରୁଛି ଓ ବିଧାନସଭା ନିର୍ବାଚନ ପୂର୍ବରୁ ଦଳ ଏଆଇଏଡିଏମକେ ସହ ମେଣ୍ଟ କରିବାକୁ ଲକ୍ଷ୍ୟ ରଖିଛି।
ତାମିଲନାଡୁରେ ବିଜେପି ଏଯାଏ ସେତେଟା ଲୋକପ୍ରିୟତା ହାସଲ କରିପାରି ନାହିଁ। ସେହିପରି ଏଆଇଏଡିଏମକେ ନେତୃତ୍ୱ ଅଭାବକୁ ପୂରଣ କରିବା ପାଇଁ ସଂଘର୍ଷ କରୁଛି। ଉଭୟ ଦଳ ମେଣ୍ଟର ଆବଶ୍ୟକ କରୁଛନ୍ତି। ଏହାକୁ ହିଁ ଆନ୍ନାମଲାଇ ନାପସନ୍ଦ କରୁଛନ୍ତି। ତାମିଲନାଡୁ ଲଢ଼େଇ ଏଥର ଆହୁରି ଚ୍ୟାଲେଞ୍ଜିଂ ହେବ। କାରଣ ଅଭିନେତାରୁ ରାଜନେତା ବନିଥିବା ବିଜୟ ଓ ତାଙ୍କ ଦଳ ଟିଭିକେ ଏବେ ନିର୍ବାଚନ ଦୌଡ଼ରେ ନିଜକୁ ସାମିଲ କରିଛି। ସୁପରଷ୍ଟାର ବିଜୟଙ୍କ ଦଳ ବିଭିନ୍ନ ବର୍ଗ ବିଶେଷ କରି ଯୁବଗୋଷ୍ଠୀଙ୍କୁ ନିଜ ଆଡ଼କୁ ଆକୃଷ୍ଟ କରିପାରେ। ଏପରି ସ୍ଥିତିରେ ତାମିଲନାଡୁର ବିଧାନସଭା ନିର୍ବାଚନ ଆହୁରି ରୋମାଞ୍ଚକର ହେବ ବୋଲ ଆଶା କରାଯାଉଛି।
ମେଣ୍ଟ ଚର୍ଚ୍ଚା ଭିତରେ ଏଆଇଏଡିଏମକେ ମୁଖ୍ୟ ଏଡାପାଡ୍ଡି କେ ପଲାନିସ୍ୱାମୀ ବା ଇପିଏସ୍ କେନ୍ଦ୍ରମନ୍ତ୍ରୀ ତଥା ବିଜେପିର ଚାଣକ୍ୟ ଅମିତ ଶାହଙ୍କୁ ଗତ ସପ୍ତାହରେ ଭେଟିଛନ୍ତି। କିନ୍ତୁ ପୁରୁଣା ସହଯୋଗୀ ଏଆଇଏଡିଏମକେ ସହ ବିଜେପିର ମେଣ୍ଟ କ’ଣ ଆନ୍ନାମଲାଇ ଓ ତାଙ୍କ ଆକ୍ରମଣାତ୍ମକ ଆଭିମୁଖ୍ୟକୁ ପ୍ରଭାବିତ କରିବ କି? ମେଣ୍ଟ ହେଲେ ଆନ୍ନାମଲାଇ କ’ଣ ସବୁଠାରୁ ବଡ଼ କ୍ଷତି ସହିବେ କି?
ଆନ୍ନାମଲାଇଙ୍କୁ ଯୋଗୁ କେମିତି ବିଜେପି- ଏଆଇଏଡିଏମକେ ଅଲଗା ହୋଇଥିଲେ?
ଆନ୍ନାମଲାଇଙ୍କ ବେକାର ବୟାନକୁ ଆଧାର କରି ୨୦୨୩ ସେପ୍ଟେମ୍ବର ମାସରେ ବିଜେପି ଠାରୁ ଏଆଇଏଡିଏମକେ ଅଲଗା ହୋଇଯାଇଥିଲା। ଆନ୍ନାମଲାଇ ସିଧାସଳଖ ଏଆଇଏଡିଏମକେର ଆଇକନ ଆନ୍ନାଦୁରାଇ ଓ ଜୟଲଳିତାଙ୍କୁ ଟାର୍ଗେଟ କରିଥିଲେ। ଏଆଇଏଡିଏମକେ ପକ୍ଷରୁ କୁହାଯାଇଥିଲା ଯେ “ବିଜେପିର ରାଜ୍ୟ ନେତୃବୃନ୍ଦ ନିୟମିତ ଭାବେ ଆମର ପୂର୍ବତନ ନେତାମାନଙ୍କ ସମ୍ପର୍କରେ ଅନାବଶ୍ୟକ ବୟାନ ଦେଉଛନ୍ତି। ଆଜି ଠାରୁ ବିଜେପି ଓ ଏନଡିଏ ସହ ଏଆଇଏଡିଏମକେ ସବୁ ପ୍ରକାରର ସମ୍ପର୍କ ଚ୍ଛିନ୍ନ କରୁଛି।”
ମେଣ୍ଟ ତୁଟି ଯିବାରୁ ଆନ୍ନାମଲାଇଙ୍କ ନେତୃତ୍ୱରେ ବିଜେପି ତାମିଲନାଡୁରେ ଲୋକସଭା ନିର୍ବାଚନ ଲଢ଼ିଥିଲା। ବିଜେପିର ଭୋଟ ଶେୟାର ୩.୬୬%ରୁ ୧୦.୭୨%ରେ ପହଞ୍ଚି ଯାଇଥିଲା। କିନ୍ତୁ ଦଳ ଗୋଟିଏ ବି ସିଟ ଜିତି ପାରି ନଥିଲା। ଆନ୍ନାମଲାଇ ପଦଯାତ୍ରା କରିବା ସହ ଉଭୟ ଏଆଇଏଡିଏମକେ ଓ ଡିଏମକେକୁ ଜୋରଦାର ସମାଲୋଚନା କରିଥିଲେ। ଏପରି କରି ଦକ୍ଷିଣ ଭାରତରେ ସେ ବିଜେପିର ଗୋଟିଏ ସ୍ୱତନ୍ତ୍ର ପରିଚୟ ସୃଷ୍ଟି କରିବାକୁ ସକ୍ଷମ ହୋଇଥିଲେ। କିନ୍ତୁ ଏବେ ଯଦି ବିଜେପି- ଏଆଇଏଡିଏମକେ ମେଣ୍ଟ କରୁଛନ୍ତି, ତା’ହେଲେ ବିଜେପି ରାଜ୍ୟରେ ଜୁନିୟର ପାର୍ଟନର ହୋଇ ରହିବ।
ଏଆଇଏଡିଏମକେ ସବୁ କିଛି ନିଜ ନିୟନ୍ତ୍ରଣରେ ରଖିବ। ପ୍ରଚାର ଠାରୁ ଆରମ୍ଭ କରି ନେତୃବୃନ୍ଦର ନିଷ୍ପତ୍ତି ଏଆଇଏଡିଏମକେ ନେବ। ବିଜେପିକୁ ମେଣ୍ଟର ବଳ ଦରକାର। ଦଳ ୨୦୨୪ ପରି ୨୦୨୬ରେ ଏକାକୀ ଲଢ଼ିବାକୁ ସକ୍ଷମ ହେବନି। ତାମିଲନାଡୁର ଦ୍ରାବିଡିଆନମାନଙ୍କୁ ମଧ୍ୟ ବେଶ ସମ୍ବେଦନଶୀଳ ଭାବେ ବିଜେପିକୁ ହ୍ୟାଣ୍ଡେଲ କରିବାକୁ ପଡ଼ିବ।
ଦଳର ନେତୃବୃନ୍ଦ ମେଣ୍ଟ ସପକ୍ଷରେ ଥିବାରୁ ଆନ୍ନାମଲାଇ ମଧ୍ୟ ନିଜର ସ୍ୱରକୁ ନରମ କରିଛନ୍ତି। ଏଥିପାଇଁ ଶାହ ଓ ଇପିଏସଙ୍କ ବୈଠକକୁ ନେଇ ସେ କୌଣସି ପ୍ରକାରର ଆପତ୍ତି ଉଠାଇ ନାହାନ୍ତି। କିନ୍ତୁ ମେଣ୍ଟ ଆଲୋଚନା ତୀବ୍ର ହେବା ପରେ କେ ଆନ୍ନାମଲାଇ ବିଜେପିର ତାମିଲନାଡୁ ମୁଖ୍ୟ ପଦରୁ ଇସ୍ତଫା ଦେବା ଚର୍ଚ୍ଚା ଜୋର ଧରିଛି। ବିଜେପି ମଧ୍ୟ ଆନ୍ନାମଲାଇଙ୍କ ସ୍ଥାନ କିଏ ନେବେ, ସେଭଳି ଜଣେ ନେତାଙ୍କୁ ଖୋଜୁଛି।
ମଙ୍ଗଳବାର ଆନ୍ନାମଲାଇ କହିଛନ୍ତି ଯେ “ମୁଁ ମେଣ୍ଟ ସମ୍ପର୍କରେ କିଛି ବି କହିବାକୁ ଚାହୁଁନି। ଆମ ସ୍ୱରାଷ୍ଟ୍ର ମନ୍ତ୍ରୀ ସବୁ କଥା କହିଛନ୍ତି। ଏ ପ୍ରସଙ୍ଗରେ ତାଙ୍କ ପ୍ରତିକ୍ରିୟାକୁ ଚୂଡ଼ାନ୍ତ ଭାବେ ବିବେଚନା କରାଯାଉ। ମୁଁ କୌଣସି ଦଳ କିମ୍ବା ନେତାଙ୍କ ବିରୋଧରେ ନାହିଁ। ମୁଁ ସବୁବେଳେ ମୋ ଆଭିମୁଖ୍ୟକୁ ସ୍ପଷ୍ଟ କରିଛି। ମୁଁ ଜଣେ କ୍ୟାଡର ଭାବେ କାମ କରିବାକୁ ପ୍ରସ୍ତୁତ। ଦୟା କରି ଏହାର ଅର୍ଥ ବୁଝିବାକୁ ଚେଷ୍ଟା କରନ୍ତୁ।”
ଏଆଇଏଡିଏମକେର ମେଣ୍ଟ ସର୍ତ୍ତ ଆନ୍ନାମଲାଇଙ୍କ କ୍ଷମତାକୁ ସଙ୍କୁଚିତ କରିବ!
କୁହାଯାଉଛି ଯେ ଏଆଇଏଡିଏମକେ ତାମିଲନାଡୁ ରାଜନୀତିରେ ଆନ୍ନାମଲାଇଙ୍କ ଉପସ୍ଥିତି ଚାହୁଁନି। ତେଣୁ ବିଜେପି ତାଙ୍କୁ ରାଜ୍ୟରୁ ବାହାର କରି କେନ୍ଦ୍ରୀୟ ସ୍ତରରେ କୌଣସି ଦାୟିତ୍ୱ ଦେଇପାରେ। ବିଜେପି ନେତୃବୃନ୍ଦ ଯେକୌଣସି ଉପାୟରେ ଏଆଇଏଡିଏମକେକୁ ନିଜ ପାଖକୁ ଆଣିବାକୁ ଚାହୁଁଛନ୍ତି। ଏଥିପାଇଁ ତାମିଲନାଡୁରେ ଦଳ ନେତୃବୃନ୍ଦ ପରିବର୍ତ୍ତନ ଠାରୁ ଆରମ୍ଭ କରି ଏଆଇଏଡିଏମକେ ରଖୁଥିବା ସବୁ ସର୍ତ୍ତ ମାନିବାକୁ ପ୍ରସ୍ତୁତ ରହିଛି। ଏଆଇଏଡିଏମକେ ମେଣ୍ଟ ପାଇଁ ଏକାଧିକ ସର୍ତ୍ତ ରଖିଛି। ଏହା ମଧ୍ୟରୁ ଗୋଟିଏ ହେଲା ମେଣ୍ଟ ମଧ୍ୟରେ ସମ୍ବନୟ ରଖିବା ପାଇଁ ଗୋଟିଏ ଉଚ୍ଚ ସ୍ତରୀୟ ଷ୍ଟିୟରିଂ କମିଟି ଗଠନ କରାଯିବ। ଏହା ଆନ୍ନାମଲାଇଙ୍କ କ୍ଷମତାକୁ ରାଜ୍ୟରେ ସଙ୍କୁଚିତ କରିଦେବ। ମେଣ୍ଟ ନେଇ ଚର୍ଚ୍ଚା ଆରମ୍ଭ ହେବା ଦିନ ଠାରୁ ଏଆଇଏଡିଏମକେ ଜୋରଦାର ବିରୋଧ କରୁଥିବା ଆନ୍ନାମଲାଇ ନିଜ ଆଭିମୁଖ୍ୟରେ ପରିବର୍ତ୍ତନ ଆଣିଛନ୍ତି। ସେ ପୂର୍ବଭଳି କ୍ଷମତାସୀନ ଡିଏମକେକୁ ଟାର୍ଗେଟ କରୁଥିବା ବେଳେ ଏଆଇଏଡିଏମକେକୁ ସିଧାସଳଖ କିଛି ବି କହୁ ନାହାନ୍ତି।
ଆନ୍ନାମଲାଇ କ’ଣ କରିବେ?
ଏଆଇଏଡିଏମକେ ସହ ମେଣ୍ଟ ନିଶ୍ଚିତ ଭାବେ ବିଜେପିକୁ ନିର୍ବାଚନରେ ସହାୟତା କରିପାରେ। ତଥାପି ଆନ୍ନାମଲାଇଙ୍କ କ୍ଷମତା ସଙ୍କୁଚିତ ହେବା ସମ୍ଭବତଃ ବିଜେପିକୁ କ୍ଷତି ପହଞ୍ଚାଇ ପାରେ। ୨୦୨୧ ବିଧାନସଭା ନିର୍ବାଚନରେ ବିଜେପି ଓ ଏଆଇଏଡିଏମକେ ମିଳିତ ଭାବେ ୩୬% ଭୋଟ ପାଇଥିଲେ। ଡିଏମକେ ୩୭.୭% ଭୋଟ ପାଇଥିଲା। ଏପରି ଭୋଟ ଭାଗ ନିଶ୍ଚିତ ଭାବେ ୨୦୨୬ ବିଧାନସଭା ନିର୍ବାଚନରେ ଉଭୟ ଦଳକୁ ମେଣ୍ଟ କରିବାକୁ ଆହୁରି ଉତ୍ସାହିତ କରିଛି।
ବିଜେପି ମେଣ୍ଟ ସପକ୍ଷରେ ଥିବା ବେଳେ ଆନ୍ନାମଲାଇଙ୍କୁ ଜାତୀୟ ସ୍ତରରେ କୌଣସି ଦାୟିତ୍ୱ ମିଳିବାର ସମ୍ଭାବନା ରହିଛି। ଆନ୍ନାମଲାଇ ଜଣେ ଗୌଣ୍ଡାର ସଂପ୍ରଦାୟର ଲୋକ। ଯଦି ମେଣ୍ଟ ହେବ, ତା’ହେଲେ ତାଙ୍କୁ ତାମିଲନାଡୁ ବାହାରେ ଦାୟିତ୍ୱ ମିଳିବ। ଏଆଇଏଡିଏମକେର ଇପିଏସ୍ ମଧ୍ୟ ଜଣେ ଗୌଣ୍ଡାର ସଂପ୍ରଦାୟର ଲୋକ। ତେଣୁ ମେଣ୍ଟରେ ଅଲଗା ସଂପ୍ରଦାୟର ଲୋକଙ୍କୁ ଦାୟିତ୍ୱ ଦିଆଯିବ।
ବିଜେପି ରାଜ୍ୟର ତେବର ସଂପ୍ରଦାୟର ସମର୍ଥନ ପାଇବାର ଆଶା ରଖିଛି। ରାଜ୍ୟ ମୋଟ ଜନସଂଖ୍ୟା ମଧ୍ୟରୁ ଏହି ସଂପ୍ରଦାୟର ସଂଖ୍ୟା ୮ରୁ ୧୦%। ତେଣୁ ବିଜେପି ଆନ୍ନାମଲାଇଙ୍କ ବଦଳରେ ତେବର ସଂପ୍ରଦାୟର କାହାକୁ ଦଳର ତାମିଲନାଡୁ ଦାୟିତ୍ୱ ଦେଇପାରେ। ଅବଶ୍ୟ ଆନ୍ନାମଲାଇ କ୍ଷମତା ସଙ୍କୁଚିତ ହେବା ପରେ ସାମାନ୍ୟ ମନ ଉଣା କରିପାରନ୍ତି। କିନ୍ତୁ ସେ ଜାଣିଛନ୍ତି ଯେ ରାଜନୀତିରେ ଧୈର୍ଯ୍ୟର ଶକ୍ତି ବେଶ ମହତ୍ତ୍ୱପୂର୍ଣ୍ଣ।