ଜାଫନା: ଆକାଶରେ ରଙ୍ଗ ବେରଙ୍ଗର ଗୁଡ଼ି ଉଡ଼ୁଥିବାର ଦେଖିବାକୁ ମିଳେ। ଅନେକଥର ଲୋକେ ଅନ୍ୟକୁ କହନ୍ତି ଯେ ଗୁଡ଼ି ସହ ନିଜେ ଆକାଶକୁ ଉଡ଼ିଯିବୁନି। କିନ୍ତୁ ଭାବନ୍ତୁ ଯଦି ସତରେ ଏଭଳି ହୁଏ, ତାହେଲେ କ’ଣ ହେବ। ଏବେ ସୋଶାଲ ମିଡିଆରେ ଏଭଳି ଏକ ଭିଡିଓ ଭାଇରାଲ୍ ହୋଇଛି, ଯେଉଁଥିରେ ଗୁଡ଼ି ସହ ଜଣେ ବ୍ୟକ୍ତି ପବନରେ ଆକାଶକୁ ଉଡ଼ି ଯାଉଛି।
ଭିଡିଓରେ ଦେଖିବାକୁ ମିଳିଛି ଯେ ବ୍ୟକ୍ତି ଜଣକ ଗୁଡ଼ି ସୂତା ଧରି ବହୁ ଉପରକୁ ଉଡ଼ି ଯାଉଛନ୍ତି। କିଛି ସମୟ ପବନରେ ରହିବା ପରେ ତାଙ୍କର ଜଣେ ବନ୍ଧୁ କଳେ ବଳେ ତାଙ୍କୁ ତଳକୁ ଆଣିବାକୁ ପ୍ରୟାସ କରିଥିଲେ। ଯେତେବେଳେ ବ୍ୟକ୍ତି ଜଣକ ଧୀରେ ଧୀରେ ଗୁଡ଼ି ସହ ତଳକୁ ଖସିଲେ, ସେ ନିଜ ହାତ ଛାଡ଼ିଦେଲେ। ଆଉ ବ୍ୟକ୍ତି ଜଣକ ତଳେ ପଡ଼ିଯାଇଥିଲେ।
https://twitter.com/OdishaReporter/status/1474028650689298432?s=20
ସୋଶାଲ ଭିଡିଆରେ ଭାଇରାଲ ହେଉଥିବା ଏହି ଭିଡିଓଟି ଶ୍ରୀଲଙ୍କାର ଜାଫନା ଅଞ୍ଚଳର। ଶ୍ରୀଲଙ୍କାର ଜାଫନାରେ ନିକଟରେ ଗୁଡ଼ି ଉଡ଼ାଇବା ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଏହି ପ୍ରତିଯୋଗିତାରେ ଜଣେ ବ୍ୟକ୍ତି ତା’ର ବାକି ସଦସ୍ୟଙ୍କ ସହ ମିଶି ଏକ ବଡ଼ ଗୁଡ଼ିକୁ ଧରି ଡେଇଁବାକୁ ପ୍ରୟାସ କରୁଥିଲା। ପବନର ବେଗ ଅଧିକ ଥିବାରୁ ଗୁଡ଼ିଟି ଟାଣି ହୋଇଥିଲା। ଆଉ ଦେଖୁ ଦେଖୁ ଗୁଡ଼ି ସୂତା ସହ ବ୍ୟକ୍ତି ଜଣକ ୩୦ରୁ ୪୦ ଫୁଟୋ ଉପରକୁ ଉଠିଯାଇଥିଲେ।
ବ୍ୟକ୍ତି ଜଣଙ୍କୁ ଉଚ୍ଚରେ ଉଡ଼ୁଥିବାର ଦେଖି ସମସ୍ତେ ଚକିତ ହୋଇଯାଇଥିଲେ। ଯେତେବେଳେ ଗୁଡ଼ିଟି ଟିକେ ତଳକୁ ଆସିଲା, ବ୍ୟକ୍ତି ଜଣକ ସୂତାକୁ ଛାଡ଼ି ଦେଲେ ଏବଂ ତଳେ କଚାଡ଼ି ହୋଇ ପଡ଼ିଥିଲେ। ସୌଭାଗ୍ୟବଶତଃ ବ୍ୟକ୍ତି ଜଣଙ୍କର ଜୀବନ ଅଳ୍ପକେ ବର୍ତ୍ତିଯାଇଥିଲା। କିନ୍ତୁ ତଳେ ପଡ଼ିବା ଦ୍ୱାରା ତାଙ୍କୁ ସାମାନ୍ୟ ଆଘାତ ଲାଗିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
