ଅଲିମ୍ପିକ ଆସୋସିଏସନକୁ ୮.୫ କୋଟି ଟଙ୍କା ଦେବ ବିସିସିଆଇ

ଆସନ୍ତା ୨୬ ତାରିଖରୁ ଆରମ୍ଭ ହେବ ପ୍ୟାରିସ ଅଲିମ୍ପିକ୍ସ। ଏହାପୂର୍ବରୁ ଅଲିମ୍ପିକ୍ସରେ ଭାରତୀୟ କ୍ରୀଡ଼ାବୀତଙ୍କୁ ସହୟତା କରିବାକୁ ହାତ ବଢ଼ାଇଛି ବିସିସିଆଇ। ଏଥିପାଇଁ ବିସିସିଆଇ ପକ୍ଷରୁ ଭାରତୀୟ ଅଲିମ୍ପିକ୍ସ ଆସୋସିଏସନ ପାଇଁ ୮.୫ କୋଟି ଟଙ୍କା ଘୋଷଣା କରାଯାଇଛି।

ବିସିସିଆଇର ସମ୍ପାଦକ ଜୟ ଶାହ ଏହି ଆର୍ଥିକ ସହାୟତା ଘୋଷଣା କରିଛନ୍ତି। ଦେଶ ପାଇଁ ଗୌରବ ଆଣିବା ଲକ୍ଷ୍ୟରେ ଭାରତୀୟ କ୍ରୀଡ଼ାବିତମାନେ ପ୍ୟାରିସ ଯାତ୍ରା କରୁଛନ୍ତି। ୧୧୭ ଜଣ ଖେଳାଳି ବିଭିନ୍ନ ବର୍ଗରେ ଭାଗ ନେବାକୁ ସେଠାକୁ ଯାଉଛନ୍ତି। ସେମାନଙ୍କ ପାଇଁ ବିସିସିଆଇ ଏପରି ଆର୍ଥିକ ସହାୟତା କରିଛି।

ଜୟ ଶାହ ଆର୍ଥିକ ସହାୟତା ଘୋଷଣା କରିବା ସହ ଭାରତୀୟ କ୍ରୀଡ଼ାବିତଙ୍କୁ ଶୁଭେଚ୍ଛା ଜଣାଇଛନ୍ତି। ସେମାନେ ଭାରତକୁ ନିଶ୍ଚିତ ଅଲିମ୍ପିକ୍ସରେ ଗୌରବାନ୍ୱିତ କରିବେ ବୋଲି ମଧ୍ୟ ସେ ଆଶା ରଖିଛନ୍ତି।

ପ୍ୟାରିସ ଅଲିମ୍ପିକ୍ସର ବିଭିନ୍ନ କ୍ରୀଡ଼ା ଇଭେଣ୍ଟରେ ୪୭ ଜଣ ମହିଳା ଓ ୭୦ ଜଣ ପୁରୁଷ ଭାଗ ନେବେ। ଦୌଡ଼କୁଦ ଇଭେଣ୍ଟ ପାଇଁ ସର୍ବାଧିକ ୨୯ ଜଣ କ୍ରୀଡ଼ାବିତ ରହିଛନ୍ତି। ସେହିପରି ଶୁଟିଂରେ ୨୧ ଜଣ ଖେଳାଳି ପ୍ୟାରିସ ଯିବେ। ଭାରଉତ୍ତୋଳନରେ ଭାରତକୁ ପ୍ୟାରିସରେ କେବଳ ମୀରବାଈ ଚାନୁ ପ୍ରତିନିଧିତ୍ୱ କରିବେ। ୨୦୨୧ ଟୋକିଓ ଗେମ୍ସରେ ସେ ଦେଶ ପାଇଁ ରୌପ୍ୟ ପଦକ ଜିତିଥିଲେ। ଏହାବାଦ ଇକ୍ୱିଷ୍ଟ୍ରେନ, ଜୁଡୋ ଓ ରୋଇଂରେ ମଧ୍ୟ ଜଣେ ଲେଖାଏ ଭାରତୀୟ ରହିଛନ୍ତି।

ପ୍ୟାରିସ ଅଲିମ୍ପିକ୍ସକୁ ୧୧୭ କ୍ରୀଡ଼ାବିଙ୍କ ସହ ୬୭ ଜଣ କୋଚ୍‌ ଓ ୭୨ ଜଣ ସପୋର୍ଟ ଷ୍ଟାଫ ମଧ୍ୟ ଯାଉଛନ୍ତି। ପ୍ରଥମଥର ପାଇଁ ଏତେ ସଂଖ୍ୟକ କୋଚ ଓ ସପୋର୍ଟ ଷ୍ଟାଫ ଅଲିମ୍ପିକ୍ସ ପାଇଁ ଯିବେ।