କ୍ରିକେଟର ସବୁ ଫର୍ମାଟରୁ ଅବସର ଘୋଷଣା କଲେ ଅମିତ ମିଶ୍ରା

ଦୀର୍ଘ ୨୫ ବର୍ଷର କ୍ରିକେଟ କ୍ୟାରିୟରରେ ପୂର୍ଣ୍ଣଚ୍ଛେଦ ଟାଣିଛନ୍ତି ଭେଟରାନ ଲେଗ ସ୍ପିନର ଅମିତ ମିଶ୍ରା। ଆଜି ସେ କ୍ରିକେଟର ସବୁ ଫର୍ମାଟକୁ ଅଲବିଦା କହିଛନ୍ତି। ୨୦୦୩ରେ ଭାରତ ପାଇଁ ଡେବ୍ୟୁ କରିଥିବା ଅମିତ ମିଶ୍ରା ୨୦୧୭ରେ ଶେଷଥର ବ୍ଲୁ ଜର୍ସିରେ ନଜର ଆସିଥିଲେ।

୮ ବର୍ଷ ହେଲା ଅନ୍ତର୍ଜାତୀୟ କ୍ରିକେଟରୁ ଦୂରେଇ ରହିଥିଲେ ହେଁ ୪୨ ବର୍ଷୀୟ ମିଶ୍ରା ଘରୋଇ କ୍ରିକେଟ ଓ ଆଇପିଏଲ ଖେଳୁଥିଲେ। କିନ୍ତୁ ଏବେ ସେ କ୍ରିକେଟର ସବୁ ଫର୍ମାଟରୁ ଅବସର ଘୋଷଣା କରିଛନ୍ତି। ଅମିତ ମିଶ୍ରା ୨୦୨୪ ଆଇପିଏଲରେ ଲକ୍ଷ୍ନୌ ସୁପର ଜାଏଣ୍ଟସ ପାଇଁ ଶେଷ ଥର ପ୍ରତିଯୋଗିତା ମୂଳକ କ୍ରିକେଟ ଖେଳିଥିଲେ।

ଦେଶ ପାଇଁ ୨୨ଟି ଟେଷ୍ଟ, ୩୬ଟି ଦିନିକିଆ ଓ ୧୦ଟି ଟି-୨୦ ଖେଳିଥିବା ଅମିତ ମିଶ୍ରା ମୋଟ ୧୫୬ଟି ୱିକେଟ ନେଇଛନ୍ତି। ୨୦୦୮ରେ ଭାରତ ପାଇଁ ଟେଷ୍ଟ କ୍ରିକେଟରେ ଡେବ୍ୟୁ କରିଥିଲେ ଅମିତ ମିଶ୍ରା। ଅଷ୍ଟ୍ରେଲିଆ ବିପକ୍ଷ ଡେବ୍ୟୁ ଟେଷ୍ଟରେ ସେ ୫ଟି ୱିକେଟ ଦଖଲ କରିଥିଲେ।

ଆଇପିଏଲରେ ବିଭିନ୍ନ ପ୍ରାଞ୍ଚାଇଜ ପକ୍ଷରୁ ଖେଳି ଅମିତ ନିଜର ଦକ୍ଷତା ଦେଖାଇଥିଲେ। ସେ ୧୬୨ଟି ଆଇପିଏଲ ମ୍ୟାଚ୍‌ରେ ମୋଟ ୧୭୪ଟି ୱିକେଟ ନେଇଛନ୍ତି। ସେ ଏକମାତ୍ର ବୋଲର ଭାବେ ଆଇପିଏଲରେ ୩ଥର ହ୍ୟାଟ୍ରିକ ନେଇଥିଲେ। ୨୦୦୮ରେ ଦିଲ୍ଲୀ ଡେୟାର ଡେଭିଲ୍ସ, ୨୦୧୧ରେ ଡେକାନ ଚାର୍ଜର୍ସ ଓ ୨୦୧୩ରେ ସନ ରାଇଜର୍ସ ହାଇଦ୍ରାବାଦ ପାଇଁ ଖେଳିବା ବେଳେ ସେ ଏପରି ବିରଳ ରେକର୍ଡର ଅଧିକାରୀ ହୋଇଥିଲେ। ଏହି ଦଳ ବ୍ୟତୀତ ସେ ଲକ୍ଷ୍ନୌ ପାଇଁ ମଧ୍ୟ ୨୦୨୪ରେ ଖେଳିଥିଲେ। 

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ୨୦୨୨ ଆଇପିଏଲକୁ ଛାଡ଼ି ଅମିତ ମିଶ୍ରା ଆଇପିଏଲର ବାକି ସଂସ୍କରଣରେ ମ୍ୟାଚ ଖେଳିଥିଲେ। ୨୦୦୮ରୁ ୨୦୨୪ ଯାଏ ଅନୁଷ୍ଠିତ ଆଇପିଏଲରେ ଅମିତ ମିଶ୍ରା ନିଜର ଦବଦବା ଦେଖାଇଥିଲେ। ଘରୋଇ କ୍ରିକେଟରେ ଅମିତ ମିଶ୍ରା ହରିୟାଣରୁ ନିଜର ଅଭିଯାନ ଆରମ୍ଭ କରିଥିଲେ। ୨୦୦୦-୦୧ରେ ସେ ପ୍ରଥମ ଶ୍ରେଣୀ କ୍ରିକେଟରେ ଡେବ୍ୟୁ କରି ସମସ୍ତଙ୍କୁ ପ୍ରଭାବିତ କରିଥିଲେ।

୨୦୦୩ରେ ଭାରତ ପାଇଁ ସେ ଦକ୍ଷିଣ ଆଫ୍ରିକା ବିପକ୍ଷ ଦିନିକିଆରେ ଡେବ୍ୟୁ କରିଥିଲେ। ସେହି ସମୟରେ ହରଭଜନ ସିଂହ ଓ ଅନୀଲ କୁମ୍ବଲେ ଟେଷ୍ଟ କ୍ରିକେଟରେ ନିଜ ସ୍ଥାନ ସୁରକ୍ଷିତ କରି ସାରିଥିଲେ। ତେଣୁ ୨୦୦୩ରେ ଦିନିକିଆରେ ଡେବ୍ୟୁ କରିଥିବା ମିଶ୍ରା ୨୦୦୮ରେ ଦେଶ ପାଇଁ ଟେଷ୍ଟ ଖେଳିବାର ସୁଯୋଗ ପାଇଥିଲେ। ଅନୀଲ କୁମ୍ବଲେ ଆହତ ହେବାରୁ ମିଶ୍ରାଙ୍କୁ ସୁଯୋଗ ମିଳିଥିଲା। ଡେବ୍ୟୁ ଟେଷ୍ଟରେ ହିଁ ସେ ୫ ୱିକେଟ ଦଖଲ କରି ନିଜ ଯାଦୁ ଦେଖାଇଥିଲେ। ୨୦୧୩ ଚାମ୍ପିୟନ୍ସ ଟ୍ରଫି ଓ ୨୦୧୪ ଟି-୨୦ ବିଶ୍ୱକପ ଦଳରେ ମଧ୍ୟ ଅମିତ ମିଶ୍ରା ରହିଥିଲେ।

Today, after 25 years, I announce my retirement from cricket — a game that has been my first love, my teacher, and my greatest source of joy.

This journey has been filled with countless emotions — moments of pride, hardship, learning, and love. I am deeply grateful to the BCCI,… pic.twitter.com/ouEzjU8cnp

— Amit Mishra (@MishiAmit) September 4, 2025

୧୫୨ ପ୍ରଥମ ଶ୍ରେଣୀ କ୍ରିକେଟରେ ୫୩୫ ୱିକେଟ ନେଇଥିବା ମିଶ୍ରା ୧୫୨ଟି ଲିଷ୍ଟ ଏ ମ୍ୟାଚରେ ୨୫୨ଟି ଓ ୨୫୯ଟି ଟି-୨୦ରେ ୨୮୫ଟି ସଫଳତା ପାଇଛନ୍ତି। ଦକ୍ଷ ସ୍ପିନରର ମାନ୍ୟତା ପାଇଥିବା ଅମିତ ମିଶ୍ରା ୨୦୧୨ ରଣଜୀ ଟ୍ରଫିର କର୍ଣ୍ଣାଟକା ବିପକ୍ଷ ମ୍ୟାଚରେ ଅପରାଜିତ ୨୦୨ ରନର ଇନିଂସ ଖେଳିଥିଲେ।