ଐତିହାସିକ ଫାଇନାଲ୍ ପାଇଁ ଟିମ୍ ଇଣ୍ଡିଆ ଏକାଦଶ ଘୋଷିତ

ସାଉଥାମ୍ପଟନ୍: ଆଇସିସି ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ୍ ପାଇଁ ବିସିସିଆଇ ଭାରତର ଚୂଡ଼ାନ୍ତ ଏକାଦଶ ଘୋଷଣା କରିଛି। ଟିମ୍ ମ୍ୟାନେଜମେଣ୍ଟ ଚୂଡ଼ାନ୍ତ ଏକାଦଶରେ ଦୁଇ ସ୍ପିନର ରବିଚନ୍ଦ୍ରନ୍ ଅଶ୍ୱିନ୍ ଓ ରବୀନ୍ଦ୍ର ଜାଡେଜାଙ୍କୁ ସାମିଲ୍ କରିଥିବା ତିନି ପେସରଙ୍କୁ ସ୍ଥାନ ଦେଇଛି। ତେବେ ଯୁବ ପେସର୍ ମହମ୍ମଦ ସିରାଜ୍ ଏକାଦଶରୁ ବାଦ୍ ପଡ଼ିଛି। ଅଭିଜ୍ଞ ଈଶାନ୍ତ ଶର୍ମାଙ୍କ ସ୍ଥାନରେ ସିରାଜଙ୍କୁ ସୁଯୋଗ ମିଳିବ ବୋଲି ଚର୍ଚ୍ଚା ହେଉଥିଲା, କିନ୍ତୁ ଏହା ହେଲା ନାହିଁ।

୨୦୧୪ ପରେ ଉଭୟ ଅଶ୍ୱିନ୍ ଓ ଜାଡେଜା ଦ୍ୱିତୀୟଥର ଲାଗି ଇଂଲଣ୍ଡରେ ଏକାଠି ଟେଷ୍ଟ ମ୍ୟାଚ୍ ଖେଳିବେ। ଇଂଲଣ୍ଡରେ ଅଶ୍ୱିନଙ୍କ ବୋଲିଂ ହାର ୩୨.୯୨ ଓ ବ୍ୟାଟିଂ ହାର ୨୫.୭୭ ରହିଥିବା ବେଳେ ଜାଡେଜାଙ୍କ ବ୍ୟାଟିଂ ଆଭରେଜ୍ ୫୫ ଓ ବୋଲିଂ ଆଭରେଜ୍ ୪୨.୩୭ ରହିଛି। ଉଭୟ କ୍ରିକେଟର୍ ୨୦୧୪ ଓ ୨୦୧୮ ଇଂଲଣ୍ଡ ଗସ୍ତରେ ଅତିକମରେ ୫ଟ ଟେଷ୍ଟ ଖେଳିଥିଲେ ।

ଟିମ୍ ମ୍ୟାନେଜମେଣ୍ଟ ଓପ୍ନର ଭାବେ ରୋହିତ୍ ଶର୍ମା ଓ ଶୁବମନ୍ ଗିଲଙ୍କୁ ସାମିଲ୍ କରିଛି। ସେହିପରି ଅଭିଜ୍ଞ ଚେତେଶ୍ୱର ପୂଜାରା ତୃତୀୟ, କ୍ୟାପଟେନ୍ ବିରାଟ୍ କୋହଲି ଚତୁର୍ଥ ଓ ଆଜିଙ୍କ୍ୟ ରାହାଣେ ପଞ୍ଚମ ସ୍ଥାନରେ ବ୍ୟାଟିଂ କରିବେ। ଋଷଭ ପନ୍ତଙ୍କୁ ୱିକେଟ୍ କିପର ଭାବେ ସ୍ଥାନ ମିଳିଛି।

https://twitter.com/BCCI/status/1405522436850782213?s=20

ଟିମରେ ତିନି ଜଣ ପେସର୍ ଯଥା ମହମ୍ମଦ ଶାମି, ଈଶାନ୍ତ ଶର୍ମା ଓ ଯଶପ୍ରୀତ ବୁମ୍ରାଙ୍କୁ ସାମିଲ୍ କରାଯାଇଛି। ତେବେ ନ୍ୟୁଜିଲ୍ୟାଣ୍ଡ୍ ଟିମ୍ ଏଯାଏ ଚୂଡ଼ାନ୍ତ ଏକାଦଶ ଘୋଷଣା କରିନାହିଁ। ଫାଇନାଲ୍ ମ୍ୟାଚ୍ ଇଂଲଣ୍ଡର ସାଉଥାମ୍ପଟନ ଠାରେ୍ ଶୁକ୍ରବାରଠାରୁ ଆରମ୍ଭ ହେବ । ମ୍ୟାଚ୍ ଭାରତୀୟ ସମୟ ଅନୁସାରେ ଅଧ ଘଣ୍ଟା ପୂର୍ବରୁ ଅର୍ଥାତ୍ ଅପରାହ୍ଣ ୩ରେ ଆରମ୍ଭ ହେବ। ଫଳରେ ଟସ୍ ଅପରାହ୍ଣ ୨.୩୦ରେ ପଡ଼ିବ।

ଚୂଡ଼ାନ୍ତ ଏକାଦଶ: ରୋହିତ୍ ଶର୍ମା, ଶୁବମନ ଗିଲ୍‌, ଚେତେଶ୍ୱର ପୂଜାରା, ବିରାଟ୍‌ କୋହଲି (କ୍ୟାପଟେନ୍), ଆଜିଙ୍କ୍ୟ ରାହାଣେ, ଋଷଭ ପନ୍ତ (ୱିକେଟକିପର), ରବୀନ୍ଦ୍ର ଜାଡେଜା, ଆର୍ ଅଶ୍ୱିନ୍, ଯଶପ୍ରୀତ ବୁମ୍ରା, ଈଶାନ୍ତ ଶର୍ମା ମହମ୍ମଦ ଶାମି।