ଚେନ୍ନାଇ ସୁପର କିଙ୍ଗସର ଅଧିନାୟକ ମହେନ୍ଦ୍ର ସିଂହ ଧୋନି ଆଗକୁ ସମ୍ଭବତଃ ବଡ଼ ସର୍ପାଇଜ ଦେବାକୁ ଯାଉଛନ୍ତି। କାରଣ ସବୁବେଳେ ସୋଶାଲ ମିଡିଆ ଓ ମୋବାଇଲରୁ ଦୂରରେ ରହୁଥିବା ଧୋନିଙ୍କ ଫେସବୁକ ପୋଷ୍ଟ ବେଶ ଭାଇରାଲ ହେବାରେ ଲାଗିଛି।
ନିଜ ପୋଷ୍ଟରେ ଧୋନି ନୂଆ ଭୂମିକା ଉଲ୍ଲେଖ କରିଛନ୍ତି। ବାସ୍ ନୂଆ ଭୂମିକା କଥା କହିବା ପରେ କ୍ରିକେଟ ପ୍ରେମୀ ଓ ଧୋନିଙ୍କ ଫ୍ୟାନ୍ସ ବିଭିନ୍ନ ପ୍ରକାରର ଆକଳନ କରିବାରେ ଲାଗିଛନ୍ତି। ଆସନ୍ତା ଆଇପିଏଲରେ କ’ଣ ଧୋନି କୌଣସି ନୂଆ ଭୂମିକାରେ ଆସିବେ କି ବୋଲି ପ୍ରଶ୍ନ ମଧ୍ୟ ସମସ୍ତଙ୍କ ମନରେ ଉଙ୍କି ମାରୁଛି।
Also Read
ଧୋନି ନିଜ ଫେସବୁକ ପୋଷ୍ଟରେ ଲେଖିଛନ୍ତି ଯେ ନୂଆ ସଂସ୍କରଣ ଓ ନୂଆ ଭୂମିକା ପାଇଁ ଅପେକ୍ଷା କରି ହେଉନି। ଯୋଡ଼ି ହୋଇ ରୁହନ୍ତୁ।” ଉକ୍ତ ପୋଷ୍ଟରେ ଧୋନି ନିର୍ଦ୍ଦିଷ୍ଟ ଭାବେ ୨୦୨୪ ଆଇପିଏଲର ନୂଆ ସଂସ୍କରଣ ବିଷୟରେ କହି ନାହାନ୍ତି। ତଥାପି ଫ୍ୟାନ୍ସ ଆଇପିଏଲ ସହ ଧୋନିଙ୍କ ପୋଷ୍ଟକୁ ଯୋଡ଼ିବାରେ ଲାଗିଛନ୍ତି। ଧୋନିଙ୍କ ପୋଷ୍ଟ ମାତ୍ର କିଛି ମିନିଟ ମଧ୍ୟରେ ସୋଶାଲ ମିଡିଆରେ ଭାଇରାଲ ହେବାରେ ଲାଗିଛି। ଫ୍ୟାନ୍ସଙ୍କ ମଧ୍ୟରେ ବି ଧୋନିଙ୍କ ନୂଆ ଭୂମିକାକୁ ବେଶ ଉତ୍କଣ୍ଠା ପ୍ରକାଶ ପାଇଛି।
୨୦୨୪ ଆଇପିଏଲର ପ୍ରଥମ ମ୍ୟାଚ୍ ଧୋନିଙ୍କ ଚେନ୍ନାଇ ଓ ଆରସିବି ମଧ୍ୟରେ ଖେଳାଯିବ। ମାର୍ଚ୍ଚ ୨୨ରେ ଏହି ମ୍ୟାଚ ଅନୁଷ୍ଠିତ ହେବ। ୨୦୨୩ରେ ଚେନ୍ନାଇ ଆଇପିଏଲ ୫ମ ଥର ପାଇଁ ଜିତିଥିଲା।
ଧୋନି ମଧ୍ୟ ଆଇପିଏଲ ପରେ କୌଣସି ପ୍ରକାରର କ୍ରିକେଟ ଖେଳି ନାହାନ୍ତି। ସେ ସିଧାସଳଖ ୨୦୨୪ ଆଇପିଏଲରେ ମୈଦାନକୁ ଓହ୍ଲାଇବେ। ହେଲେ ସେ ଆଜି ନୂଆ ଭୂମିକା କଥା କହିଥିବାରୁ ସମ୍ଭବତଃ ଆଇପିଏଲରେ କେବଳ ଇମ୍ପାକ୍ଟ ଖେଳାଳି ଭାବେ ନଜର ଆସି ପାରନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
