ଟି-୨୦ରେ ଏହି ବଡ଼ ରେକର୍ଡ କଲେ ଗ୍ଲେନ ମ୍ୟାକ୍ସୱେଲ

ଟି-୨୦ କ୍ରିକେଟରେ ବଡ଼ ରେକର୍ଡ କରିଛନ୍ତି ଅଷ୍ଟ୍ରେଲିଆର ବିସ୍ଫୋରକ ବ୍ୟାଟର ଗ୍ଲେନ ମ୍ୟାକ୍ସୱେଲ। ସେ ଅଷ୍ଟ୍ରେଲିଆର ତୃତୀୟ ବ୍ୟାଟର ଭାବେ ପୁରୁଷ ଟି-୨୦ କ୍ରିକେଟରେ ୧୦ ହଜାର ରନ ପୂରଣ କରିପାରିଛନ୍ତି। ତାଙ୍କ ପୂର୍ବରୁ ଅଷ୍ଟ୍ରେଲିଆର ଡାଭିଡ ୱାର୍ଣ୍ଣର(୧୨,୪୧୧) ଓ ଆରୋନ ଫିଞ୍ଚ(୧୧,୪୫୮) ଏପରି କୀର୍ତ୍ତିମାନ ହାସଲ କରିଥିଲେ।

ନିଜର ବିସ୍ଫୋରକ ବ୍ୟାଟିଂ ପାଇଁ ଜଣାଶୁଣା ମ୍ୟାକ୍ସୱେଲ ବିଭିନ୍ନ ଟି-୨୦ ଲିଗ ଓ ଅଷ୍ଟ୍ରେଲିଆ ପାଇଁ ନିୟମିତ ଖେଳି ଆସୁଛନ୍ତି। ଆଜି ସେ ପାକିସ୍ତାନ ବିପକ୍ଷ ପ୍ରଥମ ଟି-୨୦ରେ ୧୯ ବଲରେ ୪୩ ରନର ଇନିଂସ ଖେଳିବା ପରେ ଏପରି ରେକର୍ଡର ଅଧିକାରୀ ହୋଇଛନ୍ତି। ସେ ୧୯ ବଲରେ ୪୩ ରନ କରିବା ପରେ ଆବ୍ବାସ ଆଫ୍ରିଦିଙ୍କ ବଲରେ ଆଉଟ ହୋଇଛନ୍ତି।

'This is why people pay a lot of money to watch this guy bat' #AUSvPAK pic.twitter.com/Zwab5Pnw3j
— cricket.com.au (@cricketcomau) November 14, 2024

ମ୍ୟାକ୍ସୱେଲ ବିଶ୍ୱର ୧୬ତମ ବ୍ୟାଟର ଭାବେ ୧୦ ହଜାର ରନ କ୍ଲବରେ ସାମିଲ ହେବାର ରେକର୍ଡ କରିଛନ୍ତି। ତାଲିକାର ୧ନଂ ସ୍ଥାନରେ କ୍ରିସ ଗେଲ ରହିଛନ୍ତି। ସେ ୪୬୩ ଟି-୨୦ ମ୍ୟାଚ୍‌ରେ ୧୪,୫୬୨ ରନ କରିଛନ୍ତି।

ଅନ୍ୟପକ୍ଷରେ ଆଜି ଅଷ୍ଟ୍ରେଲିଆ ଓ ପାକିସ୍ତାନ ଟି-୨୦ ବର୍ଷା ଯୋଗୁ ୭ ଓଭର ବିଶିଷ୍ଟ ହୋଇଥିଲା। ମ୍ୟାକ୍ସୱେଲଙ୍କ ୪୩ ରନ ଯୋଗୁ ଅଷ୍ଟ୍ରେଲିଆ ୭ ଓଭରରେ ୭ ୱିକେଟ ହରାଇ ୯୩ ରନ କରିଥିଲା। ଏହାର ଜବାବରେ ପାକିସ୍ତାନ ୯ ୱିକେଟ ହରାଇ କେବଳ ୬୪ ରନ କରିବାକୁ ସକ୍ଷମ ହୋଇଛି।