ଆକାଶରେ ସକାଳୁ କଳା ବାଦଲ ରହିଥିଲା। ବେଶ କିଛି ଦିନ ଧରି ବେଙ୍ଗାଲୁରୁର ଚିନାସ୍ୱାମୀ ପିଚ୍କୁ ଘୋଡ଼ାଇ ରଖାଯାଇଥିଲା। ଏସବୁ ସତ୍ତ୍ୱେ ଭାରତୀୟ ଟିମର ଅଧିନାୟକ ରୋହିତ ଶର୍ମା ନ୍ୟୁଜିଲ୍ୟାଣ୍ଡ ବିପକ୍ଷରେ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲେ। ଏହା ଏକ ସାହାସିକତା ପଦକ୍ଷେପ ଥିଲା। କିନ୍ତୁ ଟସ୍ ଜିତି ପ୍ରଥମେ ବ୍ୟାଟିଂ କରିବା ଆୟୋଜକ ଭାରତ ପାଇଁ ବୁମେରାଂ ହୋଇଛି।
ଦଳ ମାତ୍ର ୪୬ ରନରେ ଅଲଆଉଟ ହୋଇ ଲଜ୍ଜାଜନକ ରେକର୍ଡର ଅଧିକାରୀ ହୋଇଛି। ପୂର୍ବରୁ କେବେ ବି ଭାରତୀୟ ଟିମ ଘରୋଇ ପରିବେଶରେ ୫୦ ରନ ଭିତରେ ଅଲଆଉଟ ହୋଇ ନଥିଲା। ଭାରତରେ ଦଳର ସର୍ବନିମ୍ନ ଟେଷ୍ଟ ସ୍କୋର ଥିଲା ୭୫। ୧୯୮୭ରେ ୱେଷ୍ଟଇଣ୍ଡିଜ ବିପକ୍ଷ ଟେଷ୍ଟରେ ଭାରତ ୭୫ ରନରେ ଅଲଆଉଟ ହୋଇଥିଲା। ଏବେ କିନ୍ତୁ ଭାରତ ଲଜ୍ଜାଜନକ ରେକର୍ଡର ଅଧିକାରୀ ହୋଇଛି।
ନ୍ୟୁଜିଲ୍ୟାଣ୍ଡ ପାଇଁ ମ୍ୟାଟ ହେନରୀ ୧୫ ରନରେ ୫ ୱିକେଟ ନେଇଥିବା ବେଳେ ୱିଲିୟମ ଓ‘ରୁରକି ୨୨ ରନରେ ୪ ୱିକେଟ ନେଇ ବିପର୍ଯ୍ୟୟ ଘଟାଇଛନ୍ତି। ଭାରତର ବ୍ୟାଟିଂ ଲାଇନଅପ ତାସର ଘର ଭଳି ଭୁଶୁଡ଼ି ପଡ଼ିଛି। ୬ ଜଣ ଭାରତୀୟ ବ୍ୟାଟର ଖାତା ଖୋଲିବାକୁ ସକ୍ଷମ ହୋଇ ନାହାନ୍ତି। ଦୁଇ ଜଣ ବ୍ୟାଟର କେବଳ ଦୁଇ ଅଙ୍କ ଛୁଇଁ ପାରିଛନ୍ତି।
Also Read
ଦଳ ପାଇଁ ସବୁଠାରୁ ଅଧିକ ରନ ଋଷଭ ପନ୍ତ ୨୦ କରିଥିବା ବେଳେ ତାଙ୍କ ପଛକୁ ଯଶସ୍ୱୀ ଜୈସୱାଲ(୧୩) ରହିଛନ୍ତି। ଦ୍ୱିତୀୟ ଦିନର ଲଞ୍ଚ ସୁଦ୍ଧା ଭାରତ ମାତ୍ର ୩୪ ରନ କରିଥିବା ବେଳେ ୬ ଜଣ ବ୍ୟାଟର ପ୍ୟାଭିଲିୟନ ଫେରି ସାରିଥିଲେ। ରୋହିତ(୨), ବିରାଟ କୋହଲି(୦), ସର୍ଫରାଜ ଖାନ(୦), କେଏଲ ରାହୁଲ(୦), ରବୀନ୍ଦ୍ର ଜାଡେଜା(୦) ଓ ରବିଚନ୍ଦ୍ରନ ଅଶ୍ୱିନ(୦) ଆଦୌ ପିଚକୁ ପଢ଼ି ପାରି ନଥିଲେ। ଦ୍ରୁତ ବୋଲରଙ୍କ ସୁଇଂରେ ଭାରତୀୟ ବ୍ୟାଟର ଘାଇଲା ହୋଇ ପ୍ୟାଭିଲିୟନ ଫେରିଥିଲେ।
ପ୍ରଥମ ଥର ପାଇଁ ଘରୋଇ ପରିବେଶରେ ଖେଳା ଯାଉଥିବା କୌଣସି ଟେଷ୍ଟରେ ଭାରତର ଟପ୍ ୭ ବ୍ୟାଟରଙ୍କ ମଧ୍ୟରୁ ୪ ଜଣ ବ୍ୟାଟର ଖାତା ଖୋଲିବାକୁ ସକ୍ଷମ ହୋଇ ନାହାନ୍ତି। ୧୯୬୯ ପରେ ପ୍ରଥମଥର ପାଇଁ ଭାରତ ୬ ୱିକେଟ ହରାଇ ୩୪ ରନ କରିବାର ଲଜ୍ଜାମୁଣ୍ଡାଇଛି। ପୂର୍ବରୁ ୧୯୬୯ରେ ହାଇଦ୍ରାବାଦ ଟେଷ୍ଟରେ ଭାରତୀୟ ଟିମ ନ୍ୟୁଜିଲ୍ୟାଣ୍ଡ ବିପକ୍ଷରେ ୬ ୱିକେଟ ହରାଇ ୨୭ ରନ କରିଥିଲା। ପନ୍ତ ଓ ଜୈସୱାଲଙ୍କୁ କିଛି ସମୟ ଛାଡ଼ି ଦେଲେ ବାକି ବ୍ୟାଟର କ୍ୱିୱି ଟିମର ସୁଇଂକୁ ବୁଝି ପାରି ନଥିଲେ।
ଗୋଟିଏ ପରେ ଗୋଟିଏ ୱିକେଟ ଝଡ଼ିବା ସହ ପ୍ରଥମେ ବ୍ୟାଟିଂ କରିବା ଭାରତ ପାଇଁ ବୁମେରାଂ ସାବ୍ୟସ୍ତ ହୋଇଥିଲା। କେବଳ ଟସ୍ ନୁହେଁ, ଭାରତ ମଧ୍ୟ ତା’ ବୋଲିଂ କମ୍ବିନେସନରେ ଗୋଟିଏ ପରିବର୍ତ୍ତନ କରିଛି।
ବେଙ୍ଗାଲୁରୁ ଟେଷ୍ଟରେ ଦଳ କୁଲଦୀପ ଯାଦବଙ୍କ ରୂପରେ ଅତିରିକ୍ତ ସ୍ପିନରଙ୍କୁ ଖେଳାଉଛନ୍ତି। ଦ୍ରୁତ ବୋଲର ଆକାଶ ଦୀପଙ୍କ ବଦଳରେ ତାଙ୍କୁ ଚୂଡ଼ାନ୍ତ ଏକାଦଶରେ ରଖାଯାଇଛି।
ଲଞ୍ଚ ପରେ କଳା ବାଦଲ ଆକାଶରୁ ଉଭାନ ହୋଇଯାଇଛି। ଟାଣ ଖରା ମାରିବା ଆରମ୍ଭ ହୋଇଛି। ଏପରି ସ୍ଥିତିରେ ସ୍ପିନ କେତେ ଦୂର କାମ କରୁଛି, ତା’ ଉପରେ ଏବେ ସମସ୍ତଙ୍କ ନଜର। କାରଣ ଭାରତ ୩ ସ୍ପିନରଙ୍କ ସହ ନ୍ୟୁଜିଲ୍ୟାଣ୍ଡକୁ ଆଟାକ କରିବ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
