ଭାରତ-ପାକ ହାଇ ଭୋଲଟେଜ ମ୍ୟାଚ୍: ହାର୍ଦ୍ଦିକ ପାଣ୍ଡ୍ୟା ଓ ସୂର୍ଯ୍ୟକୁମାରଙ୍କ ଉପରେ ନଜର

ନୂଆଦିଲ୍ଲୀ: ସୁପର ସଣ୍ଡେରେ ଆଜି ପୁଣି ଏକ ହାଇ ଭୋଲଟେଜ ମ୍ୟାଚ୍।  ଏସିଆକପରେ ପାରମ୍ପରିକ ପ୍ରତିଦ୍ୱନ୍ଦୀ ପାକିସ୍ତାନକୁ ଭେଟିବ ଟିମ୍ ଇଣ୍ଡିଆ।  ମାତ୍ର ୮ ଦିନ ମଧ୍ୟରେ ଦୁଇଦଳ ପରସ୍ପରକୁ ଭେଟିବେ।  ଏଥିପାଇଁ କ୍ରୀଡାପ୍ରେମୀଙ୍କ ମଧ୍ୟରେ ବେଶ ଉତ୍ସାହ ରହିଛି । ଦୁବାଇରେ ଖେଳାଯିବାକୁ ଥିବା ଏହି ମ୍ୟାଚ ଜିତି ଭାରତ ଫାଇନାଲ ଖେଳିବାକୁ ନିଜର ଦାବି ଦୃଢ କରିବ।  ଟିମ୍ ଇଣ୍ଡିଆ ଏବେ ଚମତ୍କାର ଫର୍ମରେ ଅଛି ।  ବିଶେଷ କରି ହାର୍ଦ୍ଦିକ ପାଣ୍ଡ୍ୟା ଓ ସୂର୍ଯ୍ୟକୁମାର ଯାଦବ ଯେ କୌଣସି ଦଳକୁ ଅଡୁଆରେ ପକାଇ ପାରନ୍ତି ।  ଆହତ କାରଣରୁ ଅଲରାଉଣ୍ଡର ରବୀନ୍ଦ୍ର ଜାଡେଜା ଦଳରୁ ବାଦ ପଡିଛନ୍ତି । ସେ ଆସନ୍ତା ଟି –ଟ୍ୱେଣ୍ଟି ବିଶ୍ୱକପରୁ ବାଦ ପଡିବା ଆଶଙ୍କା ରହିଛି ।  ଆହତ ସମସ୍ୟା ପାକିସ୍ତାନ ପାଇଁ ମଧ୍ୟ ଚିନ୍ତାର କାରଣ ପାଲଟିଛି । ଦ୍ରୁତ ବୋଲର ଶାହନାଓ଼୍ବାଜ ଦହାନୀ ଦଳରୁ ବାଦ ପଡିଛନ୍ତି।  ପୂର୍ବରୁ ଆହତ କାରଣରୁ ସାହିନ୍ ଆଫ୍ରିଦି ଓ ମହମ୍ମଦ ୱାସିମ୍ ଦଳରୁ ବାଦ ପଡିଛନ୍ତି ।  ଭାରତ, ପାକିସ୍ତାନ ସହ ଆଫଗାନିସ୍ତାନ ଓ ଶ୍ରୀଲଙ୍କା ସୁପର ଫୋରକୁ ଉନ୍ନୀତ ହୋଇଛନ୍ତି ।

ଆସନ୍ତା ୧୧ ତାରିଖରେ ଏସିଆକପର ଫାଇନାଲ ମ୍ୟାଚ ଖେଳାଯିବ।  ଆଜି ଲୋକେଶ ରାହୁଲଙ୍କୁ ମ୍ୟାଚରୁ ବାଦ୍ ଦିଆଯାଇପାରେ। କାରଣ ସେ  ଏବେ ଆଦୌ ଫର୍ମରେ ନାହାନ୍ତି । ଗତ ରବିବାର ପାକିସ୍ତାନ ବିପକ୍ଷ ମ୍ୟାଚରେ  ରାହୁଲ ଖାତା ଖୋଲିପାରିନଥିଲେ । ଏହାପରେ ହଂକଂ ବିପକ୍ଷ  ମ୍ୟାଚରେ  ଯଦିଓ ୩୬ ରନ୍ କରିଥିଲେ, କିନ୍ତୁ ଏଥିପାଇଁ ୩୯ଟି ବଲ୍ ଖେଳିଥିଲେ । ଅର୍ଥାତ୍  ଟି-୨୦ ଫର୍ମାଟ୍ରେ ଷ୍ଟ୍ରାଇକ୍ ରେଟ୍ ୧୦୦ ତଳକୁ ଥିଲା ତେଣୁ ଆଜିର  ମ୍ୟାଚରେ ତାଙ୍କ ସ୍ଥାନରେ ରିଷଭ ପନ୍ତ ଖେଳିବାର ଯଥେଷ୍ଟ  ସମ୍ଭାବନା ରହିଛି।   ରବୀନ୍ଦ୍ର ଜାଡ଼େଜାଙ୍କୁ ଆଜି ମ୍ୟାଚରେ ଦେଖିବାକୁ ମିଳିବ ନାହିଁ । ସେ ଆହତ  ସମସ୍ୟା ଯୋଗୁଁ ଏସିଆ କପ୍ ଟୁର୍ଣ୍ଣାମେଣ୍ଟରୁ ବାଦ୍ ପଡିଛନ୍ତି।  ତାଙ୍କ ସ୍ଥାନରେ  ଟିମରେ ଅକ୍ଷର ପଟେଲଙ୍କୁ ନିଆଯାଇଛି ।  ତେବେ ସେ ଆଜି ପ୍ଲେଇଂ  ଇଲେଭେନରେ ଖେଳିବେ ନା ନାହିଁ, ତାକୁ ନେଇ ଆଶା ଆଶଙ୍କା ରହିଛି।

ଆଜି  ଅକ୍ଷର ପଟେଲ କିମ୍ବା ଆ. ଅଶ୍ୱିନଙ୍କ ମଧ୍ୟରୁ ଜଣଙ୍କୁ ବାଛିପାରନ୍ତି  କ୍ୟାପ୍ଟେନ ରୋହିତ ଶର୍ମା । ପେସ୍ ବୋଲର  ଆବେସ୍ ଖାନ୍ ମଧ୍ୟ ଜ୍ୱରରେ  ପୀଡ଼ିତ ଥିବାରୁ ତାଙ୍କର ଖେଳିବା ନେଇ ଅନିଶ୍ଚିତତା ଦେଖାଦେଇଛି ।  ସେହିପରି ପାକିସ୍ତାନ ଟିମ୍ ମଧ୍ୟ ଆହତ ସମସ୍ୟା ନେଇ ଚିନ୍ତାରେ।  ପେସ୍  ବୋଲର ସାହାନୱାଜ ଦାହାନି ଆଘାତ ଯୋଗୁଁ  ଏସିଆ କପରୁ ବାଦ୍ ପଡିଛନ୍ତି।  ଦାହାନି ଗତ ରବିବାର ଭାରତ ବିପକ୍ଷ ମ୍ୟାଚରେ ୬ଟି ବଲରୁ ଧୂଆଁଧାର ୧୬  ରନ୍ କରିଥିଲେ।