ନୂଆଦିଲ୍ଲୀ: ଭାରତ ଓ ପାକିସ୍ତାନ କ୍ରିକେଟ୍ ପ୍ରେମୀଙ୍କ ପାଇଁ ଖୁସି ଖବର। ଏପ୍ରିଲ୍ ୪ ତାରିଖରେ ଦୁଇ ଚିରପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ ମଧ୍ୟରେ ଖେଳାଯିବ ଟି-୨୦ ମ୍ୟାଚ୍। କେବଳ ଭାରତ ଓ ପାକିସ୍ତାନ ନୁହଁନ୍ତି, ତୃତୀୟ ଦଳ ଭାବେ ବାଂଲାଦେଶ ମଧ୍ୟ ମ୍ୟାଚ୍ ଖେଳିବ। ଏହି ତିନି ଦଳକୁ ନେଇ ଏକ ଦୃଷ୍ଟିହୀନ ଟ୍ରାଇ-ସିରିଜ୍ ଖେଳାଯିବ। ଟୁର୍ଣ୍ଣାମେଣ୍ଟଟି ବାଂଲାଦେଶରେ ଆୟୋଜିତ ହେବ। ହୁଏତ ଏହା ଦୃଷ୍ଟିହୀନ କ୍ରିକେଟ୍, କିନ୍ତୁ ଭାରତ ଓ ପାକିସ୍ତାନ ମଧ୍ୟରେ କୌଣସି ମ୍ୟାଚର ରୋମାଞ୍ଚ ଭରପୂର ରହିଥାଏ।
ଏହି ଟ୍ରାଇ-ସିରିଜ୍ ଏପ୍ରିଲ୍ ୨ରୁ ୮ ତାରିଖ ପର୍ଯ୍ୟନ୍ତ ଚାଲିବ। ସିରିଜର ସବୁ ଯାକ ମ୍ୟାଚ୍ ଢାକାରେ ଖେଳାଯିବ। ଟୁର୍ଣ୍ଣାମେଣ୍ଟରେ ଭାରତ ଦୁଇଥର ପାକିସ୍ତାନକୁ ଭେଟିବ। ଟୁର୍ଣ୍ଣାମେଣ୍ଟର ଉଦଘାଟନୀ ମ୍ୟାଚ୍ ଏପ୍ରିଲ୍ ୨ ତାରିଖରେ ଭାରତ ଓ ବାଂଲାଦେଶ ମଧ୍ୟରେ ଖେଳାଯିବ। ଏପ୍ରିଲ୍ ୩ ତାରିଖରେ ପାକିସ୍ତାନ ଓ ବାଂଲାଦେଶ ମଧ୍ୟରେ ମ୍ୟାଚ୍ ଖେଳାଯିବ। ୪ ତାରିଖରେ ଭାରତ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ଭେଟିବ।
ଏପ୍ରିଲ୍ ୫ ତାରିଖରେ ଭାରତ ପୁଣି ବାଂଲାଦେଶକୁ ଭେଟିବ। ୬ ତାରିଖରେ ବାଂଲାଦେଶ ଓ ପାକିସ୍ତାନ ଏବଂ ୭ ତାରିଖରେ ଭାରତ ଓ ପାକିସ୍ତାନ ଦ୍ୱିତୀୟଥର ଲାଗି ମୁହାଁମୁହିଁ ହେବେ। ଦୁଇ ଶୀର୍ଷ ଟିମ୍ ମଧ୍ୟରେ ଫାଇନାଲ୍ ମ୍ୟାଚ୍ ଏପ୍ରିଲ୍ ୮ ତାରିଖରେ ଖେଳାଯିବ।
https://twitter.com/blind_cricket/status/1376424379635015684?s=20
ବାଂଲାଦେଶର ୫୦ତମ ସ୍ୱାଧୀନତା ଦିବସ ପୂର୍ତ୍ତି ଏବଂ ଦେଶର ପ୍ରତିଷ୍ଠାତା ବଙ୍ଗବନ୍ଧୁ ଶେଖ୍ ମୁଜିବୁର ରେହମାନଙ୍କ ଜନ୍ମ ଶତବାର୍ଷିକୀ ଅବସରରେ ବାଂଲାଦେଶ ଦୃଷ୍ଟିହୀନ କ୍ରିକେଟ୍ କାଉନସିଲ୍ (ବିବିସିସି) ଓ ବିଶ୍ୱ ଦୃଷ୍ଟିହୀନ କ୍ରିକେଟ୍ (ଡବ୍ଲ୍ୟୁବିସି) ସହଯୋଗରେ ଏହି ଟୁର୍ଣ୍ଣାମେଣ୍ଟ ଖେଳାଯିବ। କୋଭିଡ୍-୧୯ ପରେ ଏହା ପ୍ରଥମ ଅନ୍ତର୍ଜାତୀୟ ଦୃଷ୍ଟିହୀନ ଟୁର୍ଣ୍ଣାମେଣ୍ଟ ହେବ।
ଗତ ୨୬ ତାରିଖରେ ଏହି ଟି-୨୦ ଟ୍ରାଇ- ସିରିଜ୍ ପାଇଁ ଭାରତୀୟ ଦଳର ଘୋଷଣା କରାଯାଇଥିଲା। ଭାରତୀୟ ଦଳରେ ତିନିଜଣ ଓଡ଼ିଆ କ୍ରିକେଟରଙ୍କୁ ସାମିଲ୍ କରାଯାଇଛି। ସେମାନେ ହେଲେ ମହମ୍ମଦ ଜାଫର ଇକବାଲ୍, କାଳିଆ ପ୍ରଧାନ ଓ ପଙ୍କଜ ଭୁଏ। ଟିମର ନେତୃତ୍ୱ ନେବେ ଅଜୟ କୁମାର ରେଡ୍ଡି। ଟୁର୍ଣ୍ଣାମେଣ୍ଟର ପ୍ରସ୍ତୁତି ପାଇଁ ପଶ୍ଚିମବଙ୍ଗର ବଙ୍ଗବାସୀ କଲେଜ ଗ୍ରାଉଣ୍ଡରେ ଆଜି ଜାତୀୟ ଦଳର କୋଚିଂ କ୍ୟାମ୍ପ ଶେଷ ହୋଇଛି।