ଡ୍ର’ ମ୍ୟାଚରେ ଅଷ୍ଟ୍ରେଲିଆକୁ ନାକେଦମ୍ କଲା ଭାରତ

ଗୋଲ୍ଡ କୋଷ୍ଟ: ଭାରତ ଓ ଅଷ୍ଟ୍ରେଲିଆ ମହିଳା ଟିମ୍ ମଧ୍ୟରେ ଖେଳାଯାଇଥିବା ଏକମାତ୍ର ଦିବାରାତ୍ର ଟେଷ୍ଟ ଡ୍ର’ ହୋଇଛି। ଭାରତୀୟ ମହିଳା ଟିମ୍ ଦ୍ୱାରା ଧାର୍ଯ୍ୟ ୨୭୨ ରନର ଲକ୍ଷ୍ୟର ପିଛା କରି ଅଷ୍ଟ୍ରେଲିଆ ମହିଳା ଟିମ୍ ୨ ୱିକେଟ୍ ହରାଇ ୩୬ ରନ୍ କରି ମ୍ୟାଚ୍ ଡ୍ର’ କରିଛି। ମ୍ୟାଚ୍ ଡ୍ର’ କରିଥିଲେ ଭାରତୀୟ ମହିଳା ଟିମ୍ ତା’ର ପ୍ରଦର୍ଶନ ଦ୍ୱାରା ଦମ୍ ଦେଖାଇଛି। ଅଷ୍ଟ୍ରେଲିଆ ପ୍ରଥମ ଇନିଂସରେ ୯ ୱିକେଟ୍ ହରାଇ ୨୪୧ ରନ୍ କରି ପାଳି ଘୋଷଣା କରିଥିଲା। ଭାରତ ଦ୍ୱିତୀୟ ଇନିଂସରେ ୩ ୱିକେଟ୍ ହରାଇ ୧୩୫ ରନ୍ କରି ପାଳି ଘୋଷଣା କରିଥିଲା। ପ୍ରଥମ ଇନିଂସରେ ଦମଦାର ଶତକ ମାରିଥିବା ସ୍ମୃତି ମନ୍ଧାନା ପ୍ଲେୟର୍ ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି।

ଉକ୍ତ ମ୍ୟାଚର ଚତୁର୍ଥ ଦିବସରେ ଅଷ୍ଟ୍ରେଲିଆ ତା’ର ପୂର୍ବଦିନର ସ୍କୋର ୧୪୩/୪ରୁ ଖେଳ ଆରମ୍ଭ କରିଥିଲା। ଦୁଇ ଅପରାଜିତ ବ୍ୟାଟର୍ସ ଏଲିସ୍ ପେରୀ ଓ ଆଶଲେ ଗାର୍ଡନର୍ ସ୍କୋରକୁ ୨୦୦ ଅତିକ୍ରମ କରାଇଥିଲେ। ଗାର୍ଡନର୍ ୫୧ ରନ୍ କରି ଆଉଟ୍ ହୋଇଥିଲେ। ଏହା ପରେ ଦଳ ନିମୟିତ ବ୍ୟବଧାନରେ ୱିକେଟ୍ ହରାଇଥିଲା। ଟିମର ସ୍କୋର ୯ ୱିକେଟରେ ୨୪୧ ରନରେ ଥିବା ବେଳେ କ୍ୟାପଟେନ୍ ମେଗ୍ ଲାନିଙ୍ଗ୍ ଇନିଂସ୍ ଘୋଷଣା କରିଥିଲେ। ପେରୀ ୬୮ ରନ୍ କରି ଅପରାଜିତ ଥିଲେ। ଭାରତ ପକ୍ଷରୁ ପୂଜା ବସ୍ତ୍ରାକର ୩ଟି, ଝୁଲଣ ଗୋସ୍ୱାମୀ, ମେଘନା ସିଂ ଓ ଦୀପ୍ତି ଶର୍ମା ୨ଟି ଲେଖାଏ ୱିକେଟ୍ ନେଇଥିଲେ।

ପ୍ରଥମ ଇନିଂସରେ ୧୪୬ ରନର ଲିଡ୍ ହାସଲ କରିଥିବା ଭାରତୀୟ ମହିଳା ଦ୍ୱିତୀୟ ଇନିଂସରେ ମଧ୍ୟ ଜବରଦସ୍ତ ବ୍ୟାଟିଂ କରିଥିଲା। ଦୁଇ ଓପ୍ନର ମନ୍ଧାନା ଓ ଶେଫାଳୀ ବର୍ମା ପ୍ରଥମ ୱିକେଟ୍ ପାଇଁ ୭୦ ରନ୍ ଯୋଡ଼ିଥିଲେ। ମନ୍ଧାନା ୩୧ ରନ୍ କରି ଆଉଟ୍ ହୋଇଥିବା ବେଳେ ଶେଫାଳୀ ୫୨ ରନର ଅର୍ଦ୍ଧଶକୀୟ ଇନିଂସ୍ ଖେଳିଥିଲେ। ପୁନମ ରାଉତ ୪୧ ଓ ଦୀପ୍ତି ଶର୍ମା ୩ ରନ୍ କରି ଅପରାଜିତ ଥିଲେ।

୨୭୨ ରନର ବିଜୟଲକ୍ଷ୍ୟର ପିଛା କରୁଥିବା ଅଷ୍ଟ୍ରେଲିଆ ୨୮ ରନରେ ୨ ୱିକେଟ୍ ହରାଇ ସଂକଟରେ ପଡ଼ିଥିଲା। ତେବେ କ୍ୟାପଟେନ୍ ଲାନିଙ୍ଗ୍ ଓ ପେରୀ ପାଖାପାଖି ୫ ଓଭର ଖେଳି ଦଳକୁ ଆଉ କ୍ଷତି ସହିବାକୁ ଦେଇନଥିଲେ। ଦଳର ସ୍କୋର ୩୬ ରନରେ ଥିଲା ବେଳେ ଉଭୟ ଦଳର କ୍ୟାପଟେନଙ୍କ ସହମତି କ୍ରମରେ ମ୍ୟାଚ୍ ଡ୍ର’ କରାଯାଇଥିଲା।