ଇଂଲଣ୍ଡର ସବୁଠାରୁ ଅଭିଜ୍ଞ ଓ ଷ୍ଟାର ବ୍ୟାଟର ବିଶ୍ୱ ରେକର୍ଡ କରିଛନ୍ତି। ସେ କ୍ରିକେଟର ଭଗବାନ ସଚିନ ତେନ୍ଦୁଲକରଙ୍କ ଠାରୁ ଆରମ୍ଭ କରି ଦକ୍ଷିଣ ଆଫ୍ରିକାର କିମ୍ବଦନ୍ତୀ କ୍ରିକେଟର ଜ୍ୟାକ କାଲିସଙ୍କ ଭଳି ଖେଳାଳିଙ୍କ ରେକର୍ଡ ଭାଙ୍ଗି ଦେଇଛନ୍ତି। ଏଥିସହ ଟେଷ୍ଟ କ୍ରିକେଟରେ ନୂଆ ଇତିହାସ ସୃଷ୍ଟି କରିଛନ୍ତି।
ଜୋ ରୁଟ ବର୍ତ୍ତମାନ ବିଶ୍ୱର ଦ୍ରୁତତମ ଖେଳାଳି ଭାବେ ଟେଷ୍ଟ କ୍ରିକେଟରେ ୧୩ ହଜାର ରନର ମାଇଲଖୁଣ୍ଟ ଅତିକ୍ରମ କରିଛନ୍ତି। ଏପରି କରି ସେ ସଚିନ, ରାହୁଲ ଡ୍ରାଭିଡ, ରିକି ପଣ୍ଟିଂ ଓ କାଲିସଙ୍କ ଭଳି କିମ୍ବଦନ୍ତୀ କ୍ରିକେଟରମାନଙ୍କୁ ପଛରେ ପକାଇ ଦେଇଛନ୍ତି। ଟ୍ରେଣ୍ଟ ବ୍ରିଜରେ ଚାଲିଥିବା ଜିମ୍ବାୱେ ବିପକ୍ଷ ମ୍ୟାଚ୍ରେ ରୁଟ ଏହି ରେକର୍ଡର ଅଧିକାରୀ ହୋଇଛନ୍ତି। ବିଶ୍ୱ ରେକର୍ଡ ଠାରୁ ସେ ମାତ୍ର ୨୮ ରନ ଦୂରରେ ଥିବା ବେଳେ ଜିମ୍ବାୱେ ବିପକ୍ଷରେ ବ୍ୟାଟିଂ କରିବାକୁ ଆସିଥିଲେ।
Also Read
ଇଂଲଣ୍ଡର ୮୦ତମ ଓଭରରେ ଭିକ୍ଟର ନୟାଉଚିଙ୍କ ବଲରେ ଏକ ରନ ନେଇ ସେ ଦ୍ରୁତତମ ବ୍ୟାଟର ଭାବେ ଟେଷ୍ଟ କ୍ରିକେଟରେ ୧୩ ହଜାର ରନ ପୂରଣ କରିଥିଲେ। ତେବେ ରୁଟ ଏହି ଇନିଂସରେ ୩୪ ରନ କରି ବ୍ଲେସିଂ ମୁଜାରବାନିଙ୍କ ବଲରେ ଆଉଟ ହୋଇଯାଇଛନ୍ତି।
ଆଉଟ ହେବା ପୂର୍ବରୁ ସେ ଟେଷ୍ଟ କ୍ରିକେଟରେ ନୂଆ କୀର୍ତ୍ତିମାନ ହାସଲ କରି ସାରିଥିଲେ। ସେ ୧୫୩ଟି ମ୍ୟାଚ୍ରେ ୧୩୦୦୦ ରନ ପୂରଣ କରିଥିବା ବେଳେ ତାଙ୍କ ତଳକୁ କାଲିସ (୧୫୯), ଡ୍ରାଭିଡ (୧୬୦), ପଣ୍ଟିଂ (୧୬୨) ଓ ତେନ୍ଦୁଲକର (୧୬୩) ରହିଛନ୍ତି। ରୁଟ ଇଂଲଣ୍ଡର ପ୍ରଥମ ଓ ବିଶ୍ୱର ୫ମ ବ୍ୟାଟର ଭାବେ ଟେଷ୍ଟ କ୍ରିକେଟରେ ୧୩ ହଜାର ରନ ପୂରଣ କରିପାରିଛନ୍ତି। ୨୦୧୨ରେ ଇଂଲଣ୍ଡ ପାଇଁ ଟେଷ୍ଟ କ୍ରିକେଟରେ ଡେବ୍ୟୁ କରିଥିବା ରୁଟ ସମୟକ୍ରମେ ନିଜକୁ ବିଶ୍ୱର ଅନ୍ୟତମ ଶ୍ରେଷ୍ଠ ବ୍ୟାଟର ଭାବେ ଗଢ଼ି ତୋଳିଛନ୍ତି।
ଅନ୍ୟପକ୍ଷରେ ଟେଷ୍ଟ କ୍ରିକେଟରେ ସର୍ବାଧିକ ରନ ହାସଲ କରିଥିବା କ୍ରିକେଟରଙ୍କ ତାଲିକାର ୧ ନଂ ସ୍ଥାନରେ ଏବେ ବି ସଚିନ ତେନ୍ଦୁଲକର ୧୫୯୨୧ ରନ ସହ ରହିଛି। ଜିମ୍ବାୱେ ବିପକ୍ଷ ପ୍ରଥମ ଇନିଂସରେ ରୁଟ ୩୪ ରନ କରିବା କ୍ଷଣି ସଚିନଙ୍କ ସର୍ବକାଳୀନ ରେକର୍ଡ ଭାଙ୍ଗିବାକୁ ଆଉ ପାଦେ ଆଗେଇଛନ୍ତି। ଏବେ ସେ ସଚିନଙ୍କ ଠାରୁ ୨୯୧୬ ରନ ପଛରେ ରହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
