ଟି-୨୦ ବିଶ୍ୱକପର ଦ୍ୱିତୀୟ ସେମି ଫାଇନାଲରେ ଭାରତ ଓ ଇଂଲଣ୍ଡ ମୁହାଁମୁହିଁ ହେବାକୁ ଯାଉଛନ୍ତି। କିନ୍ତୁ ସେମି ଫାଇନାଲରେ ବର୍ଷା ସାଜିଛି ବାଧକ। ୱେଷ୍ଟଇଣ୍ଡିଜର ଗାୟାନାରେ ବର୍ଷା ଲାଗି ରହିଛି। ଏଥିପାଇଁ ନିର୍ଦ୍ଧାରିତ ସମୟରେ ଟସ୍ ପଡ଼ି ପାରି ନାହିଁ।
ଆଜି ସକାଳୁ(ସ୍ଥାନୀୟ ସମୟ ଅନୁସାରେ) ଗାୟାନାରେ ବର୍ଷା ନଥିଲା। କିନ୍ତୁ ଠକ୍ ମ୍ୟାଚ୍ ପୂର୍ବରୁ ବର୍ଷା ଆରମ୍ଭ ହୋଇଯାଇଛି। ପିଚ୍ ଓ ପଡ଼ିଆ କଭର କରି ରଖାଯାଇଥିବା ବେଳେ କିଛି ସ୍ଥାନରେ ପାଣି ମଧ୍ୟ ଜମିବା ଆରମ୍ଭ କଲାଣି।
Also Read
ତେଣୁ ଭାରତୀୟ ସମୟ ୭.୩୦ରେ ଟସ୍ ପଡ଼ିବାକୁ ଥିବା ବେଳେ ଏହା ସମ୍ଭବ ହୋଇନାହିଁ। ଉଭୟ ଟିମ ଏବେ ମ୍ୟାଚ୍କୁ ଡ୍ରେସିଂ ରୁମରେ ଅପେକ୍ଷା କରି ରହିଛନ୍ତି।
ଭାରତ-ଇଂଲଣ୍ଡ ସେମି ଫାଇନାଲ ପାଇଁ କୌଣସି ପ୍ରକାରର ସଂରକ୍ଷିତ ଦିବସ ନାହିଁ। କାରଣ ସେମି ଓ ଫାଇନାଲ ମଧ୍ୟରେ କେବଳ ଗୋଟିଏ ଦିନର ଗ୍ୟାପ ରହୁଛି। ଗୁରୁବାର ସେମି ଫାଇନାଲ ଖେଳାଯିବାକୁ ଥିବା ବେଳେ ଶନିବାର ଫାଇନାଲ ଅନୁଷ୍ଠିତ ହେବ।
ତେବେ ଭାରତ ଓ ଇଂଲଣ୍ଡ ମ୍ୟାଚ ପାଇଁ ମୋଟ ୨୫୦ ମିନିଟ ବା ୪ ଘଣ୍ଟା ୧୦ ମିନିଟର ସମୟ ରଖାଯାଇଛି। ଏହାର ଅର୍ଥ ବର୍ଷା ବାଧକ ହେଲେ ମଧ୍ୟ ମ୍ୟାଚ୍ ସେହି ଦିନ ସାରିବାକୁ ଯୋଜନା ରହିଛି।
ସେହିପରି ସେମି ଓ ଫାଇନାଲ ମ୍ୟାଚ୍ର ରେଜଲ୍ଟ ପାଇଁ ସର୍ବନିମ୍ନ ୧୦ ଓଭର ରଖାଯାଇଛି। ଏହାର ଅର୍ଥ ବର୍ଷା ହେଲେ ଆଉ ୫ ଓଭର ପରେ ଡିଏଲଏସ୍ ଲାଗୁ ହେବ ନାହିଁ। ୧୦ ଓଭର ପରେ ଏହି ନିୟମ ଲାଗୁ କରାଯିବ। ଲିଗ ଓ ସୁପର ୮ରେ ଏହା ସର୍ବନିମ୍ନ ୫ ଓଭର ରହିଥିଲା।
ଯଦି ବର୍ଷା ଯୋଗୁ ଭାରତ ଓ ଇଂଲଣ୍ଡ ମ୍ୟାଚ ବାତିଲ ହୋଇଯାଏ, ତା’ହେଲେ କେଉଁ ଦଳ ଫାଇନାଲକୁ ଯିବ? ଏହାର ଉତ୍ତର ହେଉଛି ଭାରତ। କାରଣ ଭାରତ ଏଯାଏ ଅପରାଜେୟ ରହିଛି। ସୁପର ୮ରେ ୧ନଂରେ ରହି ସେମି ଫାଇନାଲକୁ ଆସିଥିବା ଦଳ ମ୍ୟାଚ୍ ବାତିଲ ହେଲେ ସିଧା ଫାଇନାଲରେ ପ୍ରବେଶ କରିବ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
