ଓଡ଼ିଶାର କ୍ରିକେଟ ପ୍ରେମୀଙ୍କ ପାଇଁ ଖୁସି ଖବର। କଟକର ବାରବାଟୀ ଷ୍ଟାଡିୟମକୁ ଫେରିବାକୁ ଯାଉଛି ଅନ୍ତର୍ଜାତୀୟ ମ୍ୟାଚ୍। ବାରବାଟୀ ଷ୍ଟାଡିୟମରେ ଦିନିକିଆ ମ୍ୟାଚ୍ ଖେଳିବେ ଭାରତ ଓ ଇଂଲଣ୍ଡ।
ଆସନ୍ତା ବର୍ଷ ଫେବୃଆରୀ ୯ ତାରିଖରେ ଏହି ମ୍ୟାଚ୍ ଅନୁଷ୍ଠିତ ହେବ। ଇଂଲଣ୍ଡ ବିପକ୍ଷ ୩ଟିକିଆ ଦିନିକିଆ ସିରିଜର ଦ୍ୱିତୀୟ ମ୍ୟାଚ୍ ବାରବାଟୀରେ ଆୟୋଜନ କରିବାକୁ ବିସିସିଆଇ ନିଷ୍ପତ୍ତି ନେଇଛି।
Also Read
ଦୀର୍ଘ ୫ ବର୍ଷ ପରେ ବାରବାଟୀକୁ ଦିନିକିଆ କ୍ରିକେଟ ଫେରିବାକୁ ଯାଉଛି। ଶେଷଥର ପାଇଁ ୨୦୧୯ ମସିହା ଡିସେମ୍ବର ୨୨ରେ ଭାରତ ଓ ୱେଷ୍ଟଇଣ୍ଡିଜ ମଧ୍ୟରେ ଦିନିକିଆ ମ୍ୟାଚ୍ ଅନୁଷ୍ଠିତ ହୋଇଥିଲା। ଭାରତ ଉକ୍ତ ମ୍ୟାଚ୍କୁ ୪ ୱିକେଟରେ ଜିତି ନେଇଥିଲା। ଏବେ ପୁଣି ଭାରତୀୟ ଟିମ ଇଂଲଣ୍ଡର ମୁକାବିଲା ବାରବାଟୀରେ କରିବାକୁ ଯାଉଛି।
ଏହାପୂର୍ବରୁ ମଧ୍ୟ ଭାରତୀୟ ଟିମ ବାରବାଟୀରେ ୨୦୧୭ରେ ଇଂଲଣ୍ଡକୁ ହରାଇଥିଲା। ଉକ୍ତ ମ୍ୟାଚରେ ମହେନ୍ଦ୍ର ସିଂହ ଧୋନି ଓ ଯୁବରାଜ ସିଂହ ଶତକ ହାସଲ କରିଥିଲେ। ଭାରତୀୟ ଟିମ ବାରବାଟୀରେ ୧୦ଟି ଦିନିକିଆ ମ୍ୟାଚ୍ ଖେଳିଥିବା ବେଳେ ୮ଟିରେ ବିଜୟୀ ହୋଇଛି।
ଏହାବାଦ ଭାରତ ଶେଷଥର ପାଇଁ ବାରବାଟୀରେ ଟି-୨୦ ମ୍ୟାଚ୍ ଦକ୍ଷିଣ ଆଫ୍ରିକା ବିପକ୍ଷରେ ଖେଳିଥିଲା। ୨୦୨୨ ମସିହା ଜୁନ ୧୨ ତାରିଖରେ ଖେଳା ଯାଇଥିବା ମ୍ୟାଚ୍ରେ ଭାରତୀୟ ଟିମ ୪ ୱିକେଟରେ ଦକ୍ଷିଣ ଆଫ୍ରିକା ଠାରୁ ହାରିଥିଲା।
ବିସିସିଆଇ ଆଜି ୨୦୨୪-୨୫ ଘରୋଇ ସିଜିନର ମ୍ୟାଚ୍ ତାରିଖ ଓ ଭେନ୍ୟୁ ଗୁଡ଼ିକର ନାଁ ଘୋଷଣା କରିଛି। ଏହି ଘାରୋଇ ସିଜିନରେ ଭାରତ ଗସ୍ତରେ ବାଂଲାଦେଶ, ନ୍ୟୁଜିଲ୍ୟାଣ୍ଡ ଓ ଇଂଲଣ୍ଡ ଆସିବେ।
ଏହି ସିଜିନ ବାଂଲାଦେଶ ବିପକ୍ଷ ୨ଟିକିଆ ଟେଷ୍ଟ ସିରିଜଜରୁ ଆରମ୍ଭ ହେବ। ଏହାପରେ ବାଂଲାଦେଶ ୩ଟି ଟି-୨୦ ମ୍ୟାଚ୍ ଖେଳିବ।
ବାଂଲାଦେଶ ସିରିଜ ପରେ ଭାରତ ଗସ୍ତରେ ଆସିବ ନ୍ୟୁଜିଲ୍ୟାଣ୍ଡ। ଦୁଇ ଦେଶ ମଧ୍ୟରେ ୩ଟିକିଆ ଟେଷ୍ଟ ସିରିଜ ଅକ୍ଟୋବର ୧୬ରୁ ଆରମ୍ଭ ହେବ। ଏହା ନଭେମ୍ବର ମାସର ପ୍ରଥମ ସପ୍ତାହ ଯାଏ ଚାଲିବ। ଏହାପରେ ଭାରତୀୟ ଟିମ ୫ ଟିକିଆ ଟେଷ୍ଟ ସିରିଜ ଖେଳିବାକୁ ଅଷ୍ଟ୍ରେଲିଆ ଯିବ।
ଭାରତୀୟ ଟିମ ଆସନ୍ତା ବର୍ଷ ଘରୋଇ ସିଜିନ ଇଂଲଣ୍ଡ ବିପକ୍ଷ ସିରିଜରୁ ଆରମ୍ଭ କରିବ। ଏହି ଗସ୍ତ ସମୟରେ ଭାରତ ଓ ଇଂଲଣ୍ଡ ମଧ୍ୟରେ ୫ଟି ଟି-୨୦ ଓ ୩ଟି ଦିନିକିଆ ମ୍ୟାଚ ଖେଳାଯିବ। ପ୍ରଥମେ ଟି-୨୦ ସିରିଜ ପରେ ଦିନିକିଆ ମ୍ୟାଚ୍ଗୁଡ଼ିକ ଆୟୋଜନ ହେବ।
ବାଂଲାଦେଶର ବିପକ୍ଷ ସିରିଜ
ପ୍ରଥମ ଟେଷ୍ଟ: ସେପ୍ଟେମ୍ବର ୧୯ରୁ ୨୩- ଚେନ୍ନାଇ
ଦ୍ୱିତୀୟ ଟେଷ୍ଟ: ସେପ୍ଟେମ୍ବର ୨୭ରୁ ଅକ୍ଟୋବର ୧- କାନପୁର
ପ୍ରଥମ ଟି-୨୦: ଅକ୍ଟୋବର ୬ ତାରିଖ – ଧର୍ମଶାଲା
ଦ୍ୱିତୀୟ ଟି-୨୦ : ଅକ୍ଟୋବର ୯ ତାରିଖ- ଦିଲ୍ଲୀ
ତୃତୀୟ ଟି-୨୦: ଅକ୍ଟୋବର ୧୨ ତାରିଖ- ହାଇଦ୍ରାବାଦ
ନ୍ୟୁଜିଲ୍ୟାଣ୍ଡ ବିପକ୍ଷ ସିରିଜ
ପ୍ରଥମ ଟେଷ୍ଟ: ଅକ୍ଟୋବର ୧୬ରୁ ୨୦ ତାରିଖ – ବେଙ୍ଗାଲୁରୁ
ଦ୍ୱିତୀୟ ଟେଷ୍ଟ: ଅକ୍ଟୋବର ୨୪ରୁ ୨୮ ତାରିଖ- ପୁଣେ
ତୃତୀୟ ଟେଷ୍ଟ: ନଭେମ୍ବର ୧ରୁ ୫ ତାରିଖ- ମୁମ୍ବାଇ
ଇଂଲଣ୍ଡ ବିପକ୍ଷ ସିରିଜ
ପ୍ରଥମ ଟି-୨୦: ଜାନୁଆରୀ ୨୨ ତାରିଖ – ଚେନ୍ନାଇ
ଦ୍ୱିତୀୟ ଟି-୨୦: ଜାନୁଆରୀ ୨୫ ତାରିଖ- କୋଲକାତା
ତୃତୀୟ ଟି-୨୦: ଜାନୁଆରୀ ୨୮ ତାରିଖ- ରାଜକୋଟ
୪ର୍ଥ ଟି-୨୦: ଜାନୁଆରୀ ୩୧ ତାରିଖ- ପୁଣେ
୫ମ ଟି-୨୦: ଫେବୃଆରୀ ୨ ତାରିଖ- ମୁମ୍ବାଇ
ପ୍ରଥମ ଦିନିକିଆ: ଫେବୃଆରୀ ୬ ତାରିଖ- ନାଗପୁର
ଦ୍ୱିତୀୟ ଦିନିକିଆ: ଫେବୃଆରୀ ୯ ତାରିଖ – କଟକ
ତୃତୀୟ ଦିନିକିଆ: ଫେବୃଆରୀ ୧୨ ତାରିଖ - ଅହମଦାବାଦ
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
