ଦୁବାଇ: ରୋମାଞ୍ଚକର ହେବ ଦିନିକିଆ ବିଶ୍ୱକପ। ଆଇସିସି ଏହାକୁ ନେଇ ବଡ଼ ନିଷ୍ପତ୍ତି ନେଇଛି। ୨୦୨୭ରେ ହେବାକୁଥିବା ଦିନିକିଆ ବିଶ୍ୱକପରେ ୧୦ ବଦଳରେ ୧୪ ଟିମ୍ ଭାଗ ନେବେ। ଟପ୍-୧୦ ଟିମ୍ ରାଙ୍କିଙ୍ଗ ଆଧାରରେ କ୍ୱାଲିଫାଏ କରିବେ। ତେବେ ବାକି ୪ ଟିମ୍ କ୍ୱାଲିଫାୟର ଆଧାରରେ ଟୁର୍ଣ୍ଣାମେଣ୍ଟରେ ଏଣ୍ଟ୍ରୀ କରିବେ।
୨୦୨୩ରେ ଭାରତରେ ହେବାକୁଥିବା ଦିନିକିଆ ବିଶ୍ୱକପରେ କେବଳ ୧୦ ଟିମକୁ ଖେଳିବାକୁ ସୁଯୋଗ ମିଳିବ। ଏଥିପାଇଁ ଦିନିକିଆ ସୁପର୍ ଲିଗ୍ ଖେଳାଯାଉଛି। ଛୋଟ ଦେଶ ଗୁଡ଼ିକୁ ବଡ଼ ଟୁର୍ଣ୍ଣାମେଣ୍ଟରେ ଯୋଡ଼ିବା ପାଇଁ ଆଇସିସି ଏହି ନିଷ୍ପତ୍ତି ନେଇଛି।
ଆଇସିସି ବୋର୍ଡ ୨୦୨୭ରେ ହେବାକୁଥିବା ବିଶ୍ୱକପରେ ପରିବର୍ତ୍ତନକୁ ସ୍ୱୀକୃତି ଦେଇଛି। ୨୦୨୩ ବିଶ୍ୱକପ୍ ପାଇଁ ଆଇସିସି ୧୩ ଟିମ୍ ମଧ୍ୟରେ ସୁପର ଲିଗର ଆରମ୍ଭ କରିଛି। ଏଥିରେ ୧୨ ପୂର୍ଣ୍ଣ ସଦସ୍ୟ ବ୍ୟତୀତ ନେଦରଲ୍ୟାଣ୍ଡସକୁ ସୁଯୋଗ ଦିଆଯାଇଛି। ପ୍ରତି ଟିମକୁ ୮ଟି ଲେଖାଏ ସିରିଜ୍ ଖେଳିବାକୁ ପଡ଼ିବ। ସେଥିରୁ ୪ଟି ଘରେ ଏବଂ ୪ଟି ବାହାରେ ଖେଳାଯିବ। କିନ୍ତୁ ଏବେ ଏହି ନିୟମ ୨୦୨୭ରେ ଟିମ୍ ସଂଖ୍ୟା ବଢ଼ାଇବା ସହ ଶେଷ କରିଦିଆଯିବ।
ନିକଟରେ ଆଇସିସି ୨୦୨୪ରୁ ୨୦୩୧ ମଧ୍ୟରେ ହେବାକୁଥିବା ଆଇସିସି ଇଭେଣ୍ଟର ସିଡ୍ୟୁଲ ଜାରି କରିଛି। ଆଇସିସି ୨୦୨୭ରେ ହେବାକୁଥିବା ବିଶ୍ୱକପର ଆୟୋଜନ ଜିମ୍ବାୱେ, ନାମିବିଆ ଓ ଦକ୍ଷିଣ ଆଫ୍ରିକାକୁ ଯୁଗ୍ମ ଭାବେ ପ୍ରଦାନ କରିଛି। ନାମିବିଆ ଭଳି ଆସୋସିଏଟ୍ ଦେଶକୁ ସାମିଲ୍ କରିବା ଅର୍ଥ ଛୋଟ ଦେଶର ଫ୍ୟାନ୍ ମଧ୍ୟ ବଡ଼ ଟୁର୍ଣ୍ଣାମେଣ୍ଟକୁ ସାମ୍ନାକୁ ଦେଖିପାରିବେ। ନିକଟରେ ଟି-୨୦ ବିଶ୍ୱକପର ଆୟୋଜନ ୟୁଏଇ ବ୍ୟତୀତ ଓମାନରେ କରାଯାଇଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
