ନୂଆଦିଲ୍ଲୀ: ଲଗାତର ଦୁଇଟି ମ୍ୟାଚ୍ ହାରିବା ପରେ ଡିଫେଣ୍ଡିଂ ଚାମ୍ପିୟନ୍ ମୁମ୍ବାଇ ଇଣ୍ଡିଆନ୍ସ ଚଳିତ ଆଇପିଏଲରେ ବିଜୟ ଟ୍ରାକକୁ ଫେରିଛି । ଗୁରୁବାର ଖେଳାଯାଇଥିବା ଆଇପିଏଲର ୨୪ ମ୍ୟାଚରେ କ୍ୱିଣ୍ଟନ୍ ଡି’କକ୍ ଓ କୃନାଲ୍ ପାଣ୍ଡ୍ୟାଙ୍କ ଦମଦାର ବ୍ୟାଟିଂ ବଳରେ ମୁମ୍ବାଇ ଇଣ୍ଡିଆନ୍ସ ୭ ୱିକେଟରେ ରାଜସ୍ଥାନ ରୟାଲ୍ସକୁ ପରାସ୍ତ କରିଛି । ଉକ୍ତ ମ୍ୟାଚରେ ପ୍ରଥମେ ବ୍ୟାଟିଂ କରିଥିବା ରାଜସ୍ଥାନ ରୟାଲ୍ସ ୪ ୱିକେଟ୍ ହରାଇ ୧୭୧ ରନ୍ କରିଥିଲା । ଜବାବରେ ମୁମ୍ବାଇ ୧୮.୩ ଓଭରରେ ୩ ୱିକେଟ୍ ହରାଇ ୧୭୨ ରନ୍ କରି ବିଜୟୀ ହୋଇଛି ।
ମୁମ୍ବାଇ ପକ୍ଷରୁ ଡି’କକ୍ ସର୍ବାଧିକ ୭୦ (୫୦ ବଲ୍, ୬ ଚୌକା, ୨ ଛକା) ରନ୍ କରିଥିବା ବେଳେ କୃନାଲ୍ ମଧ୍ୟ ୩୯ (୨୬ ବଲ୍, ୨ ଚୌକା, ୨ ଛକା) ରନର ଉପଯୋଗୀ ଇନିଂସ୍ ଖେଳି ମୁମ୍ବାଇକୁ ବିଜୟୀ କରାଇଛନ୍ତି । ତେବେ କ୍ୟାପଟେନ୍ ରୋହିତ୍ ଶର୍ମା ନିରାଶ କରିଛନ୍ତି । ରାଜସ୍ଥାନ ପକ୍ଷରୁ କ୍ରିସ୍ ମୋରିସଙ୍କୁ ଛାଡ଼ି ଦେଲେ ଅନ୍ୟ କୌଣସି ବୋଲର ମୁମ୍ବାଇ ବ୍ୟାଟିଂରେ ଅଙ୍କୁଶ ଲଗାଇପାରି ନାହାନ୍ତି ।
୧୭୨ ରନର ଲକ୍ଷ୍ୟର ପିଛା କରୁଥିବା ମୁମ୍ବାଇର ଦୁଇ ଓପ୍ନର ରୋହିତ୍ ଓ ଡି’କକ୍ ପ୍ରଥମ ୱିକେଟ୍ ପାଇଁ ୪୯ ରନ୍ ଯୋଡ଼ିଥିଲେ । ରୋହିତ୍ ୧୪ ରନ୍ କରି ମୋରିସଙ୍କ ଶିକାର ହୋଇଥିଲେ । ତାଙ୍କ ସ୍ଥାନରେ ଆସିଥିବା ସୂର୍ଯ୍ୟକୁମାର ଯାଦବ (୧୬) ଭଲ ଆରମ୍ଭ କରିଥିଲେ ହେଁ ବଡ଼ ସ୍କୋର କରିପାରିନଥିଲେ । ତେବେ ଡି’କକ୍ ଓ କୃନାଲ୍ ୬୩ ରନର ଭାଗିଦାରୀ କରି ମୁମ୍ବାଇର ବିଜୟକୁ ସହଜ କରି ଦେଇଥିଲେ । ଏହା ପରେ କାଇରନ୍ ପୋଲାର୍ଡ ବ୍ୟାଟିଂ କରିବାକୁ ଦ୍ରୁତ ରନ୍ କରି ମୁମ୍ବାଇକୁ ଜିତାଇଥିଲେ । ପୋଲାର୍ଡ ୮ ବଲରେ ୨ ଚୌକା ଓ ୧ ଛକା ସହ ୧୬ ରନ୍ କରିଥିଲେ । ରାଜସ୍ଥାନ ପକ୍ଷରୁ ମୋରିସ୍ ୨ଟି ଓ ମୁସ୍ତାଫିଜୁର ରେହମାନ୍ ଗୋଟିଏ ସଫଳତା ହାସଲ କରିଥିଲେ ।
ପ୍ରଥମେ ବ୍ୟାଟିଂ କରିଥିବା ରାଜସ୍ଥାନ ପକ୍ଷରୁ ଦୁଇ ଓପ୍ନର ଜୋସ୍ ବଟଲର୍ ଓ ଯଶସ୍ୱୀ ଜୈସୱାଲ୍ ଭଲ ଆରମ୍ଭ କରିଥିଲେ । ଦୁହେଁ ପ୍ରଥମ ୱିକେଟ୍ ପାଇଁ ୬୬ ରନର ପାର୍ଟନରଶିପ୍ କରିଥିଲେ । ତେବେ ବଟଲର୍ ୪୧ (୩୨ ବଲ୍, ୩ ଚୌକା ଓ ୩ ଛକା) ରନ୍ କରିଥିବା ବେରେ ସ୍ପିନର୍ ରାହୁଲ୍ ଚହରଙ୍କ ବଲରେ ୱିକେଟ କିପର କ୍ୱିଣ୍ଟନ୍ ଡି’କକଙ୍କ ଦ୍ୱାରା ଷ୍ଟମ୍ପ୍ ଆଉଟ୍ ହୋଇଥିଲେ । ଜୈସୱାଲ୍ ମଧ୍ୟ ଭଲ ଆରମ୍ଭ କରିବା ସତ୍ତ୍ୱେ ବଡ଼ ସ୍କୋର କରିବାକୁ ସକ୍ଷମ ହୋଇନଥିଲେ । ଜୈସୱାଲ୍ ମାତ୍ର ୨୦ ବଲରେ ୨ ଚୌକା ଓ ୨ ଛକା ବଳରେ ୩୨ ରନ୍ କରି ଚହରଙ୍କ ଶିକାର ହୋଇଥିଲେ ।
କ୍ୟାପଟେନ୍ ସାମସନ୍ ଓ ଶିବମ୍ ଦୁବେ ଟିମ୍ ପାଇଁ ଉପଯୋଗୀ ରନ୍ ଯୋଡ଼ିଥିଲେ । ସାମସନ୍ ଓ ଦୁବେଙ୍କ ମଧ୍ୟରେ ତୃତୀୟ ୱିକେଟ୍ ପାଇଁ ୫୭ ରନର ଭାଗିଦାରୀ ହୋଇଥିଲା । ତେବେ ସାମସନ୍ ୪୨ (୨୭ ବଲ୍, ୫ ଚୌକା) ରନ୍ କରି ଅର୍ଦ୍ଧଶତକରୁ ବଞ୍ଚିତ ହୋଇଥିଲେ । ତାଙ୍କୁ ମୁମ୍ବାଇ ସ୍ପୀଡ୍ ଷ୍ଟାର୍ ଟ୍ରେଣ୍ଟ ବୋଲ୍ଟ କ୍ଲିନ୍ ବୋଲ୍ଡ କରିଥିଲେ । ଏହା ପରେ ଦୁବେ (୩୫)ଙ୍କୁ ପ୍ୟାଭିଲିୟନ୍ ପଠାଇଥିଲେ ଯଶପ୍ରୀତ ବୁମ୍ରା । ଦୁହିଁଙ୍କ ଆଉଟ୍ ପରେ ଦଳର ରନ୍ ଗତି ସାମାନ୍ୟ ହ୍ରାସ ପାଇଥିଲା । ରିୟାନ ପରାଗ ୮ ଓ ଡେଭିଡ୍ ମିଲର୍ ୭ ରନ୍ କରି ଅପରାଜିତ ଥିଲେ । ମୁମ୍ବାଇ ପକ୍ଷରୁ ରାହୁଲ୍ ଚହର୍ ୨ଟି, ବୋଲ୍ଟ ଓ ବୁମ୍ରା ଗୋଟିଏ ଲେଖାଏ ୱିକେଟ୍ ନେଇଛନ୍ତି ।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
