ବିଶ୍ୱକପର ଶେଷ ମ୍ୟାଚ୍ରୁ ବାଦ ପଡ଼ିଛନ୍ତି ବାଂଲାଦେଶର ଅଧିନାୟକ ସାକିବ ଅଲ ହାସନ। ଦିନକ ତଳେ ଶ୍ରୀଲଙ୍କା ବିପକ୍ଷ ମ୍ୟାଚ୍ରେ ସାକିବ ମ୍ୟାନ ଅଫ ଦି ମ୍ୟାଚ୍ ପୁରସ୍କାର ଜିତିଥିଲେ। ଏଥିସହ ଶ୍ରୀଲଙ୍କାର ଆଞ୍ଜେଲୋ ମାଥ୍ୟୁସଙ୍କ ଟାଇମଡ ଆଉଟକୁ ନେଇ ସୃଷ୍ଟି ହୋଇଥିବା ବିବାଦର ମୁଖ୍ୟ କେନ୍ଦ୍ରବିନ୍ଦୁ ଥିଲେ ସାକିବ।
ଏବେ ସେ ଆହତ ସମସ୍ୟା ଯୋଗୁ ଅଷ୍ଟ୍ରେଲିଆ ବିପକ୍ଷ ବିଶ୍ୱକପର ଶେଷ ମ୍ୟାଚ ଖେଳିବେ ନାହିଁ। ବାଂଲାଦେଶ ବିଶ୍ୱକପର ସେମି ଫାଇନାଲ ଦୌଡ଼ରୁ ବାଦ ପଡ଼ିଛି। ତେଣୁ ବାଂଲାଦେଶ ପାଇଁ ଶେଷ ମ୍ୟାଚ୍ ଆଦୌ ଗୁରୁତ୍ୱପୂର୍ଣ୍ଣ ନୁହେଁ। କିନ୍ତୁ ୨୦୨୫ ଚାମ୍ପିୟନ୍ସ ଟ୍ରଫି ପାଇଁ ବାଂଲାଦେଶକୁ ଲଢ଼େଇ କରିବାକୁ ପଡ଼ିବ। ବିଶ୍ୱକପର ଟପ୍ ୮ ଟିମ ହିଁ ପାକିସ୍ତାନରେ ଆୟୋଜିତ ହେବାକୁ ଥିବା ଚାମ୍ପିୟନ୍ସ ଟ୍ରଫିରେ ଭାଗ ନେବେ।
Also Read
ଶ୍ରୀଲଙ୍କା ବିପକ୍ଷ ମ୍ୟାଚ୍ ବେଳେ ସାକିବଙ୍କ ବାମ ହାତର ଗୋଟିଏ ଅଙ୍ଗୁଳିରେ ବଲ ମାଡ଼ ହୋଇଥିଲା। ଏହି କାରଣରୁ ସେ ଅଷ୍ଟ୍ରେଲିଆ ବିପକ୍ଷ ମ୍ୟାଚ୍ରୁ ବାଦ ପଡ଼ିଛନ୍ତି। ବାଂଲାଦେଶ ଟିମର ଫିଜିଓ ବାୟଜେଦୁଲ ଇସଲାମ କହିଛନ୍ତି, “ବାମ ହାତର ମଝି ଅଙ୍ଗୁଳିରେ ବଲ ମାଡ଼ ହୋଇଥିଲେ ମଧ୍ୟ ସାକିବ ବ୍ୟାଟିଂ କରିଥିଲେ। ସେ ଟେପ୍ ଓ ପେନ କିଲର୍ସ ନେଇଥିଲେ।
ମ୍ୟାଚ ପରେ ତୁରନ୍ତ ତାଙ୍କର ଏକ୍ସ ରେ ହୋଇଥିଲା। ଏଥିରୁ ଅଙ୍ଗୁଳିରେ ସମାନ୍ୟ ଫ୍ୟାକଚର ଥିବା ସ୍ପଷ୍ଟ ହୋଇଛି। ଏଥିରୁ ସୁସ୍ଥ ହେବା ପାଇଁ ତାଙ୍କୁ ୩ରୁ ୪ ସପ୍ତାହ ଲାଗିପାରେ। ସେ ମଙ୍ଗଳବାର ହିଁ ବାଂଲାଦେଶ ଚାଲି ଯାଇଛନ୍ତି। ସେଠାରେ ତାଙ୍କର ରିହାବ ଆରମ୍ଭ ହେବ।”
ଶ୍ରୀଲଙ୍କା ବିପକ୍ଷରେ ସାକିବ ୮୨ ରନ କରିବା ସହ ୨ଟି ୱିକେଟ ନେଇଥିଲେ। ଏହାବାଦ ନଜମୁଲ ହୁସେନ ସାଣ୍ଟୋ ୯୦ ରନର ଇନିଂସ ଖେଳିଥିଲେ। ଏହି ଦୁଇ ଇନିଂସ ବଳରେ ଶ୍ରୀଲଙ୍କା ଦେଇଥିବା ୨୮୦ ରନର ଟାର୍ଗେଟକୁ ବାଂଲାଦେଶ ୭ ୱିକେଟ ହରାଇ ୫୩ ବଲ ପୂର୍ବରୁ ହାସଲ କରି ନେଇଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
