ବିଶ୍ୱକପର ଶେଷ ଲିଗ୍ ମ୍ୟାଚ୍ ଖେଳୁଥିବା ଭାରତ ପ୍ରତିପକ୍ଷ ନେଦରଲ୍ୟାଣ୍ଡ୍ସ ବିପକ୍ଷରେ ବିସ୍ଫୋରକ ଆରମ୍ଭ କରିଛି। ଦଳର ଅଧିନାୟକ ରୋହିତ ଶର୍ମା ଓ ଓପନର ଶୁବମନ ଗିଲ୍ ଦମଦାର ବ୍ୟାଟିଂ କରିଛନ୍ତି। ପ୍ରଥମ ଓଭର୍ରେ ରୋହିତ ୧୧ ରନ ହାସଲ କରି ଦଳକୁ ଭଲ ଷ୍ଟାର୍ଟ ଦେଇଥିବା ବେଳେ ଗିଲ୍ ବଡ଼ବଡ଼ ଶଟ ଖେଳିଥିଲେ। ଏପରି କି ସେ ୩୦ ବଲରେ ନିଜର ଅର୍ଦ୍ଧଶତକ ମଧ୍ୟ ହାସଲ କରିଥିଲେ।
ଅର୍ଦ୍ଧଶତକ ହାସଲ କରିବା ପରେ ସେ ବଡ଼ ଶଟ ଖେଳିବାକୁ ଚେଷ୍ଟା କରିଥିଲେ। କିନ୍ତୁ ୫୧ ରନ କରି ପଲ ଭାନ ମିକରନଙ୍କ ବଲରେ ବାଉଣ୍ଡରୀ ପାଖରେ କ୍ୟାଚ୍ ହୋଇ ଯାଇଛନ୍ତି। ଆଉଟ ହେବା ପୂର୍ବରୁ ସେ ରୋହିତଙ୍କ ସହ ମିଶି ପ୍ରଥମ ୱିକେଟ ପାଇଁ ୧୦୦ ରନର ଭାଗିଦାରୀ କରିଥିଲେ।
Also Read
୩୨ ବଲରେ ୫୧ ରନର ଇନିଂସ ଖେଳିଥିବା ଗିଲ୍ ୩ଟି ଚୌକା ଓ ୪ଟି ଛକା ମାରିଛନ୍ତି। ଏହି ୪ ଛକା ମଧ୍ୟରୁ ଗୋଟିଏ ବେଙ୍ଗାଲୁରୁର ଚିନ୍ନାସ୍ୱାମୀ ଷ୍ଟାଡିୟମର ପାର୍କିଂରେ ପଡ଼ିଥିଲା। ଆର୍ଯ୍ୟନ ଦତ୍ତଙ୍କ ବଲକୁ ସେ ଏପରି ବିଶାଳ ଛକା ମାରିଥିଲେ।
ଗିଲ୍ ଆଉଟ ହୋଇଥିଲେ ମଧ୍ୟ ରୋହିତ ଶର୍ମା ୪୪ ବଲରେ ଚଳିତ ବିଶ୍ୱକପରେ ଆଉ ଏକ ଅର୍ଦ୍ଧଶତକ ହାସଲ କରିଛନ୍ତି। ତାଙ୍କ ସହ ଇନଫର୍ମ ବିରାଟ କୋହଲି ଅଛନ୍ତି। ବେଙ୍ଗାଲୁରୁ ହେଉଛି ବିରାଟଙ୍କ ଦ୍ୱିତୀୟ ଘର। କାରଣ ୨୦୦୮ରୁ ସେ ଆଇପିଏଲରେ ଆରସିବି ପଟୁ ଖେଳି ଆସୁଛନ୍ତି। ତେଣୁ ଆଜି ତାଙ୍କ ବ୍ୟାଟରୁ ରେକର୍ଡ ୫୦ତମ ଶତକ ଦେଖିବାକୁ ସମସ୍ତେ ଅପେକ୍ଷା କରିଛନ୍ତି।
ରିପୋର୍ଟ ଲେଖା ହେବା ବେଳକୁ ଭାରତ ୧୪ ଓଭର୍ରେ ଗୋଟିଏ ୱିକେଟ ହରାଇ ୧୦୯ ରନ କରି ନେଇଛି। ରୋହିତ ୫୨ ଓ ବିରାଟ ୩ ରନ କରି ଅପରାଜିତ ରହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
