ନୂଆଦିଲ୍ଲୀ: ଶ୍ରୀଲଙ୍କା କ୍ରିକେଟ୍ ଟିମର ଅଲରାଉଣ୍ଡର ଥିସାରା ପରେରା ଗୋଟିଏ ଓଭରରେ ୬ ଛକା ମାରିବାର କୀର୍ତ୍ତିମାନ କରିଛନ୍ତି। କଲମ୍ବୋ ନିକଟରେ ଚାଲିଥିବା ଏକ ଘରାଇ ଟୁର୍ଣ୍ଣାମେଣ୍ଟରେ ପରେରା ଏହି ୬ ଛକା ମାରିଛନ୍ତି। ଏଥିସହ ପରେରା ପ୍ରଥମ ଶ୍ରୀଲଙ୍କା କ୍ରିକେଟର୍ ଭାବେ କୌଣସି ଫର୍ମାଟରେ ୬ ବଲରେ ୬ ଛକା ମାରିବାର ରେକର୍ଡ ନିଜ ନାଁରେ କରିଛନ୍ତି।
ମେଜର କ୍ଲବ୍ ଲିମିଟେଡ୍ ଓଭର୍ ଲିଷ୍ଟ-ଏ କ୍ରିକେଟ୍ ଟୁର୍ଣ୍ଣାମେଣ୍ଟରେ ଶ୍ରୀଲଙ୍କା ଆର୍ମି ପକ୍ଷରୁ ଖେଳୁଥିବା ପରେରା ବ୍ଲ୍ୟୁମଫିଲ୍ଡ କ୍ରିକେଟ୍ ଓ ଆଥଲେଟିକ୍ କ୍ଲବ୍ ବିପକ୍ଷରେ ମାତ୍ର ୧୩ ବଲରେ ୫୨ ରନର ବିସ୍ଫୋରକ ଇନିଂସ୍ ଖେଳିଛନ୍ତି। ପରେରା ନିଜ ଇନିଂସରେ ୮ଟି ବିଶାଳ ଛକା ମାରିଛନ୍ତି। ଏହି ଅର୍ଦ୍ଧଶତକ ସହ ପରେରା ଶ୍ରୀଲଙ୍କା ପାଇଁ ଲିଷ୍ଟ-ଏ କ୍ରିକେଟରେ ଦ୍ରୁତ ଅର୍ଦ୍ଧଶତକ ହାସଲକାରୀ ଦ୍ୱିତୀୟ ବ୍ୟାଟ୍ସମ୍ୟାନ୍ ହୋଇଛନ୍ତି। ଏହା ପୂର୍ବରୁ ପୂର୍ବତନ ଅଲରାଉଣ୍ଡର କୌଶଲ୍ୟ ବୀରରତ୍ନେ ୨୦୦୫ରେ ୧୨ ବଲରେ ଅର୍ଦ୍ଧଶତକ ମାରିଥିଲେ।
ଏହି ମ୍ୟାଚରେ ପରେରା ପ୍ରଥମ ତିନୋଟି ବଲରେ ଆଟାକ୍ କରିନଥିଲେ। କିନ୍ତୁ ପରବର୍ତ୍ତୀ ୧୦ ବଲରେ ୮ ଛକା ମାରି ଅର୍ଦ୍ଧଶତକ ପୂରଣ କରିଥିଲେ। ପରରେ ଦିଲନ୍ କୋରେଙ୍କ ଗୋଟିଏ ଓଭରରେ ହିଁ ଏହି ୬ଟି ଛକା ମାରିଥିଲେ। ଦିଲନ ମ୍ୟାଚରେ ୪ ଓଭର ବୋଲିଂ କରି ୭୩ ରନ୍ ବ୍ୟୟ କରିଥିଲେ।
ପରେରା ଏବେ ଗାରଫିଲ୍ଡ ସୋବର୍ସ, ରବି ଶାସ୍ତ୍ରୀ, ହର୍ସେଲ୍ ଗିବ୍ସ, ଯୁବରାଜ ସିଂହ, ରସ୍ ହ୍ୱାଇଟଲୀ, ହଜରତୁଲ୍ଲା ଜାଜାଇ, ଲିୟୋ କାର୍ଟର ଓ ନିକଟରେ କାଇରନ ପୋଲାର୍ଡଙ୍କ ପରେ ପେସାଦାର କ୍ରିକେଟର ଏହି ଉପଲବ୍ଧି ହାସଲ କରିବାରେ ଦୁନିଆର ନବମ କ୍ରିକେଟର୍ ହୋଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
