ଭାରତୀୟ ଟିମର ଦୁଇ ଆଇକନିକ କ୍ରିକେଟର ହେଉଛନ୍ତି ବିରାଟ କୋହଲି ଓ ରୋହିତ ଶର୍ମା। ରୋକୋ ନାଁରେ ଏହି ଯୋଡ଼ି ବେଶ ପରିଚିତ। ସେମାନଙ୍କ କ୍ୟାରିୟରର ସୂର୍ଯ୍ୟ ଏବେ ଅସ୍ତ ହେବା ପର୍ଯ୍ୟାୟରେ। ଉଭୟ ଏବେ ଠାରୁ ହିଁ କ୍ରିକେଟର ସବୁ ଠାରୁ ଛୋଟିଆ ଫର୍ମାଟ ଟି-୨୦ ଅନ୍ତର୍ଜାତୀୟରୁ ଅବସର ନେଇ ସାରିଛନ୍ତି। ଖୁବଶୀଘ୍ର ଉଭୟ ବାକି ଦୁଇ ଫର୍ମାଟରୁ ମଧ୍ୟ ଅବସର ନେଇ ପାରନ୍ତି। ବିରାଟ ଏବେ ୩୬ ବର୍ଷରେ ପାଦ ଦେଇଥିବା ବେଳେ ରୋହତିଙ୍କୁ ୩୭ ଛୁଇଁଲାଣି। ତେଣୁ ଯୁବପିଢ଼ିଙ୍କ ପାଇଁ ରୋକୋ କ୍ରିକେଟକୁ ଅଲବିଦା କହି ପାରନ୍ତି।
କିନ୍ତୁ ରୋହିତ ଓ ବିରାଟଙ୍କ ଅବସର ପରେ ଟିମ ଇଣ୍ଡିଆରେ ଏହି ଦୁଇ ଷ୍ଟାରଙ୍କ ସ୍ଥାନ କିଏ ନେବେ? ଭାରତରେ କ୍ରିକେଟ ଟ୍ୟାଲେଣ୍ଟର ଅଭାବ ନାହିଁ। ହେଲେ ରୋହିତ ଓ ବିରାଟ ଯେଉଁ ବେଞ୍ଚ ମାର୍କ ତିଆରି କରିଛନ୍ତି, ତା’କୁ ପୂରଣ କରିବା ଭଳି କ୍ରିକେଟର ଭାରତ ପାଖରେ ରହିଛନ୍ତି ତ? ରୋହିତ ଓ ବିରାଟ ଅବଶ୍ୟ ଏଯାଏ ଟେଷ୍ଟ କିମ୍ବା ଦିନିକିଆରୁ ଅବସର ଘୋଷଣା ସମ୍ପର୍କରେ କୌଣସି ପ୍ରକାରର ସଙ୍କେତ ଦେଇ ନାହାନ୍ତି। ତଥାପି କ୍ରିକେଟ ପଣ୍ତିତମାନେ ଟିମ ଇଣ୍ଡିଆରେ ପରବର୍ତ୍ତୀ ବିରାଟ କୋହଲି ଓ ରୋହିତ ଶର୍ମା କିଏ ହେବେ, ତା’ର ଆକଳନ ଆରମ୍ଭ କରିସାରିଲେଣି। ବିଶେଷ କରି ଧଳା ବଲ କ୍ରିକେଟରେ ଏହି ଦୁଇ ଷ୍ଟାରଙ୍କ ସ୍ଥାନ କିଏ ନେବେ, ତା’କୁ ନେଇ ଚର୍ଚ୍ଚା ଆରମ୍ଭ ହୋଇଛି।
ବିରାଟ ଓ ରୋହିତ ପ୍ରସ୍ତୁତ କରିଥିବା ଲିଗାସୀକୁ ଆଗକୁ ନେବାର ଦକ୍ଷତା ବର୍ତ୍ତମାନ ସମୟରେ ଦୁଇ ଟପ ଅର୍ଡର ବ୍ୟାଟର ଯଶସ୍ୱୀ ଜୈସୱାଲ ଓ ଶୁବମନ ଗିଲଙ୍କ ପାଖରେ ରହିଛି। ଉଭୟ ଯଶସ୍ୱୀ ଓ ଶୁବମନ ଗିଲଙ୍କ ବୟସ ୨୫ ବର୍ଷରୁ କମ। ଉଭୟ ବେଶ କିଛି ବର୍ଷ ହେଲାଣି ରୋହିତ ଓ ବିରାଟଙ୍କ ସହ ଖେଳି ଚାଲିଛନ୍ତି। ତେଣୁ ରୋକୋଙ୍କ ଅବସର ପରେ ଯଶସ୍ୱୀ ଓ ଗିଲ୍ ଭାରତୀୟ ଟିମର ଭାରକୁ ନିଜ କାନ୍ଧରେ ଆଗକୁ ନେଇପାରିବେ।
ଏ ସମ୍ପର୍କରେ ପୂର୍ବତନ କ୍ରିକେଟର ସଞ୍ଜୟ ମଞ୍ଜେରକର କହିଛନ୍ତି, “ଧଳା ବଲ କ୍ରିକେଟରେ ଶୁବମନ ଗିଲଙ୍କ ପ୍ରଦର୍ଶନ ଦିନକୁ ଦିନ ଶାଣିତ ହେବାରେ ଲାଗିଛି। ସେ ଆଗକୁ ମଧ୍ୟ ଏହାକୁ ଜାରି ରଖିବେ ବୋଲି ମୋର ଆଶା। ଏବେ ଠାରୁ ହିଁ ସେ ଦିନିକିଆରେ ଏକାକୀ ୨୦୦ ରନର ଇନିଂସ ଖେଳି ସାରିଛନ୍ତି। ଯଶସ୍ୱୀ ଟେଷ୍ଟ କ୍ରିକେଟରେ ନିଜର ଜଲୱା ଦେଖା ସାରିଛନ୍ତି। ତାଙ୍କ ପାଖରେ ଯଥେଷ୍ଟ ଦକ୍ଷତା ରହିଛି। ସେ ଖୁବଶୀଘ୍ର ଦିନିକିଆ ଓ ଟି-୨୦ କ୍ରିକେଟକୁ ମଧ୍ୟ ଦଖଲ କରିବେ। ତାଙ୍କ ଭିତରେ ରନର ଭୋକ ରହିଛି। ତାଙ୍କ ସୀମିତ ଓଭର କ୍ରିକେଟରେ ସୀମିତ ସୁଯୋଗ ମିଳିଛି। ଏହାର ଫାଇଦା ମଧ୍ୟ ସେ ଉଠାଇଛନ୍ତି। ଆଗକୁ ତାଙ୍କୁ ସୀମିତ ଓଭର କ୍ରିକେଟରେ ସୁଯୋଗ ମିଳିଲେ, ସେ ଦମଦାର ପ୍ରଦର୍ଶନ କରିପାରିବେ।”
ବର୍ତ୍ତମାନ ସମୟରେ ଟେଷ୍ଟ କ୍ରିକେଟରେ ଯଶସ୍ୱୀ ଯେଉଁ ଭଳି ରେକର୍ଡ ହାସଲ କରିଛନ୍ତି ସୀମିତ ଓଭର କ୍ରିକେଟରେ ତାଙ୍କୁ ସେଭଳି ସଫଳତା ମିଳିନାହିଁ। ସବୁଠାରୁ ବଡ଼ କଥା ହେଲା, ସେ ଏଯାଏ ଦିନିକିଆରେ ଭାରତ ପାଇଁ ଡେବ୍ୟୁ ମଧ୍ୟ କରିନାହାନ୍ତି। ଟି-୨୦ରେ ସେ ଭାରତ ପାଇଁ ମାତ୍ର ୨୩ଟି ମ୍ୟାଚ ଖେଳିଥିବା ବେଳେ ୩୬.୧୫ ହାରରେ ୭୨୩ ରନ କରିଛନ୍ତି। ଏହି ଛୋଟିଆ ଟି-୨୦ କ୍ୟାରିୟରରେ ସେ ଗୋଟିଏ ଶତକ ମଧ୍ୟ ମାରିଛନ୍ତି। ୧୬୪.୩୧ ଷ୍ଟ୍ରାଇକ ରେଟରେ ବ୍ୟାଟିଂ କରୁଥିବା ଯଶସ୍ୱୀଙ୍କ ବ୍ୟାଟରୁ ୫ଟି ଅର୍ଦ୍ଧଶତକ ମଧ୍ୟ ଦେଖିବାକୁ ମିଳିଛି।
୨୦୨୩ ଯଶସ୍ୱୀ ଟେଷ୍ଟ କ୍ରିକେଟରେ ଡେବ୍ୟୁ କରିଥିଲେ। ପ୍ରଥମ ମ୍ୟାଚ୍ରୁ ହିଁ ସେ ସମସ୍ତଙ୍କୁ ପ୍ରଭାବିତ କରି ଚାଲିଛନ୍ତି। ସେ ୧୯ଟି ଟେଷ୍ଟର ୩୬ଟି ଇନିଂସରେ ୧୭୮୯ ରନ କରିଛନ୍ତି। ତାଙ୍କ ବ୍ୟାଟିଂ ହାର ୫୨.୮୮ ରହିଛି। ସେ ୪ଟି ଶତକକୁ ଦୁଇ ଥର ଡବଲ ଟନ୍ରେ ପରିଣତ କରିଛନ୍ତି। ତାଙ୍କ ବ୍ୟାଟରୁ ୧୦ଟି ଅର୍ଦ୍ଧଶତକ ମଧ୍ୟ ଦେଖିବାକୁ ମିଳିଛି।
ମଞ୍ଜେରକରଙ୍କ ଭଳି ପୂର୍ବତନ କ୍ରିକେଟର ସଞ୍ଜୟ ବାଙ୍ଗର ମଧ୍ୟ ରୋକୋଙ୍କ ସ୍ଥାନ ଭାରତୀୟ ଟିମରେ ଗିଲ ଓ ଯଶସ୍ୱୀ ଜୈସୱାଲ ନେବେ ବୋଲି ମତ ରଖିଛନ୍ତି। ସେ କହିଛନ୍ତି, “ଗିଲ ଓ ଜୈସୱାଲ ହେଉଛନ୍ତି ଟପ ଅର୍ଡର ବ୍ୟାଟର। ଟପ୍ ଅର୍ଡରରେ ହିଁ ଅଧିକ ରନ କରିବାର ସୁଯୋଗ ମିଳିଥାଏ। ୨୦୧୩ ଚାମ୍ପିୟନ୍ସ ଟ୍ରଫି ବେଳେ ରୋହିତ ଓ ବିରାଟ ଯେଉଁ ବୟସରେ ଥିଲେ ଏବେ ଯଶସ୍ୱୀ ଏବଂ ଗିଲ ମଧ୍ୟ ସମାନ ବୟସରେ ରହିଛନ୍ତି।
ବୟସ ଦେଖିଲେ ଗିଲଙ୍କ ଠାରୁ ଯଶସ୍ୱୀ ସାମାନ୍ୟ ସାନ। କିନ୍ତୁ ଉଭୟ ବେଶ ଚମତ୍କାର ଢଙ୍ଗରେ ନିଜର ଅନ୍ତର୍ଜାତୀୟ କ୍ୟାରିୟରର ଆରମ୍ଭ କରିଛନ୍ତି। ତେଣୁ ସେମାନେ ଭାରତୀୟ ଟିମର ଭବିଷ୍ୟତ। ସେମାନେ ହିଁ ଭାରତୀୟ ଟିମର ପରବର୍ତ୍ତୀ ପିଢ଼ିକୁ ଆଗକୁ ନେଇ ପାରିବେ।”
ଗିଲଙ୍କ ପ୍ରଦର୍ଶନ ଏତେ ପ୍ରଭାବୀ ରହିଛି ଯେ ତାଙ୍କୁ ଭାରତୀୟ ଟିମ ଭାବୀ ଅଧିନାୟକ ଭାବେ ମଧ୍ୟ ବିବେଚନା କରାଯାଉଛି। ସେ ଭାରତ ପାଇଁ ଇତି ମଧ୍ୟରେ ୩୨ଟି ଟେଷ୍ଟ, ୪୭ଟି ଦିନିକିଆ ଓ ୨୧ଟି ଟି-୨୦ ମ୍ୟାଚ୍ ଖେଳି ସାରିଲେଣି। ଦିନିକିଆରେ ସେ ୫୮.୨୦ ହାରରେ ୨୩୨୮ ରନ କରିଥିବା ବେଳେ ଏହା ମଧ୍ୟରେ ୬ଟି ଶତକ ଓ ୧୩ଟି ଅର୍ଦ୍ଧଶତକ ରହିଛି। ଟି-୨୦ରେ ସେ ୩୦.୪୨ ହାରରେ ୫୭୮ ରନ କରିଛନ୍ତି। ତାଙ୍କ ବ୍ୟାଟରୁ ଗୋଟିଏ ଶତକ ଓ ୩ଟି ଅର୍ଦ୍ଧଶତକ ଦେଖିବାକୁ ମିଳିଛି। ଟେଷ୍ଟରେ ଗିଲଙ୍କ ପ୍ରଦର୍ଶନ ଠିକଠାକ ରହିଛି। ସେ ୩୫.୦୫ ହାରରେ ୧୮୯୩ ରନ କରିଛନ୍ତି। ଏଥିରେ ୫ଟି ଶତକ ଓ ୭ଟି ଅର୍ଦ୍ଧଶତକ ରହିଛି।
ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ଉଭୟ ଗିଲ ଓ ଯଶସ୍ୱୀ ଜୈସୱାଲ ଅଣ୍ଡର ୧୯ରେ ଭାରତ ପାଇଁ ଦମଦାର ପ୍ରଦର୍ଶନ କରିବା ପରେ ସିନିୟର ଟିମରେ ସ୍ଥାନ ପାଇଛନ୍ତି। ୨୦୧୮ ଅଣ୍ଡର ୧୯ ବିଶ୍ୱକପରେ ଗିଲ ଉପ ଅଧିନାୟକ ଭାବେ କାର୍ଯ୍ୟ କରିଥିଲେ। ପୃଥ୍ୱୀ ଶ’ଙ୍କ ନେତୃତ୍ୱରେ ଭାରତ ସେହି ବର୍ଷ ଅଣ୍ଡର ୧୯ ବିଶ୍ୱକପ ଜିତିଥିଲା। ଗିଲ ମଧ୍ୟ ଦମଦାର ପ୍ରଦର୍ଶନ କରିଥିଲେ। ଗିଲ ବିଶ୍ୱକପର ୬ଟି ମ୍ୟାଚ୍ରୁ ୫ଟି ଇନିଂସରେ ୩୭୨ ରନ କରିଥିଲେ। ଟୁର୍ଣ୍ଣାମେଣ୍ଟରେ ଏହା ଦ୍ୱିତୀୟ ସର୍ବାଧିକ। ସେ ୧୨୪ ହାରରେ ଏହି ରନ ସଂଗ୍ରହ କରିଥିଲେ। ଅଣ୍ଡର ୧୯ ବିଶ୍ୱକପରେ ସେ ୩ଟି ଅର୍ଦ୍ଧଶତକ ଓ ଗୋଟିଏ ଶତକ ମାରିଥିଲେ।
ଯଶସ୍ୱୀ ଜୈସୱାଲ ଭାରତ ପାଇଁ ୨୦୨୦ରେ ଅଣ୍ଡର ୧୯ ବିଶ୍ୱକପ ଖେଳିଥିଲେ। ଭାରତ ପାଇଁ ଓପନ କରୁଥିବା ଯଶସ୍ୱୀ ୬ଟି ମ୍ୟାଚ୍ରେ ୪୦୦ ରନ କରିଥିଲେ। ସେ ଟୁର୍ଣ୍ଣାମେଣ୍ଟରେ ସବୁଠାରୁ ଅଧିକ ରନ ହାସଲକାରୀ ଖେଳାଳି ବନିଥିଲେ। ତାଙ୍କ ବ୍ୟାଟରୁ ବିଶ୍ୱକପରେ ୪ଟି ଅର୍ଦ୍ଧଶତକ ଓ ଗୋଟିଏ ଶତକ ଦେଖିବାକୁ ମିଳିଥିଲା।
ଅବଶ୍ୟ ଭାରତ ଅଣ୍ଡର ୧୯ ବିଶ୍ୱକପ ଫାଇନାଲରେ ବାଂଲାଦେଶ ଠାରୁ ହାରି ଯାଇଥିଲା, କିନ୍ତୁ ଯଶସ୍ୱୀ ନିଜ ପ୍ରଦର୍ଶନ ବଳରେ ସମସ୍ତଙ୍କୁ ପ୍ରଭାବିତ କରି ପାରିଥିଲେ। ୨୦୨୦ରେ ପ୍ରିୟମ ଗର୍ଗ ଭାରତୀୟ ଅଣ୍ଡର ୧୯ ବିଶ୍ୱକପର ଅଧିନାୟକ ରହିଥିଲେ।