ଇତିହାସ ରଚିବାର ଅତି ନିକଟକୁ ଆସି ଫେଲ ମାରିଛନ୍ତି ଭାରତର ଅଙ୍କିତା ଓ ଧୀରଜ ଯୋଡ଼ି। ପ୍ୟାରିସ ଅଲିମ୍ପିକ୍ସରେ ତୀରନ୍ଦାଜିରୁ ଭାରତକୁ ୩୬ ବର୍ଷ ମଧ୍ୟରେ ପ୍ରଥମ ପଦକ ଭେଟି ଦେବାର ସୁଯୋଗ ଧୀରଜ-ଅଙ୍କିତଙ୍କ ପାଖରେ ଥିଲା। କିନ୍ତୁ ଧୀରଜ ଓ ଅଙ୍କିତା ଯୋଡ଼ି ଖାଲି ହାତରେ ପ୍ୟାରିସ ଅଲିମ୍ପିକ୍ସରୁ ଫେରିଛନ୍ତି।
ଧୀରଜ ଓ ଅଙ୍କିତା କ୍ୱାର୍ଟର ଫାଇନାଲରେ ଦମଦାର ପ୍ରଦର୍ଶନ କରି ଅଲିମ୍ପିକ୍ସ ଇତିହାସର ପ୍ରଥମ ଭାରତୀୟ ଯୋଡ଼ି ଭାବେ ସେମିରେ ପ୍ରବେଶ କରିଥିଲେ। ହେଲେ ଦଳକୁ ସେମିରେ ବିଶ୍ୱର ୧ ନଂ ମାନ୍ୟତାପ୍ରାପ୍ତ କୋରିଆ ଠାରୁ ୬-୨ରେ ହାରିବାକୁ ପଡ଼ିଥିଲା। ଏହାପରେ ଉଭୟ ବ୍ରୋଞ୍ଜ ପଦକ ପାଇଁ ମୁକାବିଲା କରିଥିଲେ।
ବ୍ରୋଞ୍ଜ ପଦକ ମ୍ୟାଚ୍ରେ ଧୀରଜ ଓ ଅଙ୍କିତା ଆମେରିକାର ବ୍ରାଡୀ ଇଲିସନ ଓ କାସେୟ କୌଫହୋଲ୍ଡଙ୍କ ସହ ହୋଇଥିଲା। ବ୍ରାଡୀ ହେଉଛନ୍ତି ୩ଥରର ଅଲିମ୍ପିକ୍ସ ପଦକ ବିଜେତା। ସେହିପରିତ ମହିଳା ବ୍ୟକ୍ତିଗତ ତୀରନ୍ଦାଜିର ୧ନଂ ରାଙ୍କର ଖେଳାଳି ହେଲେ କୌଥହୋଲ୍ଡ। ଭାରତ ତୀରନ୍ଦାଜି ରାଙ୍କର ୯ ନମ୍ବରେ ଥିବା ବେଳେ ଆମେରିକାର ରାଙ୍କ ହେଉଛି ୩।
ଏହାର ପ୍ରଭାବ ମଧ୍ୟ ମ୍ୟାଚ୍ ଉପରେ ପଡ଼ିଥିଲା ଆମେରିକା ପ୍ରଥମ ସେଟକୁ ୩୮-୩୭ ଓ ଦ୍ୱିତୀୟ ସେଟକୁ ୩୭-୩୫ରେ ଜିତି ନେଇଥିଲା। ତୃତୀୟ ସେଟରେ ଭାରତ କିଛିଟା କମବ୍ୟାକ କରିଥିଲା। ଏହି ସେଟ ଭାରତ ୩୮-୩୪ ଜିତିଥିଲା।
କିନ୍ତୁ ଗୁରୁତ୍ୱପୂର୍ଣ୍ଣ ୪ର୍ଥ ସେଟରେ ଅଙ୍କିତା ଓ ଧୀରଜ ନୈରାଶ୍ୟଜନକ ପ୍ରଦର୍ଶନ କରିଥିଲେ। ପ୍ରଥମ ଦୁଇଟି ଶଟ ପରେ ଭାରତ ସ୍କୋର ୧୭ ଥିଲା। ଏହାପରେ ଅଙ୍କିତା ପୁଣି ୮ ମାରିଥିଲେ। ଧୀରଜ ୧୦ ସ୍କୋର କରିବାରୁ ଭାରତର ପଏଣ୍ଟ ୩୫ରେ ପହଞ୍ଚିଥିଲା।
ପୂର୍ବରୁ ୨ଟି ଶଟରେ ୧୯ ପଏଣ୍ଟ ହାସଲ କରି ସାରିଥିବା ଆମେରିକା ପାଇଁ ବ୍ରାଡୀ ଓ କୌଫହୋଲ୍ଡ ୧୮ ପଏଣ୍ଟ ସ୍କୋର କରି ସେଟ ସହ ମ୍ୟାଚ୍କୁ କବଜା କରି ନେଇଥିଲେ। ଏଥିସହ ଭାରତର ପଦକ ଜିତିବାର ଆଶକୁ ମଧ୍ୟ ଭାଙ୍ଗି ଚୁରମାର କରି ଦେଇଥିଲେ।