ସ୍କ୍ୱାଶ ଫାଇନାଲରେ ଦୀପିକା-ହରିନ୍ଦର ଯୋଡ଼ି, ଅଭୟ-ଅନାହତଙ୍କୁ ବ୍ରୋଞ୍ଜ

ଚାଇନାରେ ଚାଲିଥିବା ୧୯ତମ ଏସିଆନ ଗେମ୍ସର ମିକ୍ସଡ ସ୍କ୍ୱାଶ ଇଭେଣ୍ଟରୁ ଭାରତକୁ ମିଶ୍ରତ ଫଳ ମିଳିଛି। ଏହି ବର୍ଗରେ ଭାରତର ଦୁଇ ଯୋଡ଼ା ଖେଳାଳି ସେମି ଫାଇନାଲରେ ପ୍ରବେଶ କରିଥିଲେ। କିନ୍ତୁ କେବଳ ହରିନ୍ଦର ପାଲ ସିଂହ ସାନ୍ଧୁ ଓ ଦୀପିକା ପାଲ୍ଲିକଲ କାର୍ତ୍ତିକ ଫାଇନାଲରେ ପ୍ରବେଶ କରିବାକୁ ସକ୍ଷମ ହୋଇଛନ୍ତି। ଏହାର ଅର୍ଥ ଏମାନେ ଏବେ ସ୍ୱର୍ଣ୍ଣ ପାଇଁ ଖେଳିବେ।

କିନ୍ତୁ ଦ୍ୱିତୀୟ ସେମିରେ ଭାରତର ଅଭୟ ଓ ଅନାହତ ସିଂହ ହାରି ଯାଇଛନ୍ତି। ସେମିରେ ହାରିଥିଲେ ମଧ୍ୟ ସେମାନଙ୍କୁ ବ୍ରୋଞ୍ଜ ପଦକ ମିଳିଛି। ଅଭୟ ଓ ଅନାହତଙ୍କ ମୁକାବିଲା ମାଲେସିୟାର ଆଇଫା ବିନତି ଅଜମାନ ଓ ମହମ୍ମଦ ସାୟଫିକ୍ୟୁ ବିନ ମହମ୍ମଦ କମଲଙ୍କ ସହ ହୋଇଥିଲା।

ପ୍ରଥମ ସେଟକୁ ଭାରତୀୟ ଯୋଡ଼ି ୧୧-୮ରେ ଜିତି ନେଇଥିଲେ। କିନ୍ତୁ ଦ୍ୱିତୀୟ ସେଟରେ ଆଇଫା ଓ ମହମ୍ମଙ୍କ ଯୋଡ଼ି ଜବରଦସ୍ତ କମବ୍ୟାକ୍‌ କରିଥିଲେ। ସେମାନେ ପ୍ରଥମେ ୧୧-୨ ଓ ପରେ ତୃତୀୟ ସେଟକୁ ୧୧-୯ରେ ଜିତି ଫାଇନାଲ ଟିକେଟ ହାତେଇ ଥିଲେ।

ପଦକ ସହ ଅନାହତ ଓ ଅଭୟ

ଅଭୟ ଓ ଅନାହତ ନିରାଶ କରିଥିଲେ ମଧ୍ୟ ଦୀପିକା ଓ ହରିନ୍ଦର ବେଶ ଚମତ୍କାର ଢଙ୍ଗରେ ସେମି ଫାଇନାଲ ମୁକାବିଲାକୁ ଜିତି ନେଇଛନ୍ତି। ସେମିରେ ଏମାନଙ୍କ ମୁକାବିଲା ହଂକଂର କା ୟା ଓ ଚି ହିମ ୱଙ୍ଗଙ୍କ ସହ ହୋଇଥିଲା। ପ୍ରଥମ ସେଟକୁ ଲି ଓ ୱଙ୍ଗ ୧୧-୭ରେ ଜିତି ନେଇଥିଲେ। କିନ୍ତୁ ପରବର୍ତ୍ତୀ ଦୁଇ ସେଟକୁ ଦୀପିକା ଓ ହରିନ୍ଦର ୧୧-୭ ଓ ୧୧-୯ରେ ଜିତି ମ୍ୟାଚ୍‌କୁ କବଜା କରିଥିଲେ। ଦୀର୍ଘ ୩୮ ମିନିଟ ଧରି ଏହି ଲଢ଼େଇ ଚାଲିଥିଲା।

ଏହାପୂର୍ବରୁ ପୁରୁଷ ସ୍କ୍ୱାଶର ଟିମ ଇଭେଣ୍ଟରେ ଭାରତ ଚୀର ପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ହରାଇ ସ୍ୱର୍ଣ୍ଣ ପଦକ ଜିତିଥିଲା।