ଚେସ୍ ପ୍ରତିଯୋଗିତାରେ କିମ୍ବଦନ୍ତୀ କ୍ରୀଡ଼ାବିତ୍ ବିଶ୍ୱନାଥ ଆନନ୍ଦଙ୍କ ରେକର୍ଡ ଭାଙ୍ଗିଲେ ଡି ଗୁକେଶ। କିଶୋର ଗ୍ରାଣ୍ଡମାଷ୍ଟର ଡି ଗୁକେଶ ଗୁରୁବାର ବାକୁରେ ଚାଲିଥିବା ଚେସ୍ ବିଶ୍ୱକପ୍ ଚାମ୍ପିଅନସିପର ଦ୍ୱିତୀୟ ରାଉଣ୍ଡରେ ସ୍ଥାନୀୟ ପ୍ରତିଯୋଗୀ ମିସ୍ରାଦ୍ଦିନ ଇସ୍କାଣ୍ଡ୍ରୋଭଙ୍କୁ ପରାସ୍ତ କରିଛନ୍ତି। ଏହି ସଫଳତା ସହ ସେ FIDE (ଫେଡେରେସନ୍ ଇଣ୍ଟରନ୍ୟାସନାଲ୍ ଡେସ୍ ଇଚେକ୍ସ)ର ଲାଇଭ୍ ୱାର୍ଲ୍ଡ ରେଟିଂରେ ପ୍ରତିଭାଶାଳୀ ବିଶ୍ୱନାଥନ୍ ଆନନ୍ଦଙ୍କୁ ପଛରେ ପକାଇ ଦେଇଛନ୍ତି।
ଦ୍ୱିତୀୟ ରାଉଣ୍ଡ ମ୍ୟାଚ୍ର ଦ୍ୱିତୀୟ ଗେମ୍ରେ ୧୭ ବର୍ଷୀୟ ଗୁକେଶ ଆଜେରବାଇଜାନର ଇସ୍କାଣ୍ଡ୍ରୋଭଙ୍କୁ ପରାସ୍ତ କରି ନୂଆ ରେକର୍ଡ ସୃଷ୍ଟି କରିଛନ୍ତି। ଅଲ ଇଣ୍ଡିଆ ଚେସ୍ ଫେଡେରେଶନର ସଭାପତି ସଞ୍ଜୟ କପୁର କହିଛନ୍ତି, "ଆଶା ଅନୁଯାୟୀ ଆମର ଯୁବ ଗ୍ରାଣ୍ଡମାଷ୍ଟର ଡି ଗୁକେଶ ଭେଟେରାନ ଖେଳାଳି ବିଶ୍ୱନାଥନ ଆନନ୍ଦଙ୍କୁ ଅତିକ୍ରମ କରି ଭାରତର ଶ୍ରେଷ୍ଠ ଚେସ୍ ଖେଳାଳି ହୋଇପାରିଛନ୍ତି। ଏହି ଯୁବ ଖେଳାଳିଙ୍କୁ କିଛି ବର୍ଷ ମଧ୍ୟରେ ଏକ ଅନ୍ତର୍ଜାତୀୟ ତାରକା ରୂପେ ଦେଖିବା ଖୁବ୍ ଆଶ୍ଚର୍ଯ୍ୟକର। ମୋର କୌଣସି ସନ୍ଦେହ ନାହିଁ ଯେ ବିଶ୍ୱନାଥ ଆନନ୍ଦଙ୍କ ପରି ସେ ମଧ୍ୟ ଅନେକ ଦଶନ୍ଧି ଧରି ଭାରତକୁ ଗର୍ବିତ କରିବେ। ଗୁକେଶଙ୍କୁ ତାଙ୍କ ସଫଳତା ପାଇଁ ଅଭିନନ୍ଦନ ଜଣାଇବା ପାଇଁ ମୋ ସହ ସହଯୋଗ କରିବାକୁ ମୁଁ ସମସ୍ତ ଦେଶବାସୀଙ୍କୁ ଅନୁରୋଧ କରୁଛି।"
Gukesh D won again today and has overcome Viswanathan Anand in live rating!
— International Chess Federation (@FIDE_chess) August 3, 2023
There is still almost a month till next official FIDE rating list on September 1, but it's highly likely that 17-year-old will be making it to top 10 in the world as the highest-rated Indian player!… pic.twitter.com/n3I2JPLOJQ
ଅନ୍ୟପଟେ ଚେସ୍ ପ୍ରତିଯୋଗିତାରେ ବିଶ୍ୱର ସର୍ବୋଚ୍ଚ ସଂଗଠନ FIDE ଏକ ଟ୍ୱିଟରେ କହିଛି, "ଡି ଗୁକେଶ ଆଜି ପୁଣି ଜିତିଛନ୍ତି ଏବଂ ଲାଇଭ ରେଟିଂରେ ବିଶ୍ୱନାଥ ଆନନ୍ଦଙ୍କୁ ଅତିକ୍ରମ କରିଯାଇଛନ୍ତି। ପରବର୍ତ୍ତୀ ଅଫିସିଆଲ୍ FIDE ରାଙ୍କିଙ୍ଗ୍ ସେପ୍ଟେମ୍ବର ୧ରେ ପ୍ରକାଶ ପାଇବାକୁ ଆଉ ଗୋଟିଏ ମାସ ବାକି ଅଛି। ସେତବେଳକୁ ଡି ଗୁକେଶ ସର୍ବାଧିକ ମାନ୍ୟତା ପ୍ରାପ୍ତ ଭାରତୀୟ ଖେଳାଳି ଭାବରେ ବିଶ୍ୱ ମାନ୍ୟତାର ଶ୍ରେଷ୍ଠ ୧୦ରେ ପ୍ରବେଶ କରିବାର ସମସ୍ତ ସମ୍ଭାବନା ରହିଛି।"
୨୭୫୫.୯ ଲାଇଭ୍ ରେଟିଂରେ ପହଞ୍ଚିବା ପାଇଁ ଗୁକେଶ ୨.୫ ରେଟିଂ ପଏଣ୍ଟ ହାସଲ କରିଥିବାବେଳେ ଆନନ୍ଦଙ୍କ ରେଟିଂ ୨୭୫୪.୦ ଅଛି। ଏହା ସହିତ ଲାଇଭ୍ ରାଙ୍କିଙ୍ଗରେ ନବମ ସ୍ଥାନରେ ପହଞ୍ଚିବା ପାଇଁ ଗୁକେଶ ଆନନ୍ଦଙ୍କୁ ଅତିକ୍ରମ କରିଛନ୍ତି। ପାଞ୍ଚ ଥର ବିଶ୍ୱ ଚାମ୍ପିଅନ୍ ଆନନ୍ଦ ଦଶମ ସ୍ଥାନକୁ ଖସିଛନ୍ତି। ଜୁଲାଇ ୧୯୯୧ରେ ପ୍ରଥମ ଥର ପାଇଁ ବିଶ୍ୱ ମାନ୍ୟତାର ଶ୍ରେଷ୍ଠ ୧୦ରେ ପ୍ରବେଶ କରିଥିବା ଆନନ୍ଦ ଜାନୁଆରୀ ୧୯୮୭ଠାରୁ ଭାରତର ଶୀର୍ଷ ମାନ୍ୟତା ଖେଳାଳି ଭାବରେ ରହି ଆସିଛନ୍ତି।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
