ରାଜକୋଟ୍ : ରାଜକୋଟରେ ଆଜି ଖେଳାଯାଇଥିବା ଚତୁର୍ଥ ଟି-୨୦ରେ ଦମଦାର ବିଜୟୀ ହାସଲ କରିଛି ଭାରତ। ଦକ୍ଷିଣ ଆଫ୍ରିକାକୁ ୮୨ ରନ୍ରେ ଭାରତୀୟ ଟିମ୍ ହରାଇଛି।
ଭାରତ ପ୍ରଥମେ ବ୍ୟାଟିଂ କରି ୬ ୱିକେଟ ବିନିମୟରେ ୧୬୯ କରିଥିବା ବେଳେ ଦ.ଅଫ୍ରିକା ମାତ୍ର ୮୭ ରନ୍ରେ ଅଲ ଆଉଟ ହୋଇଯାଇଥିଲା। ଫଳରେ ୫ ଟିକିଆ ସିରିଜରକୁ ୨-୨ରେ ବରାବର କରି ସମାନସ୍ତରକୁ ଆଣିବାରେ ଭାରତୀୟ ଟିମ୍ ସଫଳ ହୋଇଛି। ସିରିଜ କବଜା କରିବାକୁ ହେଲେ ଭାରତକୁ ୫ମ ତଥା ଅନ୍ତିମ ମ୍ୟାଚକୁ ଜିତିବାକୁ ହେବ।
ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଇଥିବା ଏହି ମ୍ୟାଚ୍ରେ ଦକ୍ଷିଣ ଆଫ୍ରିକା ଟସ୍ ଜିତି ଭାରତକୁ ବ୍ୟାଟିଂ କରିବାକୁ ଆମନ୍ତ୍ରଣ କରିଥିଲା। ଆରମ୍ଭରୁ ୩ଟି ୱିକେଟ ହରାଇ ଭାରତ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଋତୁରାଜ ଗାଇକ୍ୱାଡ ୫ ରନ, ଶ୍ରେୟସ ଆୟର ୪ ରନ, ଇଶାନ କିଷନ ୨୭ ରନ ଓ ଋଷଭ ପନ୍ତ ୧୭ ରନ କରି ଆଉଟ ହୋଇଥିଲେ।
ହାର୍ଦ୍ଦିକ ପାଣ୍ଡ୍ୟା ଓ ଦୀନେଶ କାର୍ତ୍ତିକଙ୍କ ପାର୍ଟନରସିପ ଯୋଗୁ ଭାରତ ଏକ ସମ୍ମାନଜନକ ସ୍କୋର କରିପାରିଥିଲା । ପାଣ୍ଡ୍ୟା ୪୬ ରନ କରିଥିଲେ। ଭାରତ ୨୦ ଓଭରରେ ୬ ୱିକେଟ ହରାଇ ୧୬୯ ରନ କରିଥିଲା । ଦକ୍ଷିଣ ଅଫ୍ରିକା ଆଗରେ ୧୭୦ ରନର ବିଜୟ ଲକ୍ଷ୍ୟ ରହିଥିଲା। ଏହି ମ୍ୟାଚରେ ଦୀନେଶ କାର୍ତ୍ତିକ ନିଜର ପୁରୁଣା ଫର୍ମ ଦେଖାଇଥିଲେ। ସେ ମାତ୍ର ୨୭ଟି ବଲ ଖେଳି ୫୫ରନ କରିଥିଲେ। ଯାହା ଭିତରେ ୯ଟି ଚୌକା ଓ ୨ଟି ଛକା ରହିଥିଲା।
ଦକ୍ଷିଣ ଆଫ୍ରିକା ପକ୍ଷରୁ ଲୁଙ୍ଗି ନିଗିଡି ୨ଟି, ମାର୍କୋ ଜନସନ, ଡ୍ୱାଇନ୍ ପ୍ରିଟୋରିୟସ୍, ଆନରିଚ ନର୍ଟେଜେ ଓ କେଶବ ମହାରାଜ ଗୋଟିଏ ଲେଖାଏଁ ୱିକେଟ ନେଇଥିଲେ।
ପରେ ଭାରତୀୟ ଦଳର ଚମତ୍କାର ବୋଲିଂ ଆଗରେ ପୂରା ଦ. ଆଫ୍ରିକା ଟିମ୍ ଚିତପଟାଙ୍ଗ ମାରିଥିଲା। ଦ. ଆଫ୍ରିକା ଟିମ୍ ପକ୍ଷରୁ କ୍ୱିଣ୍ଟନ୍ ଡି କକ୍ ୧୪ ରନ୍, ଟେମ୍ବା ବାଭୁମା ୮ ରନ୍, ରସି ଭାନ୍ ଡେର୍ ଡୁସେନ୍ ୨୦, ହେନ୍ରିଚ୍ କ୍ଲାସେନ୍ ୮, ଡେଭିଡ ମିଲର ୯, ମାର୍କୋ ଜନସନ ୧୨, ଆନରିଚ ନର୍ଟେଜେ ୧, ଲୁଙ୍ଗି ନିଗିଡି ଓ ଟାବ୍ରାଇଜ୍ ଶାମସି ୪ ରନ୍ ଲେଖାଏଁ କରିଥିଲେ। ଡ୍ୱାଇନ୍ ପ୍ରିଟୋରିୟସ୍ ଓ କେଶବ ମହାରାଜ ଖାତା ନ ଖୋଲି ହିଁ ଆଉଟ ହୋଇଯାଇଥିଲେ।
ଭାରତ ପକ୍ଷରୁ ଉତ୍ତମ ବୋଲିଂର ପ୍ରଦର୍ଶନ କରି ଅଭେଶ ଖାନ ୪ଟି, ୟୁଜବେନ୍ଦ୍ର ଚହଲ ୨ଟି, ହର୍ଷଲ ପଟେଲ ଓ ଅକ୍ଷର ପଟେଲ ଗୋଟିଏ ଲେଖାଏଁ ୱିକେଟ ନେଇଥିଲେ। ଟିମ୍ ଇଣ୍ଡିଆ ପୂର୍ବରୁ ୨ଟି ମ୍ୟାଚ୍ ହାରିଥିଲେ ହେଁ ପରବର୍ତ୍ତି ୨ଟି ମ୍ୟାଚ୍ ଜିତି ଖେଳକୁ ଏକ ରୋମାଞ୍ଚକ ମୋଡ଼କୁ ଆଣିପାରିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
