ବକ୍ସିଂରୁ ସନ୍ୟାସ ନେଲେ ଭାରତର କିମ୍ବଦନ୍ତୀ ଖେଳାଳି ମ୍ୟାରି କମ୍। ୬ ଥରର ବିଶ୍ୱ ଚାମ୍ପିଅନ ଏବଂ ୨୦୧୨ ଅଲିମ୍ପିକ୍ ପଦକ ବିଜେତା ଏମ୍.ସି. ମ୍ୟାରି କମ୍ ବକ୍ସିଂରୁ ସନ୍ୟାସ ଘୋଷଣା କରିଛନ୍ତି।
ଏକ କାର୍ଯ୍ୟକ୍ରମରେ ଯୋଗ ଦେଇ ସେ କହିଛନ୍ତି ଯେ, ଏବେବି ମୋ’ ଭିତରେ ଖେଳିବା ପାଇଁ ପ୍ରବଳ ଆଗ୍ରହ ରହିଛି । ହେଲେ ଇଣ୍ଟରନ୍ୟାସନାଲ ବକ୍ସିଂ ଆସୋସିଏସନ ବା IBAର ନିୟମ ଅନୁଯାୟୀ, କେବଳ ୪୦ ବର୍ଷ ବୟସ ଯାଏଁ ଜଣେ ପ୍ରତିଯୋଗୀ ଏଲିଟ୍-ଲେଭଲ୍ କମ୍ପିଟିସନରେ ଅଂଶ ଗ୍ରହଣ କରିପାରିବେ । ଏବେ ମ୍ୟାରି କମ୍ ଙ୍କୁ ୪୧ ବର୍ଷ ଚାଲିଛି।
ସେ କହିଛନ୍ତି ଯେ, ଦୁର୍ଭାଗ୍ୟବଶତଃ ମୁଁ ବୟସ ସୀମା ପାଇଁ ଆଉ କୌଣସି ପ୍ରତିଯୋଗିତାରେ ଭାଗ ନେଇପାରିବି ନାହିଁ। ମୋତେ ଅବସର ନେବାକୁ ପଡ଼ିବ । ମୁଁ ମୋ ଜୀବନରେ ସବୁକିଛି ହାସଲ କରିସାରିଛି ।
୧୮ ବର୍ଷ ବୟସରୁ ଆନ୍ତର୍ଜାତୀୟ ମ୍ୟାଚ୍ ଖେଳିଥିବା ମଣିପୁରର ମ୍ୟାରି କମ୍, ୬ଟି ୱାର୍ଲଡ ଟାଇଟଲ୍ ହାସଲ କରିବାରେ ବିଶ୍ୱର ପ୍ରଥମ ମହିଳା ମୁଷ୍ଟିଯୋଦ୍ଧା। ଏହି ୫ ଥର ଏସିଆନ୍ ଚାମ୍ପିଅନ, ଭାରତ ପାଇଁ ପ୍ରଥମ ମହିଳା ବକ୍ସର ଭାବେ ୨୦୧୪ ଏସିଆନ ଗେମ୍ସରେ ଆଣିଥିଲେ ଗୋଲ୍ଡ ମେଡାଲ୍ । ୨୦୧୨ ଲଣ୍ଡନ ଅଲିମ୍ପିକ ଗେମ୍ସରେ ସେ କାଂସ୍ୟ ପଦକ ହାସଲ କରିଥିଲେ ।
୨୦୧୬ରେ ସେ ରାଜ୍ୟସଭାକୁ ମନୋନୀତ ହୋଇଥିବା ବେଳେ, ତାଙ୍କର ସଂଘର୍ଷ ଉପରେ ପ୍ରିୟଙ୍କା ଚୋପ୍ରାଙ୍କ ଅଭିନୀତି ଏକ ବଲିଉଡ୍ ଫିଲ୍ମ ମଧ୍ୟ ରହିଛି ।