ପ୍ୟାରିସ ଅଲିମ୍ପିକ୍ସର ବକ୍ସିଂ ବର୍ଗରେ ଭାରତକୁ ଆଉ ଏକ ବିପର୍ଯ୍ୟୟର ସମ୍ମୁଖୀନ ହେବାକୁ ପଡ଼ିଛି। ଅମିତ ପଙ୍ଘଲଙ୍କ ପରେ ମହିଳା ବର୍ଗର ପ୍ରଥମ ରାଉଣ୍ତରୁ ବିଦାୟ ନେଇଛନ୍ତି ଯସ୍ମୀନ ଲମ୍ବୋରିଆ।
ସେ ଆଜି ୫୭ କେଜି ବର୍ଗରେ ନିଜର ପ୍ରଥମ ମ୍ୟାଚ୍ ଖେଳିବାକୁ ରିଙ୍ଗକୁ ଓହ୍ଲାଇଥିଲେ। କିନ୍ତୁ ତାଙ୍କୁ ଫିଲିପାଇନ୍ସର ଷ୍ଟାର ବକ୍ସର ତଥା ପୂର୍ବତନ ବିଶ୍ୱ ଚାମ୍ପିୟନ ଏନ ପେଟେକିଓଙ୍କ ଠାରୁ ହାରିବାକୁ ପଡ଼ିଛି।
ସ୍ଥିତି ଏପରି ହୋଇଥିଲା ଯେ ଯସ୍ମୀନ ଗୋଟିଏ ସିଙ୍ଗଲ ପଞ୍ଚ ମଧ୍ୟ ସ୍ପଷ୍ଟ ଭାବେ ପେଟେକିଓଙ୍କୁ ଲଗାଇବାକୁ ସକ୍ଷମ ହୋଇ ନଥିଲେ। ଶେଷରେ ୫:୦ରେ ପେଟେକିଓ ମ୍ୟାଚ୍କୁ ଜିତି ପରବର୍ତ୍ତୀ ରାଉଣ୍ଡରେ ପ୍ରବେଶ କରିଛନ୍ତି।
ପ୍ରଥମ ରାଉଣ୍ଡରେ ୫ ଜଣ ବିଚାରପତିଙ୍କ ମଧ୍ୟରୁ ୪ ଜଣ ଯସ୍ମୀନଙ୍କ ବିପକ୍ଷରେ ରାୟ ଦେଇଥିଲେ। ଦ୍ୱିତୀୟ ରାଉଣ୍ଡରେ ମଧ୍ୟ ସମାନ ସ୍ଥିତି ସୃଷ୍ଟି ହୋଇଥିଲା। ତୃତୀୟ ରାଉଣ୍ଡ ପରେ ପେଟେକିଓଙ୍କୁ ୫:୦ରେ ବିଜେତା ଘୋଷଣା କରାଯାଇଥିଲା।
ପରାଜୟ ସହ ପ୍ୟାରିସ ଅଲିମ୍ପିକ୍ସରେ ଯସ୍ମୀନଙ୍କ ଅଭିଯାନ ଶେଷ ହୋଇଛି। ସେ ମଧ୍ୟ ଅମିତ ପଙ୍ଘଲଙ୍କ ଭଳି ପ୍ରଥମ ରାଉଣ୍ଡରୁ ବିଦାୟ ନେଇଛନ୍ତି।