ଅଷ୍ଟ୍ରେଲିଆରେ ଇତିହାସ ରଚିଲେ ସ୍ପିଡଷ୍ଟାର ଜସପ୍ରୀତ ବୁମ୍ରା। ଭାରତୀୟ କାମଚଳା ଅଧିନାୟକଙ୍କ ଘାତକ ବୋଲିଂରେ ପ୍ରଥମ ପାଳିରେ ମାଟି କାମୁଡ଼ିଥିଲେ କଙ୍ଗାରୁ ବ୍ୟାଟର। ତେବେ ପ୍ରଥମ ପାଳିରେ ଅଷ୍ଟ୍ରେଲିଆ ବିପକ୍ଷରେ ୫ ୱିକେଟ ସଫଳତା ହାସଲ କରି ଏକ ବଡ଼ ରେକର୍ଡ କରିଛନ୍ତି ବୁମ୍ରା। ଅଷ୍ଟ୍ରେଲିଆରେ ଏହି ସଫଳତା ସହ ସେ ପୂର୍ବତନ ଭାରତୀୟ ଅଧିନାୟକ କପିଲ ଦେବଙ୍କ ଏକ ରେକର୍ଡର ସମକକ୍ଷ ହୋଇଛନ୍ତି।
JASPRIT BUMRAH - INDIA'S GREATEST PACER IN TESTS. 🐐 pic.twitter.com/wVeNQdDG1I
— Mufaddal Vohra (@mufaddal_vohra) November 23, 2024
ପ୍ରଥମ ପାଳିରେ ବୁମ୍ରା ୧୮ ଓଭର ବୋଲିଂ କରି ୩୦ ରନ ବ୍ୟୟରେ ୫ଟି ବହୁମୂଲ୍ୟ ୱିକେଟ ହାସଲ କରିଥିଲେ। ନାଥନ ମ୍ୟାକସ୍ଵିନୀ, ଉସମାନ ଖାୱଜା, ଷ୍ଟେଭ ସ୍ମିଥ, ଆଲେକ୍ସ କ୍ୟାରୀ ଓ ଅଷ୍ଟ୍ରେଲିଆ ଅଧିନାୟକ ପ୍ୟାଟ୍ କମିନ୍ସଙ୍କୁ ଆଉଟ୍ କରି ପାଭିଲିୟନ ଫେରାଇଥିଲେ ବୁମ୍ରା। ତେବେ ଏହା ହେଉଛି ସେନା ଦେଶ (ଦକ୍ଷିଣ ଆଫ୍ରିକା, ଇଂଲଣ୍ଡ, ନ୍ୟୁଜିଲ୍ୟାଣ୍ଡ ଓ ଅଷ୍ଟ୍ରେଲିଆ)ରେ ବୁମ୍ରାଙ୍କର ସପ୍ତମ ୫ ୱିକେଟ ସଫଳତା। ଏହି ଦେଶ ଗୁଡ଼ିକରେ ସର୍ବାଧିକ ଥର ୫ ୱିକେଟ ସଫଳତା ହାସଲ କରିବା ରେକର୍ଡ କପିଲ ଦେବଙ୍କ ନାଁରେ ରହିଥିଲା, ଯିଏକି ୭ ଥର ଏହି ସଫଳତା ନିଜ ନାଁରେ କରିଥିଲେ। ଆଉ ବୁମ୍ରା ଏବେ କପିଲ ଦେବଙ୍କ ସମକକ୍ଷ ହୋଇସାରିଛନ୍ତି। ଏହି ତାଲିକାରେ ବି.ଏସ୍ ଚନ୍ଦ୍ରଶେଖର (୬ ଥର), ଜାହିର ଖାନ (୬ ଥର), ବିଶାନ ସିଂହ ବେଦୀ (୫ ଥର) ଓ ଅନୀଲ କୁମ୍ବଲେ (୫ ଥର) ରହିଛନ୍ତି।
ଏହା ବ୍ୟତୀତ ବୁମ୍ରା ପଞ୍ଚମ ଭାରତୀୟ ଅଧିନାୟକ ଭାବରେ ଅଷ୍ଟ୍ରେଲିଆ ବିପକ୍ଷ ଟେଷ୍ଟରେ ଏକ ୫ ୱିକେଟ ସଫଳତା ହାସଲ କରିବାରେ ସଫଳ ହୋଇଛନ୍ତି। ଏହା ପୂର୍ବରୁ ଭିନୋ ମଙ୍କଡ, ବିଶାନ ସିଂହ ବେଦୀ, କପିଲ ଦେବ ଓ ଅନୀଲ କୁମ୍ବଲେଙ୍କ ନାଁ ଏହି ତାଲିକାରେ ରହିଛି। ତେବେ ସେନା ଦେଶରେ ଭାରତୀୟ ଦ୍ରୁତ ବୋଲର ଜସପ୍ରୀତ ବୁମ୍ରା ଏପର୍ଯ୍ୟନ୍ତ ୨୭ ଟେଷ୍ଟ ମ୍ୟାଚ୍ ଖେଳି ୧୧୮ ୱିକେଟ୍ ହାସଲ କରିଛନ୍ତି।