ହତ୍ୟା ମାମଲାରେ ରେସଲର ସୁଶୀଲ କୁମାରଙ୍କ ନାଁରେ ଲୁକ ଆଉଟ୍‌ ନୋଟିସ୍‌ ଜାରି

ନୂଆଦିଲ୍ଲୀ: ଭାରତ ପାଇଁ ଦୁଇଥର ଅଲିମ୍ପିକ୍ସରେ ପଦକ ଜିତିଥିବା ପ୍ରଖ୍ୟାତ ରେସଲର ସୁଶୀଲ କୁମାରଙ୍କ ନାଁରେ ଦିଲ୍ଲୀ ପୁଲିସ୍‌ ଲୁକ ଆଉଟ ନୋଟିସ ଜାରି କରିଛି। ଛତ୍ରସାଲ ଷ୍ଟାଡିୟମ ହତ୍ୟାକାଣ୍ଡ ଓ ଗଣ୍ଡଗୋଳ ଘଟଣାରେ ସୁଶୀଲ କୁମାର ସାମିଲ ଥିବା ପୁଲିସ୍‌ ଜାଣିବାକୁ ପାଇଛି।

ଏହି ଘଟଣାରେ ରୁଜୁ ଏଫଆଇଆର୍‌ରେ ସୁଶୀଲ କୁମାରଙ୍କ ନାଁ ଯୋଡ଼ି ହେବା ଦିନଠାରୁ ସେ ଫେରାର ରହିଛନ୍ତି। ତାଙ୍କୁ ଧରିବା ପାଇଁ ରବିବାର ବିଳମ୍ବିତ ସନ୍ଧ୍ୟାରେ ପୁଲିସ୍‌ ଲୁକ ଆଉଟ ନୋଟିସ୍‌ ଜାରି କରିଛି।

ମଙ୍ଗଳବାଳ ଛତ୍ରସାଲ ଷ୍ଟାଡିୟମ ନିକଟ ମଡେଲ ଟାଉନ ଅଞ୍ଚଳରେ ଥିବା ଗୋଟିଏ କୋଠା ଖାଲି କରିବାକୁ ନେଇ ନେଇ ସୁଶୀଲ ଓ ତାଙ୍କ ସହଯୋଗୀମାନେ ଆଉ ଜଣେ ରେସଲରଙ୍କ ସହ ଗଣ୍ଡଗୋଳ କରିଥିଲେ। ଏହି ଗଣ୍ଡଗୋଳ ଏତେ ଭୟଙ୍କର ଥିଲା ଯେ ସାଗର ନାମକ ଜଣେ ୨୪ ବର୍ଷୀୟ କୁସ୍ତିଯୋଦ୍ଧାଙ୍କ ମୃତ୍ୟୁ ଘଟିଥିଲା।

ସାଗରଙ୍କ ଆଉ କିଛି ସହଯୋଗୀ ମଧ୍ୟ ଆହତ ହୋଇଥିଲା। ପୀଡ଼ିତଙ୍କ ପରିବାର ଲୋକଙ୍କ ବୟାନକୁ ଆଧାର କରି ପୁଲିସ୍ ମାମଲା ରୁଜୁ କରିଛି। ମଙ୍ଗଳବାର ରାତିରେ ସାଗର ଓ ତାଙ୍କର ସହଯୋଗୀମାନଙ୍କୁ ଛତ୍ରସାଲ ଷ୍ଟାଡିୟମରେ ସୁଶୀଲ ଆଣ୍ଡ କୋ ପ୍ରବଳ ମାଡ଼ ମାରିଥିବା ଅଭତଯୋଗ ହୋଇଛି।

ଏହି ଗଣ୍ଡଗୋଳ ସୁଶୀଲ, ଅଜୟ, ପ୍ରିନ୍ସ ଦଲାଲ, ସୋନୁ, ସାଗର, ଅମିତ ଓ ଅନ୍ୟମାନଙ୍କ ମଧ୍ୟରେ ହୋଇଥିଲା। ଘଟଣା ପରଠାରୁ ପୁଲିସ୍‌ ସୁଶୀଲଙ୍କୁ ଧରିବା ପାଇଁ ଦିଲ୍ଲୀ-ଏନସିଆର ଓ ପଡ଼ୋଶୀ ରାଜ୍ୟରେ ଚଢ଼ଉ କରିବାରେ ଲାଗିଛି। ତଥାପି ସେ ଫେରାର ରହିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।