ନୀରଜଙ୍କ ଜାଭେଲିନର ଦାମ ୧୦ କୋଟି, ମୋଦି କରିବେ ନିଲାମ

ନୂଆଦିଲ୍ଲୀ: ଅଲିମ୍ପକ୍ସରେ ଭାରତ ପାଇଁ ଐତିହାସିକ ସ୍ୱର୍ଣ୍ଣ ଜିତିଥିବା ନୀରଜ ଚୋପ୍ରାଙ୍କ ଜାଭେଲିନର ଦାମ ୧୦ କୋଟି ଟଙ୍କା। ନୀରଜ ଯେଉଁ ଜାଭେଲିନ ଦ୍ୱାରା ଭାରତ ପାଇଁ ସ୍ୱର୍ଣ୍ଣ ଜିତିଥିଲେ, ତା’କୁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଉପହାର ଆକାରରେ ଦେଖିଥିଲେ। ଏବେ ମୋଦିଙ୍କୁ ମିଳିଥିବା ଉପହାରଗୁଡ଼ିକୁ ସଂସ୍କୃତି ମନ୍ତ୍ରଣାଳୟ ଇ-ଅକ୍ସନ ଜରିଆରେ ବିକ୍ରି କରିବାକୁ ନିଷ୍ପତ୍ତି ନେଇଛି।

ଏଥିରେ ନୀରଜଙ୍କ ଜାଭେଲିନ ଓ ଅଲିମ୍ପକ୍ସରେ ଭାରତ ପାଇଁ ବକ୍ସିଂରେ ବ୍ରୋଞ୍ଜ ପଦକ ଜିତିଥିବା ଲଭଲୀନାଙ୍କ ଗ୍ଲୋବ୍ସ ମଧ୍ୟ ରହିଛି। ଏହାବାଦ ଅନେକ ପଦକ ବିଜେତାଙ୍କ କ୍ରୀଡ଼ା ଉପକରଣକୁ ମଧ୍ୟ ନିଲାମ କରାଯିବ। ଶୁକ୍ରବାର ଠାରୁ ଆରମ୍ଭ ହୋଇଥିବା ଏହି ଇ-ଅକ୍ସନ ପ୍ରକ୍ରିୟା ଅକ୍ଟୋବର ୭ ଯାଏ ଚାଲିବ।

ଅକ୍ସନର ଦ୍ୱିତୀୟ ଦିନରେ ବେଶ ଅଧିକ ଦାମର ବିଡିଂ ଦେଖିବାକୁ ମିଳିଛି। ନୀରଜଙ୍କ ଜାଭେଲିନ ଓ ଲଭଲୀନାଙ୍କ ଗ୍ଲୋବ୍ସକୁ ନେବା ପାଇଁ ୧୦ କୋଟି ଲେଖାଏ ଟଙ୍କା ଦେଖାବାକୁ ଲୋକମାନେ ଆଗ୍ରହ ଦେଖାଇଛନ୍ତି। ସେହିପରି ପାରାଲିମ୍ପିକ୍ସରେ ଭାରତ ପାଇଁ ଜାଭେଲିନରେ ସୁମିତ ଅନ୍ତିଲ ସ୍ୱର୍ଣ୍ଣ ପଦକ ଜିତିଥିଲେ। ଉକ୍ତ ଜାଭେଲିନକୁ ମଧ୍ୟ ସେ ମୋଦିଙ୍କୁ ଉପହାର ଆକାରରେ ଦେଇଛନ୍ତି। ଏହାକୁ କିଣିବା ପାଇଁ ସର୍ବାଧିକ ୩ କୋଟି ଟଙ୍କାର ବିଡ୍‌ ଲାଗିଛି।

ଭାରତ ପାଇଁ ବ୍ୟାଡମିଣ୍ଟନରେ ପିଭି ସିନ୍ଧୁ ବ୍ରୋଞ୍ଜ ପଦକ ଜିତିଥିଲେ। ଉକ୍ତ ରାକେଟ ସହ ଗୋଟିଏ ବ୍ୟାଗ ମଧ୍ୟ ନିଲାମରେ ସାମିଲ ହୋଇଛି। ରାକେଟକୁ କିଣିବା ପାଇଁ ୨,୦୦,୨୦,୦୦୦ ଟଙ୍କାର ବିଡ୍‌ ଡକାଯାଇଛି। ସେହିପରି ମହିଳା ଟିମ୍‌ର ଖେଳାଳିଙ୍କ ଦସ୍ତଖତ ଥିବା ହକି ଷ୍ଟିକ୍‌କୁ କିଣିବା ପାଇଁ ଲୋକମାନେ ସର୍ବାଧିକ ୧,୦୦,୦୦,୫୦୦ ଟଙ୍କା ଦେବାକୁ ଆଗ୍ରହ ଦେଖାଇଛନ୍ତି।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ନୀରଜଙ୍କ ଜାଭେଲିନର ବେସ୍‌ ପ୍ରାଇସ ୧ କୋଟି ଟଙ୍କା ଓ ଲଭଲୀନଙ୍କ ଗ୍ଲୋବ୍ସର ମୂଳ ଦାମ ୮୦ ଲକ୍ଷ ଟଙ୍କା ରହିଥିଲା। ଇ-ଅକ୍ସନରୁ ମିଳିବାକୁ ଥିବା ଟଙ୍କା ନମାମୀ ଗଙ୍ଗା ମିଶନରେ ଖର୍ଚ୍ଚ କରାଯିବ ବୋଲି ସରକାର କହିଛନ୍ତି।