ଅଲିମ୍ପିକ୍ସରେ ଭାଗ ନେଇଥିବା ଖେଳାଳିଙ୍କୁ ଚା’ ପାର୍ଟିକୁ ନିମନ୍ତ୍ରଣ କଲେ ରାଷ୍ଟ୍ରପତି

ନୂଆଦିଲ୍ଲୀ: ଟୋକିଓ ଅଲିମ୍ପିକ୍ସରେ ଭାଗ ନେଇଥିବା ସବୁ ଭାରତୀୟ ଖେଳାଳିଙ୍କ ପାଇଁ ଗୋଟିଏ ଚା’ ପାର୍ଟିର ଆୟୋଜନ କରିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ। ଏଥିରେ ଯୋଗଦେବା ପାଇଁ ସେ ସବୁ ଖେଳାଳିଙ୍କୁ ନିମନ୍ତ୍ରଣ କରିଛନ୍ତି। ‘ହାଇ ଟି’ ନାମରେ ରାଷ୍ଟ୍ରପତି ଭବନର ସାଂସ୍କୃତି କେନ୍ଦ୍ରରେ ଶନିବାର ଏହି କାର୍ଯ୍ୟକ୍ରମ ଅନୁଷ୍ଠିତ ହେବ। ଏହି ସମୟରେ ରାଷ୍ଟ୍ରପତି ରାମନାଥ କୋବିନ୍ଦ ସବୁ ଖେଳାଳିଙ୍କ ସହ ଆଲୋଚନା କରିବେ। ଏଥିସହ ସେମାନଙ୍କୁ ଶୁଭେଚ୍ଛା ଜଣାଇବେ। ଏଥିରେ ଦେଶର ପ୍ରଥମ ମହିଳା ମଧ୍ୟ ଯୋଗଦେବେ ବୋଲି ଜଣାପଡ଼ିଛି।

ଅଗଷ୍ଟ ୧୪ରେ ରାଷ୍ଟ୍ରପତିଙ୍କୁ ଭେଟିବା ପରେ ଭାରତୀୟ ଖେଳାଳିମାନେ ଅଗଷ୍ଟ ୧୫ରେ ଲାଲକିଲ୍ଲାରେ ଆୟୋଜିତ ସ୍ୱାଧୀନତା ଦିବସ କାର୍ଯ୍ୟକ୍ରମରେ ଯୋଗଦେବେ। ଏହି ସମୟରେ ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବ୍ୟକ୍ତିଗତ ଭାବେ ଖେଳାଳିମାନଙ୍କୁ ଭେଟି ସେମାନଙ୍କ ସହ ଆଲୋଚନା କରିବେ। ଏଥିପାଇଁ ମୋଦି ନିଜେ ସମସ୍ତଙ୍କୁ ନିମନ୍ତ୍ରଣ କରିଛନ୍ତି।

ଚଳିତ ଅଲିମ୍ପିକ୍ସରେ ଭାରତ ସବୁଠାରୁ ଭଲ ପ୍ରଦର୍ଶନ କରି ୭ଟି ପଦକ ଜିତିଛି। ୨୦୧୨ ଅଲିମ୍ପିକ୍ସରେ ଦେଶ ସର୍ବାଧିକ ୬ଟି ପଦକ ଜିତିଥିଲା। ହେଲେ ଏଥର ଭାରତ ନୀରଜ ଚୋପ୍ରାଙ୍କ ଐତିହାସିକ ସ୍ୱର୍ଣ୍ଣ ସହ ମୋଟ ୭ଟି ପଦକ ଜିତିଛି। ନୀରଜଙ୍କ ବ୍ୟତୀତ ଭାରୋତ୍ତୋଳନରେ ମୀରାବାଇଈ ଚାନୁ ରୌପ୍ୟ, ରେସଲିଂରେ ରବି କୁମାର ଦାହିୟା ରୌପ୍ୟ, ବକ୍ସିଂରେ ଲଭଲିନା ବ୍ରୋଞ୍ଜ, ବ୍ୟାଡମିଣ୍ଟନରେ ପିଭି ସିନ୍ଧୁ ବ୍ରୋଞ୍ଜ, ୬୫ କେଜି ବର୍ଗର ରେସଲିଂରେ ବଜରଙ୍ଗ ପୁନିଆ ବ୍ରୋଞ୍ଜ ଓ ପୁରୁଷ ହକି ଟିମ୍‌ ଦୀର୍ଘ ୪୧ ବର୍ଷ ପରେ ଅଲିମ୍ପିକ୍ସରେ ବ୍ରୋଞ୍ଜ ପଦକ ଜିତିଛି।

ସୋମାବାର ଭାରତୀୟ ଦଳ ସ୍ୱଦେଶ ଫେରିବା ପରେ ସମସ୍ତଙ୍କୁ ଭବ୍ୟ ସ୍ୱାଗତ କରାଯାଇଥିଲା। କ୍ରୀଡ଼ା ମନ୍ତ୍ରଣାଳୟ ପକ୍ଷରୁ ସ୍ୱତନ୍ତ୍ର କାର୍ଯ୍ୟକ୍ରମ ଜରିଆରେ ସବୁ ପଦକ ବିଜେତାଙ୍କୁ ସମ୍ବର୍ଦ୍ଧନା ଦିଆଯାଇଥିଲା।