ବର୍ଡର ଗାଭାସ୍କର ଟ୍ରଫିର ପଞ୍ଚମ ତଥା ଅନ୍ତିମ ଟେଷ୍ଟ ମ୍ୟାଚ୍ ଜିତି ୧୦ ବର୍ଷ ପରେ ଏହି ଟାଇଟଲ୍ ହାତେଇଛି ଅଷ୍ଟ୍ରେଲିଆ। ଏହି ବିଜୟ ସହ କଙ୍ଗାରୁ ଦଳ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲରେ ମଧ୍ୟ ପ୍ରବେଶ କରିଛି। ତେବେ ଏହି ଟୁର୍ଣ୍ଣାମେଣ୍ଟ ଅଷ୍ଟ୍ରେଲିଆ ଓ ଭାରତର ଦୁଇ କିମ୍ବଦନ୍ତୀ କ୍ରିକେଟର ଆଲାନ ବର୍ଡର ଓ ସୁନୀଲ ଗାଭାସ୍କରଙ୍କ ନାଁରେ ନାମିତ ହୋଇଥିଲେ ହେଁ ବର୍ଡର ଗାଭାସ୍କର ଟ୍ରଫି ପ୍ରଦାନ କାର୍ଯ୍ୟକ୍ରମକୁ ଗାଭାସ୍କରଙ୍କୁ ନିମନ୍ତ୍ରଣ କରାଯାଇନଥିଲା। ଯାହାକୁ ନେଇ ସେ କ୍ଷୋଭ ପ୍ରକାଶ କରିଛନ୍ତି।
ଏହି ଟୁର୍ଣ୍ଣାମେଣ୍ଟର ଅନ୍ତିମ ମ୍ୟାଚରେ ଘରୋଇ ଦଳ ଭାରତକୁ ୬ ୱିକେଟରେ ପରାସ୍ତ କରିଥିଲା। ଏହାପରେ ଆଲାନ ବର୍ଡର ଅଷ୍ଟ୍ରେଲିଆ ଅଧିନାୟକ ପ୍ୟାଟ୍ କମିନ୍ସଙ୍କୁ ଟ୍ରଫି ପ୍ରଦାନ କରିଥିଲେ। ହେଲେ ସେହି ସମୟରେ ସୁନୀଲ ଗାଭାସ୍କର ମୈଦାନରେ ଉପଲବ୍ଧ ଥିଲେ ମଧ୍ୟ ତାଙ୍କୁ ଏହି କାର୍ଯ୍ୟକ୍ରମକୁ ଡକାଯାଇନଥିଲା। ଯାହାକୁ ନେଇ ଅସନ୍ତୋଷ ପ୍ରକାଶ କରି ଗାଭାସ୍କର କହିଛନ୍ତି ଯେ, ମୁଁ ପୁରସ୍କାର ପ୍ରଦାନ କାର୍ଯ୍ୟକ୍ରମକୁ ଯାଇଥିଲେ ଖୁସି ହୋଇଥାଆନ୍ତି। କାରଣ ଏହା 'ବର୍ଡର-ଗାଭାସ୍କର' ଟ୍ରଫି ଏବଂ ଭାରତ ଓ ଅଷ୍ଟ୍ରେଲିଆ ଦୁଇ ଦେଶ ସହ ଜଡ଼ିତ। ମୁଁ ସେହି ଷ୍ଟାଡିୟମରେ ହିଁ ଥିଲି। ଟ୍ରଫି ଅଷ୍ଟ୍ରେଲିଆକୁ ଦିଆଯାଉଛି ବୋଲି ମୋର କୌଣସି ଅସୁବିଧା ନଥିଲା। ସେମାନେ ଭଲ ଖେଳିବାରୁ ଜିତିଲେ। ହେଲେ କେବଳ ମୁଁ ଏକ ଭାରତୀୟ ବୋଲି ମୋତେ ସେଠାକୁ ଡକାଗଲା ନାହିଁ। ବର୍ଡର ମୋର ଭଲ ବନ୍ଧୁ। ତାଙ୍କ ସହ ଟ୍ରଫି ପ୍ରଦାନ କରି ମୁଁ ଖୁସି ହୋଇଥାଆନ୍ତି।
Also Read
ଉଲ୍ଲେଖ ଯୋଗ୍ୟ, ଭାରତ ଓ ଅଷ୍ଟ୍ରେଲିଆ ମଧ୍ୟରେ ୧୯୯୬-୧୯୯୭ ମସିହାରୁ ବର୍ଡର-ଗାଭାସ୍କର ଟ୍ରଫି ଖେଳାଯାଉଛି। ଏହି ଟୁର୍ଣ୍ଣାମେଣ୍ଟ ଅଷ୍ଟ୍ରେଲିଆ ଓ ଭାରତର ଦୁଇ କିମ୍ବଦନ୍ତୀ କ୍ରିକେଟର ଆଲାନ ବର୍ଡର ଓ ସୁନୀଲ ଗାଭାସ୍କରଙ୍କ ନାଁରେ ନାମିତ। ବିଶ୍ୱ ଟେଷ୍ଟ କ୍ରିକେଟରେ ଏହା ଏକ ପ୍ରମୁଖ ଟୁର୍ଣ୍ଣାମେଣ୍ଟ। ଏଭଳି ସ୍ଥଳେ ଗାଭାସ୍କରଙ୍କ ନାଁରେ ନାମିତ ଟୁର୍ଣ୍ଣାମେଣ୍ଟର ଟ୍ରଫି ପ୍ରଦାନ କାର୍ଯ୍ୟକ୍ରମକୁ ତାଙ୍କୁ ନଡାକିବାକୁ ନେଇ ସୋଶାଲ ମିଡିଆରେ ପ୍ରଶଂସକମାନେ ମଧ୍ୟ ଅଷ୍ଟ୍ରେଲିଆ କ୍ରିକେଟ ବୋର୍ଡକୁ ସମାଲୋଚନା କରୁଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
