'ପ୍ରଧାନମନ୍ତ୍ରୀ ଯାଇ ବିରିୟାନି ଖାଇଲେ ଭଲ, ଟିମ୍ ଇଣ୍ଡିଆ ଖେଳିବାକୁ ଗଲେ ଖରାପ'

ପାକିସ୍ତାନରେ ଖେଳାଯିବାକୁ ଥିବା ଚାମ୍ପିୟନ୍ସ ଟ୍ରଫି ଟୁର୍ଣ୍ଣାମେଣ୍ଟକୁ ନେଇ ଭାରତରେ ଏକ ଭିନ୍ନ ପ୍ରକାରର ପରିବେଶ ରହିଛି। ଟିମ୍ ଇଣ୍ଡିଆ ଏହି ହାଇ-ପ୍ରୋଫାଇଲ୍ ଟୁର୍ଣ୍ଣାମେଣ୍ଟ ଖେଳିବା ପାଇଁ ପାକିସ୍ତାନ ଗସ୍ତ କରିବାର ସମ୍ଭାବନା କ୍ଷୀଣ। ତଥାପି ଟୁର୍ଣ୍ଣାମେଣ୍ଟକୁ ନେଇ କୌଣସି ସ୍ପଷ୍ଟତା ଆସିପାରୁନାହିଁ। ଏହି ସମୟରେ ଆରଜେଡି ନେତା ତେଜସ୍ୱୀ ଯାଦବ ଏବେ ଭାରତ-ପାକିସ୍ତାନ କ୍ରିକେଟ୍ ବିବାଦକୁ ଡେଇଁଛନ୍ତି। ସେ ଏହି ପ୍ରସଙ୍ଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କଟାକ୍ଷ କରିଛନ୍ତି।

ଭାରତୀୟ କ୍ରିକେଟ୍ ଦଳ ଚାମ୍ପିୟନ୍ସ ଟ୍ରଫି ଖେଳିବାକୁ ପାକିସ୍ତାନ ଯିବ କି ନାହିଁ, ସେ ପ୍ରସଙ୍ଗରେ ବିସିସିଆଇ ଏବଂ ପିସିବି ମୁହାଁମୁହିଁ ସ୍ଥିତିରେ। ଏହି କାରଣରୁ ଫେବୃଆରୀରେ ଖେଳାଯିବାକୁ ଥିବା ଟୁର୍ଣ୍ଣାମେଣ୍ଟର କାର୍ଯ୍ୟସୂଚୀ ଏପର୍ଯ୍ୟନ୍ତ ପ୍ରକାଶ କରାଯାଇ ନାହିଁ। ବର୍ତ୍ତମାନ ଏହି ପ୍ରସଙ୍ଗରେ ଆରଜେଡି ନେତା ତଥା ବିହାର ବିଧାନସଭାରେ ବିରୋଧୀ ଦଳ ନେତା ତେଜସ୍ୱୀ ଯାଦବ ଭାରତ ସରକାରଙ୍କୁ ଟାର୍ଗେଟ କରିଛନ୍ତି। ଟିମ୍ ଇଣ୍ଡିଆକୁ ପାକିସ୍ତାନ ପଠାଇବାରେ ଅସୁବିଧା କ'ଣ ବୋଲି ସେ ପ୍ରଶ୍ନ କରିଛନ୍ତି। ରାଜନୀତିକୁ କ୍ରୀଡାଠାରୁ ଦୂରରେ ରଖିବା ଉଚିତ ବୋଲି ସେ କହିଛନ୍ତି।

ତେଜସ୍ୱୀ ଯାଦବ କହିଛନ୍ତି ଯେ ରାଜନୀତିକୁ କ୍ରୀଡା ସହ ଯୋଡିବା ଭଲ କଥା ନୁହେଁ। ସମସ୍ତେ ଅଲିମ୍ପିକ୍ସରେ ଭାଗ ନେଉ ନାହାଁନ୍ତି କି? ତେବେ ଭାରତୀୟ ଦଳ କାହିଁକି ପାକିସ୍ତାନ ଯିବେ ନାହିଁ? ଯଦି ପ୍ରଧାନମନ୍ତ୍ରୀ ମୋଦି ସେଠାରେ ବିରିୟାନି ଖାଇବାକୁ ଯାଆନ୍ତି, ତେବେ ସେଠାକୁ ଯିବା ଭଲ। କିନ୍ତୁ ଭାରତୀୟ କ୍ରିକେଟ୍ ଦଳ ସେଠାକୁ ଖେଳିବାକୁ ଯିବା କାହିଁକି ଭଲ ନୁହେଁ? ତେଜସ୍ୱୀ ଯାଦବ ଯେଉଁ ବିରିୟାନି ବିଷୟରେ କହି କଟାକ୍ଷ କରିଛନ୍ତି, ତାହା ହେଉଛି ୨୦୧୫ ମସିହାର ଘଟଣା। ସେତେବେଳେ ପ୍ରଧାନମନ୍ତ୍ରୀ ମୋଦି ପାକିସ୍ତାନ ଗସ୍ତରେ ଯାଇଥିଲେ।

ଉଲ୍ଲେଖଯୋଗ୍ୟ, ୨୦୦୮ରେ ମୁମ୍ବାଇ ଆତଙ୍କବାଦୀ ଆକ୍ରମଣ ପରଠାରୁ ଭାରତୀୟ ଦଳ କ୍ରିକେଟ୍ ଖେଳିବା ପାଇଁ ପାକିସ୍ତାନ ଗସ୍ତ କରିନାହିଁ। ଏଥି ସହିତ, ୨୦୧୨-୨୦୧୩ ପରଠାରୁ ଦୁଇ ଦେଶ ମଧ୍ୟରେ କୌଣସି ଦ୍ୱିପାକ୍ଷିକ ସିରିଜ୍ ଖେଳାଯାଇ ନାହିଁ।