ପାଣ୍ଡ୍ୟା ଓ ରାହୁଲଙ୍କ ସ୍ଥାନରେ ଟିମ୍‌ ଇଣ୍ଡିଆରେ ସାମିଲ ହେଲେ ବିଜୟ ଏବଂ ଗିଲ୍‌

ମୁମ୍ବାଇ: ବିବାଦୀୟ ହୋଇ ପଡ଼ିଥିବା ହାର୍ଦ୍ଦିକ ପାଣ୍ଡ୍ୟା ଓ କେଏଲ୍‌ ରାହୁଲଙ୍କ ସ୍ଥାନରେ ବିଜୟ ଶଙ୍କର ଏବଂ ଶୁଭମାନ୍‌ ଗିଲ୍‌ଙ୍କୁ ବିସିସିଆଇ ଭାରତୀୟ ଟିମ୍‌ରେ ସ୍ଥାନ ଦେଇଛି। ପାଣ୍ଡ୍ୟାଙ୍କ ସ୍ଥାନରେ ବିଜୟ ଏବଂ ରାହୁଲଙ୍କ ସ୍ଥାନରେ ଗିଲ୍‌ଙ୍କୁ ସୁଯୋଗ ମିଳିଛି। ବିଜୟ ଉଭୟ ଅଷ୍ଟ୍ରେଲିଆ ଓ ନ୍ୟୁଜିଲ୍ୟାଣ୍ଡ ସିରିଜ୍‌ରେ ସ୍ଥାନ ପାଇଥିବା ବେଳେ ଗିଲ୍‌ଙ୍କୁ ନ୍ୟୁଜିଲ୍ୟାଣ୍ଡ ଗସ୍ତରେ ଯିବାକୁ ଥିବା ଟିମ୍‌ ଇଣ୍ଡିଆରେ ନିଆଯାଇଛି।

ଅଷ୍ଟ୍ରେଲିଆରେ ବିପକ୍ଷ ଦ୍ୱିତୀୟ ଦିନିକିଆ ପୂର୍ବରୁ ବିଜୟ ଟିମ୍‌ ଇଣ୍ଡିଆ ସହ ସାମିଲ ହେବେ। ସେହିପରି ଅଷ୍ଟ୍ରେଲିଆ ଗସ୍ତ ପରେ ଭାରତୀୟ ଦଳ ୨୩ ଜାନୁଆରୀରୁ ନ୍ୟୁଜିଲ୍ୟାଣ୍ଡ ସହ ଦିନିକିଆ ଓ ଟି-ଟ୍ୱେଣ୍ଟି ସିରିଜ୍‌ ଖେଳିବେ।

ଭାରତ ପାଇଁ ୫ଟି ଟି-ଟ୍ୱେଣ୍ଟି ଖେଳି ସାରିଥିବା ବିଜୟ ୩ଟି ୱିକେଟ୍‌ ନେଇଛନ୍ତି। ପ୍ରଥମ ଶ୍ରେଣୀ କ୍ରିକେଟ୍‌ରେ ସେ ୪୧ଟି ମ୍ୟାଚ୍‌ ଖେଳି ୧୬୩୦ ରନ୍‌ କରିବା ସହ ୩୨ଟି ୱିକେଟ୍‌ ନେଇଛନ୍ତି।

ସେହିପରି ୧୯ ବର୍ଷରୁ କମ୍‌ ବିଶ୍ୱକପ୍‌ ୨୦୧୮ରେ ନିଜ କମାଲ ଦେଖାଇଥିବା ଗିଲ୍‌ ପ୍ରଥମ ଥର ପାଇଁ ଭାରତୀୟ ଦଳରେ ସାମିଲ ହୋଇଛନ୍ତି। ୨୦୧୮ ଆଇପିଏଲ୍‌ରେ କୋଲକାତା ତରଫରୁ ଖେଳି ଗିଲ୍‌ ଭଲ ପ୍ରଦର୍ଶନ କରିଥିଲେ। ପଞ୍ଜାବ ତରଫରୁ ସେ ପ୍ରଥମ ଶ୍ରେଣୀ କ୍ରିକେଟ୍‌ ଖେଳନ୍ତି। ୨୦୧୮-୧୯ ରଣଜୀ ଟ୍ରଫିରେ ସେ ତାମିଲନାଡୁ ବିପକ୍ଷରେ ୨୬୮ ରନ୍‌ର ଦମଦାର ଇଂନିସ୍‌ ଖେଳିଥିଲେ। ଏହାସହ ରଣଜୀ ଟ୍ରଫିରେ ୫ଟି ମ୍ୟାଚ୍‌ରେ ସେ ଦୁଇଟି ଶତକ, ୪ଟି ଅର୍ଦ୍ଧଶତକ ମାରିବା ସହ ୭୨୮ ରନ୍‌ କରିଥିଲେ।

ସୂଚନାଯୋଗ୍ୟ, କରନ ଜୋହରଙ୍କ ଶୋ’ ‘କଫି ଉଇଥ କରନ’ରେ ରାହୁଲ ଓ ପାଣ୍ଡ୍ୟା ମହିଳାଙ୍କ ବିରୋଧରେ ଅରୁଚିକର ମନ୍ତବ୍ୟ ଦେଇଥିଲେ। ଏହାପରେ ବିସିସିଆଇ ଉଭୟଙ୍କୁ ଟିମ୍‌ରୁ ବାହାର କରିଦେଇଥିଲା।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।