ଭୁବନେଶ୍ୱର: ଆଜି ସିବିଏସ୍ଇ ଦଶମ ଶ୍ରେଣୀ ପରୀକ୍ଷା ଫଳ ପ୍ରକାଶ ପାଇଛି । www.cbseresults.nic.in ୱେବ୍ସାଇଟ୍ରେ ରେଜଲ୍ଟ ଉପଲବ୍ଧ ହେଉଛି।
ସାରା ଦେଶରେ ଏଥର ୯୬.୨୧ ପ୍ରତିଶତ ପିଲା ପାସ୍ କରିଛନ୍ତି। ତେବେ ଏହା ଗତ ବର୍ଷ ତୁଳନାରେ କମ୍। ଗତବର୍ଷ ୯୭.୩୨ ପ୍ରତିଶତ ପିଲା ପାସ୍ କରିଥିଲେ। ଛାତ୍ରମାନଙ୍କ ଅପେକ୍ଷା ଛାତ୍ରୀମାନଙ୍କ ପାସ୍ ହାର ଅଧିକ ରହିଛି। ଛାତ୍ରୀମାନଙ୍କ ପାସ୍ ହାର ୯୬.୩୬ ପ୍ରତିଶତ ରହିଥିବା ବେଳେ ଛାତ୍ରମାନଙ୍କ ପାସ୍ ହାର ୯୬.୧୧ ପ୍ରତିଶତ ରହିଛି। ସିବିଏସ୍ଇ ଦ୍ୱାଦଶ ଶ୍ରେଣୀ ଭଳି ଦଶମ ଶ୍ରେଣୀରେ ମଧ୍ୟ କେରଳର ତିରୁଅନନ୍ତପୁରମ୍ ରିଜିଅନର ରେଜଲ୍ଟ ସବୁଠୁ ଭଲ ହୋଇଛି। ଏଠାରେ ମୋଟ୍ ପାସ୍ ହାର ୯୯.୮୭ ପ୍ରତିଶତ ରହିଛି।
ଓଡ଼ିଶାରେ ମୋଟ୍ ପାସ୍ ହାର ୯୮.୫୬ ପ୍ରତିଶତ ରହିଥିବା ବେଳେ ଭୁବନେଶ୍ୱର ରିଜିଅନରେ ପାସ୍ ହାର ୯୬.୨୭ ପ୍ରତିଶତ ରହିଛି।
ସାରା ଦେଶରେ ଥିବା ମୋଟ ୧୫,୩୦୯ଟି ସ୍କୁଲରେ ଏଥର ୧୪, ୯୯, ୨୧୨ ଜଣ ଛାତ୍ରଛାତ୍ରୀ ଦଶମ ଶ୍ରେଣୀ ପରୀକ୍ଷା ଦେଇଥିଲେ। ସେମାନଙ୍କ ମଧ୍ୟରେ ୮,୯୨,୬୮୫ ଛାତ୍ର ରହିଥିବା ବେଳେ ଛାତ୍ରୀଙ୍କ ସଂଖ୍ୟା ଥିଲା ୬,୬,୪୩୭। ଦେଶରେ ଥିବା ୧୦ଟି ରିଜିୟନ୍ ମଧ୍ୟରୁ ଦିଲ୍ଲୀ ରିଜିଅନ୍ରେ ସର୍ବାଧିକ ୨, ୯୧,୩୭୧ ଛାତ୍ରଛାତ୍ରୀ ଏଥର ସିବିଏସ୍ଇ ଦଶମ ଶ୍ରେଣୀ ପରୀକ୍ଷା ଦେଇଥିଲେ।
ଓଡ଼ିଶା ରିଜିଅନ୍ରେ ୭୫ ହଜାରରୁ ଅଧିକ ଛାତ୍ରଛାତ୍ରୀ ଅଛନ୍ତି। ଓଡ଼ିଶା ସମେତ ଛତିଶଗଡ଼ ଓ ପଶ୍ଚିମବଙ୍ଗ ରାଜ୍ୟ ଓଡ଼ିଶା ରିଜିଅନ୍ରେ ଆସୁଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।