ପଟ୍ଟନାୟକ କହିଛନ୍ତି, “ସବୁ ଦଳ ପରି କଂଗ୍ରେସରେ ବି ମୂଷା ରହିଛନ୍ତି। ଆମ ଦଳର ମୂଷାମାନେ ଏପର୍ଯ୍ୟନ୍ତ ବିଷ ଖାଇନାହାନ୍ତି। କିଛି କିଛି ମରୁଛନ୍ତି, ଆଉ କିଛି ଭବିଷ୍ୟତରେ ମରିବେ। ଏବେ ମୂଷାଙ୍କୁ ମାରିବା ପାଇଁ ଉଦ୍ୟମ ଚାଲିଛି।”
ନୂଆ ପିସିସି ଗଠନ ବେଳେ ଟିମ୍ର କଳେବରକୁ ନେଇ ନିରଞ୍ଜନ କଟାକ୍ଷ କରିଥିଲେ। ସେତେବେଳେ ସେ କହିଥିଲେ ବହୁ ଲୋକରେ ମୂଷା ମରେ ନାହିଁ। ଏବେ ପୁଣି ନିରଞ୍ଜନଙ୍କ ମୂଷା ଶଦ୍ଦ ବ୍ୟବହାରକୁ ନେଇ ଚର୍ଚ୍ଚା ଜୋର ଧରିଛି।
ନିରଞ୍ଜନଙ୍କ ବୟାନକୁ ସମର୍ଥନ କରିଛନ୍ତି ପୂର୍ବତନ ପିସିସି ସଭାପତି ଜୟଦେବ ଜେନା। ସେ କହିଛନ୍ତି, “ଦଳରେ ସମସ୍ତଙ୍କୁ ସନ୍ତୁଷ୍ଟ କରିବା ସମ୍ଭବ ନୁହେଁ। ମୁଁ ନୁହେଁ ଆମେ ନାରା ଦେଇଥିବା ପିସିସି ସଭାପତି ଏଥିପାଇଁ ଉଦ୍ୟମ ଜାରି ରଖିଛନ୍ତି।”
ପିସିସି ମୁଖପାତ୍ର ଗଣେଶ୍ୱର ବେହେରା କହିଛନ୍ତି, “ମୁଁ ତାଙ୍କ ସହିତ ଏକମତ। କିଛି ଲୋକ ଅଛନ୍ତି, ଯେଉଁମାନେ ଅଭ୍ୟାସଗତ ଭାବେ ସମସ୍ୟା ସୃଷ୍ଟି କରନ୍ତି। ସେମାନଙ୍କୁ ପ୍ରତିହତ କରିବାର ଶକ୍ତି ଦଳର ଅଛି।”
ଗତ ସପ୍ତାହରେ କଂଗ୍ରେସ ଉପାଧ୍ୟକ୍ଷ ରାହୁଲ ଗାନ୍ଧିଙ୍କୁ ଭେଟି ହେମାନନ୍ଦ ଦଳରେ ଥିବା ଅସନ୍ତୋଷ କଥା କହିଥିଲେ।