ମୃତ ଯୁବତୀଙ୍କ ନାଁ ଗୀତା ତଅଁଳ। ତାଙ୍କ ଘର ପାଟଣାଗଡ଼ ବ୍ଲକ୍ ଖଉଣ୍ଟସମଲେଇ ଗାଁରେ। ସେ ଭିନ୍ନ ଜାତିର ଜଣେ ଯୁବକଙ୍କୁ ପ୍ରେମ ବିବାହ କରିଥିଲେ। ତେଣୁ ତାଙ୍କ ବାପା କୈଳାସ ତଅଁଳା ତାଙ୍କୁ ଚାରି ଦିନ ତଳେ ମାରି ଦେବାକୁ ଧମକ ଦେଇଥିଲେ। ଏହା ପରେ କୈଳାସଙ୍କ ମା’ ମେମ୍ ତଅଁଳା ନାତୁଣୀର ଜୀବନ ବଞ୍ଚାଇବା ପାଇଁ ତାଙ୍କୁ ତରଭା ଥାନା ଅନ୍ତର୍ଗତ ଫଟାମୁଣ୍ଡା ଗାଁରେ ଲୁଚାଇ ରଖିଥିଲେ। ତେବେ କୈଳାସ କୌଣସି ସୂତ୍ରରୁ ଏ ସଂପର୍କରେ ଜାଣିପାରି ଗତକାଲି ସେଠାକୁ ଯାଇ ଦୁଇ ଜଣଙ୍କୁ ବୁଝାସୁଝା କରି ବଲାଙ୍ଗିର ନେଇ ଆସିଥିଲେ। ରାତି ପ୍ରାୟ ୧୧ଟା ବେଳେ ବଲାଙ୍ଗିର ରେଳ ଷ୍ଟେସନଠାରୁ ମାତ୍ର ତିନି ଶହ ମିଟର ଦୂରରେ ଥିବା ଏକ ବୁଦାମୂଳେ ଝିଅର ତଣ୍ଟି ଚିପି ହତ୍ୟା କରିଥିଲେ କୈଳାସ। ନାତୁଣୀକୁ ନ ମାରିବାକୁ ମେମ୍ ଯେତେ ନେହୁରା ହୋଇଥିଲେ ମଧ୍ୟ ସେ ଶୁଣି ନ ଥିଲେ।
ଗତ ବର୍ଷ ଗୀତା ତାଙ୍କ ବାପାମା’ଙ୍କ ସହିତ ବିଜୟୱାଡ଼ାକୁ ଦାଦନ ଖଟିବା ପାଇଁ ଯାଇଥିଲେ। ସେଠାରେ ନରେଶ ତାଣ୍ଡି ନାମକ ଜଣ ଯୁବକ ସହିତ ତାଙ୍କର ପ୍ରେମ ହୋଇଥିଲା। ତେବେ ଯୁବକ ଜଣଙ୍କ ଭିନ୍ନ ଜାତିର ହୋଇଥିବାରୁ ବିବାହକୁ ଅନୁମତି ଦେଇ ନ ଥିଲେ ଗୀତାଙ୍କ ବାପାମା’। ତେଣୁ ଦୁହେଁ ତିନି ମାସ ତଳେ ଫେରାର ହୋଇ ଯାଇଥିଲେ। ପରେ ସେମାନେ ନରେଶର ଗାଁ ବଙ୍ଗୋମୁଣ୍ଡା ଥାନା ଅନ୍ତର୍ଗତ ଶରଦାପୁରକୁ ଆସିଥିଲେ। ଗର୍ଭବତୀ ଥିବା ଗୀତାଙ୍କୁ ନରେଶର ଘର ଲୋକେ ଭିନ୍ନ ଜାତିର କହି ଘରେ ପୂରାଇ ଦେଇ ନ ଥିଲେ। ଫଳରେ ସେ ଅନ୍ୟ କୌଣସି ଉପାୟ ନ ପାଇ ନିଜ ବାପ ଘରକୁ ଫେରି ଆସିଥିଲେ। ତେବେ ତାଙ୍କ ବାପା କୈଳାସ ତାଙ୍କୁ ଘରେ ପୂରାଇ ଦେଇ ନ ଥିଲା। ଓଲଟି ହତ୍ୟା କରିବାକୁ ଧମକ ଦେଇ ଆସୁଥିଲେ।