ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
<p>ଭୁବନେଶ୍ୱର (ଓଡ଼ିଶା ରିପୋର୍ଟର): ଗ୍ରାମ ରୋଜଗାର ସେବକ (ଜିଆର୍‌ଏସ୍‌)ଙ୍କୁ ପ୍ରଥମେ ଲାଠି। ପରେ ଦରମା ବଢ଼ାଇ ସେମାନଙ୍କ ଘାଆରେ ମଲମ ମାରିଛନ୍ତି ସରକାର। ଏଣିକି ଜିଆର୍‌ଏସ୍‌ମାନେ ମାସିକ ୫୦୦୦ ବଦଳରେ ୭୦୦୦ ଟଙ୍କା ଦରମା ପାଇବେ। ଏହାଛଡ଼ା ଆର୍ଥିକ ପ୍ରୋତ୍ସାହନ ବାବଦରେ ୧୦୦୦ରୁ ଅଧିକ ଟଙ୍କା ମଧ୍ୟ ଦିଆଯିବ। ଏନେଇ ଆଜି ପଞ୍ଚାୟତିରାଜ ମନ୍ତ୍ରୀ ପ୍ରଦୀପ ମହାରଥୀ ଘୋଷଣା କରିଛନ୍ତି।</p> <p>ଗତକାଲି ମାଷ୍ଟରକ୍ୟାଣ୍ଟନ୍‌ରେ ଦାବି ପୂରଣ ପାଇଁ ଜିଆର୍‌ଏସ୍‌ମାନେ ବିକ୍ଷୋଭ କରୁଥିଲେ। ପୋଲିସ ସେମାନଙ୍କୁ ଘଉଡାଇ ଗୋଡ଼ାଇ ପିଟିଥିଲା। ଜୀବନ ବିକଳରେ ଜିଆର୍‌ଏସ୍‌ମାନେ ଦୌଡ଼ି ପଳାଇଥିଲେ। ଏପରିକି ରାତିରେ ସେମାନେ ଧାରଣାରେ ବସିଥିବା ବେଳେ ପୋଲିସ ଉଠାଇ ଦେଇଥିଲା। ଗତକାଲି ରାତିସାରା ଜିଆର୍‌ଏସ୍‌ମାନେ ଷ୍ଟେସନ୍‌ରେ ଶୋଇଥିଲେ। ଆଜି ସକାଳେ ଆନ୍ଦୋଳନକାରୀ ସେମାନେ ବିଜେପି ପାର୍ଟି ଅଫିସକୁ ଯାଇଥିଲେ। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଦଳର ବରିଷ୍ଠ ନେତାମାନେ ସେମାନଙ୍କ ଆନ୍ଦୋଳନକୁ ସମର୍ଥନ କରିଥିଲେ। ଏପରିକି ପୋଲିସର ମାଡ଼କୁ ନାପସନ୍ଦ ମଧ୍ୟ କରିଥିଲେ। ତେବେ ଦିନ ସାଢ଼େ ୧୨ଟାରେ ବିଜେପି ନେତାମାନେ ଜିଆର୍‌ଏସ୍‌ଙ୍କ ସହିତ ମିଶି କମିଶନରେଟ୍ ପୋଲିସ୍ ମୁଖ୍ୟାଳୟରେ ପହଞ୍ଚିଲେ। ପିଏମ୍‌ଜିରେ ଧାରଣା ଦେବାପାଇଁ ଅନୁମତି ମାଗିଥିଲେ। ଏହାର ୨ ଘଣ୍ଟା ପରେ ପଞ୍ଚାୟତିରାଜ ମନ୍ତ୍ରୀ ପ୍ରଦୀପ ମହାରଥୀ ଜିଆର୍‌ଏସ୍‌ଙ୍କ ଦରମା ବୃଦ୍ଧି ନେଇ ଘୋଷଣା କରିଥିଲେ।</p> <p>ପଞ୍ଚାୟତିରାଜ ମନ୍ତ୍ରୀ ପ୍ରଦୀପ ମହାରଥୀ କହିଛନ୍ତି-“ଜିଆର୍‌ଏସ୍‌ଙ୍କୁ ଆନ୍ଦୋଳନ କରିବା ପାଇଁ ବିଜେପି ଅଫିସରୁ ଧର୍ମେନ୍ଦ୍ର ବାବୁ ପଠାଇଥିଲେ।”</p> <p>କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି-“ଆଲୋଚନା ହିଁ ଏକମାତ୍ର ରାସ୍ତା। ମାତ୍ର ରାଜ୍ୟ ସରକାର ଆଲୋଚନା ନକରି ମାରପିଟ୍‌ କରିବା ଏକ ଦୁଃଖଦାୟକ ଘଟଣା। ମୁଖ୍ୟମନ୍ତ୍ରୀ ଏତେ ନିର୍ଦ୍ଦୟ ହେବାର କୌଣସି କାରଣ ହେବାର ନାହିଁ। ଏ ସମ୍ପର୍କରେ ମୁଁ କେନ୍ଦ୍ର ସରକାରଙ୍କୁ ଅବଗତ କରାଇବି।”</p>
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
