ମଝିରେ ନାଳ: ଏପଟେ ତେନ୍ତଳା ଗାଁ, ସେପଟେ ସରକାର

ଉଦଳା:  କାହିଁ କେଉଁ କାଳରୁ ମଝିରେ ବହି ଯାଉଛି ନାଳଟିଏ। ଏପଟେ ଅନୁନ୍ନତ ତେନ୍ତଳା ଗାଁ, ଆଉ ସେପଟେ ନିଜର ସମସ୍ତ ଯୋଜନା ଧରି ବସିଛନ୍ତି ସରକାର। ନାଳ ପାର ହୋଇ ସରକାରୀ ବାବୁମାନେ ଆସିପାରୁ ନାହାନ୍ତି। ଫଳରେ ବର୍ଷ ବର୍ଷଧରି ତେନ୍ତଳା ଗାଁକୁ ଆସିପାରି ନାହିଁ ସଭ୍ୟତା।

ସରକାରୀ ଅଧିକାରୀ ଆସୁଛନ୍ତି ନା ମିଳୁଛି କୌଣସି ସରକାରୀ ସୁବିଧା। ଶିକ୍ଷା, ସ୍ୱାସ୍ଥ୍ୟ, ବିଜୁଳି ଓ ଗମନାଗମନ ଭଳି ମୌଳିକ ସୁବିଧାରୁ ବଂଚିତ ହୋଇ ବଢୁଛି ଗାଁ ଲୋକଙ୍କ ଦୁର୍ଦ୍ଦଶା। ସରକାରୀ ଯୋଜନାଠୁ ବହୁ ଦୂରରେ ଥିବା ଏଇ ଗାଁ ତେନ୍ତଳା। ମୂୟରଭଞ୍ଜ ଜିଲ୍ଲା ଉଦଳା ବ୍ଲକ୍ କାର୍ଯ୍ୟାଳୟ ଠାରୁ ମାତ୍ର୧୨କିଲୋମିଟର ଓ ପାଟଶାଣୀପୁର ପଞ୍ଚାୟତ କାର୍ଯ୍ୟାଳୟ ଠାରୁ ମାତ୍ର ୨ କିଲୋମିଟର ଦୂର। ତଥାପି ସରକାରୀ ଅଧିକାରୀଙ୍କ ନଜରକୁ ଏଠାକାର ସମସ୍ୟା ଆସି ନ ପାରିବା ବିଡ଼ମ୍ବନାର ବିଷୟ।

ଗୋଟିଏ ପାରିରେ ତେନ୍ତଳା ଗାଁ, ଆର ପାରିରେ ମୌଳିକ ସୁବିଧା ମଝିରେ ଗୋଟିଏ ନାଳ। ମୟୂରଭଞ୍ଜ ଜିଲ୍ଲା ପାଟଶାଣୀପୁର ପଞ୍ଚାୟତ ତେନ୍ତଳା ଗାଁରେ ଥିବା ଏଇ ନାଳ ପାରି ହୋଇ ସରକାରୀ ଅଧିକାରୀ ନା ଆସି ପାରୁଛନ୍ତି ନା ପହଞ୍ଚି ପାରୁଛି ସରକାରୀ ସୁବିଧା। ୫୦ରୁ ଅଧିକ ଆଦିବାସୀ ପରିବାର ରହୁଛନ୍ତି ଏହି ଗାଁରେ। ଏଇ ଗାଁରେ ଶିକ୍ଷା, ସ୍ୱାସ୍ଥ୍ୟ, ବିଜୁଳି, ସରକାରୀ ବାସଗୃହ, ଗମନାଗମନି କୌଣସି ଗୋଟିଏର ବି ସୁବିଧା ନାହିଁ।  ବର୍ଷା ଦିନରେ ଏଇ ନାଳରେ ପାଣି ଭର୍ତ୍ତି ହୋଇ ଯାଉଥିବାରୁ ଗାଁ ଲୋକ ଦରକାରୀ ଜିନିଷ ପାଇଁ ନାଳ ପାର ହୋଇ ଯାଇ ପାରୁନାହାଁନ୍ତି।  ଏଠାରେ ଗୋଟିଏ ପୋଲ ନିର୍ମାଣ କରିବାକୁ ଗ୍ରାମବାସୀମାନେ ଦାବି କରିଆସୁଛନ୍ତି। କିନ୍ତୁ ତାଙ୍କର ଏହି ଦାବିକୁ କେହି କର୍ଣ୍ଣପାତ କରୁ ନାହାଁନ୍ତି।

ସ୍ଥାନୀୟ ବାସିନ୍ଦା ରେବତୀ ସୋରେନ କହିଛନ୍ତି,“ନାଳରେ ପୋଲ ତିଆରି କରିବା ପାଇଁ ଆମେ ଦାବି କରୁଛୁ। ବର୍ଷା ହେଲେ ନାଳରେ ପାଣି ଭର୍ତ୍ତି ହୋଇ ଯିବାରୁ ଯିବା ଆସିବା କରି ହେଉନାହିଁ। ପିଲାମାନେ ସ୍କୁଲ ଯାଇପାରୁ ନାହାଁନ୍ତି। ଗାଁକୁ ଆମ୍ବୁଲାନ୍ସ ଆସିପାରୁନାହିଁ।  ଖଟରେ ବୋହି ରୋଗୀଙ୍କୁ ଡାକ୍ତରଖାନା ନେବାକୁ ପଡ଼ୁଛି। ଆମ ଗାଁକୁ ବିଜୁଳିର ମଧ୍ୟ ସୁବିଧା ନାହିଁ। ଡିବିରି ଜଳାଇ ପିଲା ପାଠପଢ଼ୁଛନ୍ତି। ଗାଁରେ ପୋଲ ନିର୍ମାଣ ପାଇଁ ପ୍ରଶାସନକୁ ବାରମ୍ବାର କୁହାଯାଇଥିଲେ ମଧ୍ୟ କୌଣସି ସୁଫଳ ମିଳୁନାହିଁ।

3ଉଦଳା ବିଡିଓ ସୁଚାରୁ ବଳ କହିଛନ୍ତି,“ ତେନ୍ତଳା ଗାଁରେ ପୋଲ ନିର୍ମାଣ ପାଇଁ ଆଇଟିଡିଏଙ୍କୁ ଲେଖିକି ଦେବୁ।  ପୋଲ ନିର୍ମାଣ କରିବା ପାଇଁ ବ୍ଲକ୍‌ରେ ଏତେ ଟଙ୍କା ନାହିଁ। ଗାଁର କିଛି ଲୋକ ଇନ୍ଦିରା ଆବାସ ଯୋଜନା ପାଇଛନ୍ତି।  ଆଉ କିଛି ଲୋକ ପାଇ ନାହାନ୍ତି। ଖୁବ୍‌ ଶୀଘ୍ର ସମସ୍ତଙ୍କୁ ଇନ୍ଦିରା ଆବାସ ମିଳିଯିବ। ଏହି ଗାଁକୁ  ଖୁବ୍‌ ଶୀଘ୍ର ମଧ୍ୟ ବିଜୁଳି ଯୋଗାଇ ଦିଆଯିବ।